Kapetulu 1

Kukwatankana muKudifukula muMafuku Etu—Kunakulumbululadi?

1, 2. (a) Wuya hambidinyi wakuzañalesha wunakumwekana mumafuku etu? (b) Kuchiñejanyi kwakuwahi kukwetiwu antu ashinshika?

KUNYEÑUMUKA kaayi kejima kudiku wuya hambidi wakuzañalesha kutalisha hakukwatankana mukudifukula. Kunakukwatankesha hamu yihita yawantu akunyuza, nikunyichidi, nimadimi ejima. Amavulu anakuyipompesha hachaaka hachaaka. Antu wenawa elukewa muBayibolu nawu “ayinsahu” jaYehova nawa ayitenaña nawu “izaza deneni.” Amukalakelaña Nzambi ‘mudimu wajila nimwaana niwufuku.’ (Isaya 43:10-12; Chimwekeshu 7:9-15) Muloñadi chelilañawu mwenimu? Muloña anamwiluki Yehova neyi diyi Nzambi walala wumu hohu. Ichi chayikojejaña kwilisha nshakaminu yawu kwendela hamu nanshimbi jindi jaloña. Anadizi cheñi nawu tunakushakama ‘mumafuku akukuminina’ ampata yamakonu yatama, yakukisañanayi Nzambi katatakichi, cheñi nawu wukusinsishahu ituña dindi dadiha daparadisa.—2 Timotewu 3:1-5, 13; 2 Petulu 3:10-13.

² Izu daNzambi dinashiiki nawu: “Hakuleha chanti muntu watama hakekala nawa mwokuku; . . . Ilaña akwakudizoza akaswana ituña, akatiya kuwaha nankashi nakushakama chachiwahi chamwena.” (Masamu 37:10, 11) “Akwakuloña akaswana ituña, akashakamamu haya nyaka.” (Masamu 37:29) “[Nzambi] wakayikombola madilu ejima kumesu awu; hikwakekala nawa cheñi kufwaku;  hikwakekala nawa cheñi hela kuneña hela kudila hela kukataku. Yuma yakusambila yinahiti dehi.”—Chimwekeshu 21:4.

3. Indi kukwatankana kwakudifukula kwalala akwitweshaña ñahi?

³ Antu anakwatankeshiwu chakatataka mukudifukula kwalala anekali enyimbu atachi amwituña dadiha. Anadizi chidi nkeñelu yaNzambi nakuyikoña kushika hakumina ñovu yawu. Hakumwekesha kulema kwaniyi nkeñelu, Yesu wahosheli nindi: “Wumi wahaya nyaka woweniwu, wakukwiluka eyi Nzambi walala wumu hohu, niYesu Kristu watemesheli.” (Yowanu 17:3) Kaposotulu Yowanu wasonekeli nindi: “Mpata yamunu mwishina yikuhita, nikufwila kwayu kwatama, hakwinza muntu welaña muchima waNzambi washakamaña haya nyaka.”—1 Yowanu 2:17.

Chalubulula Kukwatankana Mukudifukula

4. (a) Indi kupompa kwawantu amavulu mukukwatankana kwakudifukula mumafuku etu mwalala kunalumbulukidi? (b) Indi Bayibolu yinakwilumbululi ñahi iku kupompa?

⁴ Indi kupompa kwawantu amavulu mukukwatankana kwakudifukula mumafuku etu kunakulumbulukadi? Chinamwekani hatooka to-o nawu tudi dehi kwakwihi nansa yakanu kaayi katama, niituña daNzambi dadiha dikutachika hanyima yachi. Tudi ayinsahu akumona namesu kushikijewa kwawuprofwetu wamuBayibolu washimwineñahu dehi ayinu mpinji yakupompesha. Wuprofwetu wumu wahoshaña nawu: “Hamafuku akukuminina [anu mafuku akukuminina] mpidi yetala daYehova [kudifukula kwindi kwalala kwanyamunewa] akayishimatisha hewulu dampidi [kubadika nyichidi yikwawu yakudifukula], . . . kwakahwila nyuza yawantu. Nyuza yayivulu yakaya nakuhosha nawu: ‘Tuyenu twakakanduki kumpidi yaYehova, nikwitala daYakoba; kulonda yakatuleji mwaya yaaku yindi, nawa twakendaña munjila jindi.’”—Mika 4:1, 2 NW; Masamu 37:34.

5, 6. (a) Chinekali ñahi chalala nawu nyuza yinakubalumukila kudi Yehova? (b) Malwihwinyi yitwatela kudihula etu aweni?

 ⁵ Hela nyuza yejima hiyinakudihana yayenayu kudi Yehova hetala dindi dakuspiritu dakudifukwilamuku, yihita yawantu kufuma kunyuza yejima yinakwila mwinimu. Hampinji yanakudizawu hankeñelu yayiwahi nihayililu yaYehova Nzambi yaletaña ikoku, nyichima yawu yadikitaña chikupu. Adizozaña hakukeña kuwana chuma chakeñañayi Nzambi kudi wena. Kulomba kwawu kudi neyi kwañimbi yamasamu welili nindi: “Nleji kwila mwaya muchima weyi, muloña yeyi Nzambi yami.”—Masamu 143:10.

⁶ Komana wadimonaña kwikala hakachi kezaza deneni dawantu anakupompeshayi Yehova hamu mukudifukula kwakwatankana? Komana nzatilu yeyi kutalisha kunshimbi yiwatambwilaña kufuma Mwizu dindi yamwekeshaña nawu mwalala weluka chikupu neyi Yehova diyi Nsulu yachu? ‘Watela kwendela munjila jindi’ kushika kudihi?

Chakukwatankana Mukudifukula

7. (a) Kukwatankana mukudifukula kunateli kuwanisha kushika kuchipimwinyi? (b) Muloñadi chichinekalili chakunyakashana kwikala mukwakudifukula waYehova katataka, nawa munjilanyi mutunateli kukwashaku amakwawu kwila mwenimu?

⁷ Nkeñelu yaYehova yidi yakwila nawu yileñaleña yejima yikweti maana yikali yakwatankana mukudifukula kwalala. Tunakutalila ifukodu damba kadifukulawu antu ejima akweti wumi kudi Nzambi walala wumu hohu. (Masamu 103:19-22) Henohu chumichi kanda chizatiki, Yehova watela kufumishahu ejima akaanaña kwila nkeñelu yindi yaloña. Hakusweja luwi, wahaninañahu dekulu kusopesha kwayuma yakelayi, kulonda antu kwejima atweshi kwikala nampinji yakuhimpa yililu yawu. (Isaya 55:6, 7) Dichi nimumafuku etu ‘kunyuza yejima, ninyichidi yejima, niakwamadimi ejima nikudi antu,’ iku kulembelela kwakunyakashana kunakuzatika: ‘Mwakamenu Nzambi  nakumulemesha; muloña mpinji yakusompeshayi yinashiki dehi nawa difukulenu kudi Waleñeli niiwulu nimaseki nikaluñalwiji nituseloki twamenji.’ (Chimwekeshu 14:6, 7) Komana wunawiteji iwu mutambikewa? Neyi welamu dehi, wudi nakukoleka kwakutambikahu amakwawu niwena amwiluki Nzambi walala nikudifukula kudi yena.

8. Hanyima yakudiza ntañishilu yalema yaBayibolu, wuya hambidinyi wukwawu wutunateli kufwila kuyilaku hambidi chikupu?

⁸ Bayi neyi hinkeñelu yaYehova yakudifukula kudi yena kudi antu ahoshaña nawu amukuhwelela ilaña atwalekañahu nakufwila yuma yakeñañawu aweniku. Nzambi nakukeña nindi antu ekali ‘nakwiluka kwakweni kwankeñelu yindi’ nakumwekesha chumichi munshakaminu yawu. (Akolose 1:9, 10) Dikwila nawu antu asakililaña adizaña ntañishilu yalema yamuBayibolu nawa akeñaña kuyilaku hambidi nakwikala eniKristu apama. Mpwila yawu yidi yakukeña kumwiluka Yehova nankashi, nikwilukilaku nikutiyishisha Izu dindi chikupu, nikudizatisha muwumi wawu nankashi. Akeñaña kumwekesha yililu yaTata yetu wamwiwulu nakumona yuma neyi chayimonañayi. Ichi chayileteshaña kukeñakeña jinjila mwakuzatila mudimu wakupulwisha mawumi wunaloñeshiyi Yehova hamaseki makonu. Komana iyi diyi nkeñelu yeyi?—Maku 13:10; Aheberu 5:12–6:3.

9. Munjilanyi kukwatankana kwalala mukunakuzatikila makonu?

⁹ Bayibolu yamwekeshaña nawu owu amukalakelaña Yehova chiña ekala antu akwatankana. (Aefwesesa 4:1-3) Iku kukwatankana kwatela kuzatika katataka, hela chakwila twashakamaña mwituña mudi yaambu nawa tunakulwisha nakubula kuwanina kwetu. Yesu walombeli chikupu nindi atumbanji twindi ejima ekali wumu, nakudiluñisha kukwatankana kwalala. Indi chumichi chinatalishi mudihi?  Chatachi, adi kwikala nawulunda wawuwahi naYehova niMwanindi. Chamuchiyedi, atela kukwatankana wumu namukwawu. (Yowanu 17:20, 21) Kwila mwenimu, chipompelu chawiniKristu chikuzata neyi kuloñesha kunakuzatishayi Yehova hakudizisha antu jindi.

Yumanyi Yaleteshaña Kukwatankana?

10. (a) Tukwikala nachumanyi neyi tukuzatisha Bayibolu halwetu nikutoñojokahu hañakwilu yamalwihu anatukundami? (b) Keñakeñenu yuma yinakuletesha kukwatankana kwawiniKristu kuhitila mukwakula malwihu anatanjikiwu muniyi parakalafu.

¹⁰ Yuma yitanu nayiyedi yeleteshaña kukwatankana mukudifukula yinashimunewi heshina. Chimukwakulaña malwihu analondelihu, hoshenu hayikuma yinakundami kuwulunda wenu naYehova niakwenu eniKristu. Kutoñojoka haniyi yikuma nikutaña nyikanda yinateniwu bayi yinasonekuwuku chikuletesha kukulilaku mumaana awuNzambi, niwuswa wakutoñojoka, nikashinshi—yililu yitwakeñaña wejima wetu. (Yishimu 5:1, 2; Afwilipi 1:9-11) Shinshikenu haniyi yuma chimu nachimu hampinji.

(1) Tweteja wuswa waYehova wakushaku nshimbi yakwila nawu ichi chuma chachiwahi ichi chatama. “Mukuhweleli Yehova namuchima weyi wejima, bayi wushindamena kukashinshi keyeyi awenuku. Mwitijaña Yehova mwejima muwukwilaña, niyena wakakwolwelaña njila jeyi.”—Yishimu 3:5, 6.

Muloñadi wutwatela kukeñela kufumba kwaYehova niwunlomboli neyi hitukufuukula hachuma? (Masamu 146:3-5; Isaya 48:17)

(2) Tukweti Izu daNzambi dakutulombola. “Chimwatambwili kudetu izu dansañu yaNzambi, himwaditambwili neyi nsañu yawantuku, ilaña chochidekala izu daNzambi  chalala, dodizu dakoñaña mudenu mwetiya.”—1 Atesalonika 2:13.

Wubanjinyi wekalaku wakukumina kwila chuma “chitukutoñojoka” netu chachiwahi? (Yishimu 14:12; Yeremiya 10:23, 24; 17:9)

Chumanyi chitunateli kwila neyi tuneluki wanyi hakufumba kwahanaña Bayibolu hayuma yimu? (Yishimu 2:3-5; 2 Timotewu 3:16, 17)

(3) Wonsu wetu twahetelañamu muntanjikilu yoyimu yayakudya yakuspiritu. “Anyaneyi ejima akekala alejewa kudi Yehova.” (Isaya 54:13) “Tuditoñojokenu muntu himuntu, kulonda tusañumuni akwetu kukeñañana nakwila nyidimu yayiwahi. Bayi tuleka kupompa neyi chelañawu amakwawuku, chiña kudilejaleja, chisweji nankashi nanichi chimunamoni ifuku odu [dakujilumuka] hidikwinza nakuswila kwakwihi.”—Aheberu 10:24, 25.

Ihetanyi denzaña hadi owu alemeshaña chikupu ntanjikilu yaYehova yayakudya yakuspiritu? (Isaya 65:13, 14)

(4) Yesu Kristu diyi Nlomboli yetu, bayi neyi muntuku. “Bayi ayitenaña nawu Rabuku, muloña nkuluñaña yenu wumu hohu, wejima wenu ivumu denu dimu. Bayi mutenaña muntu hanu heseki nenu tata yetuku, muloña Tata yenu wuduku wumu hohu, yowu wamwiwulu. Bayi ayitenaña nawa nawu anlomboluku, muloña nlomboli yenu wuduku wumu hohu, diyi Kristu.”—Matewu 23:8-10.

Komana wumu hakachi ketu watela kudimona neyi walema kubadika akwawu? (Aroma 3:23, 24; 12:3)

(5) Twatalilaña kunfulumendi yaWanta waNzambi hohu neyi dikuchiñeja kwamuchidi wamuntu. “Tiyenu chimukulombaña; lombenuña nenu, Tata yetu wekala mwiwulu, ijina deyi dijili, Wanta weyi winzi. Muchima weyi awili hamaseki  neyi chawilañawu mwiwulu. Ilaña sambilenu kukeña wanta windi nikuloña kwindi.”—Matewu 6:9, 10, 33.

Indi ‘kusambila kukeña wanta’ kunatweshi kutukwasha ñahi kuhemba kukwatankana kwetu? (Mika 4:3; 1 Yowanu 3:10-12)

(6) Spiritu yajila yamwekeshaña yililu yalema yaletaña kukwatankana mudi akwakudifukula aYehova. “Nyikabu yaSpiritu yowu kukeña, muzañalu, kuwunda, kukaba kabe-e, luwi, kuwaha, kushinshika, kwovwaha, kudihemba.”—Aŋalija 5:22, 23.

Chumanyi chitwatela kwila hakwila nawu spiritu yaNzambi yisoñi nyikabu yachu mudetu? (Yililu 5:32)

Indi kwikala naspiritu yaNzambi kwakwashaña ñahi wulunda wetu nawakwetu eniKristu? (Yowanu 13:35; 1 Yowanu 4:8, 20, 21)

(7) Akwakudifukula alala ejima aNzambi adibombañamu mukushimwina nsañu yayiwahi yaWanta windi. “Ninsañu iyi yawanta yayiwahi akayishimwañena mwahita matuña ejima mwashakamawu antu, kulonda yakayilili nyuza yejima wunsahu; henohu dihu hakenza kukumisha.”—Matewu 24:14.

Chumanyi chikutuletesha etu kukeña kudibombamu chikupu muniwu mudimu wakushimwina? (Matewu 22:37-39; Aroma 10:10)

11. Chumanyi chikafumamu neyi tuzatisha chalala chaBayibolu muwumi wetu?

¹¹ Kukwatankana hakudifukula kudi Yehova kwatuswijaña kwakwihi nayena nawa kwatwilishaña kutiya kuwaha hakuhanjeka nawakwetu akwakwitiya. Masamu 133:1 yahoshaña nawu: “Tiyenu, o kuwaha o kutowala antu amwivumu dimu akushakama hamu nakutiyañana!” Wenowu  muzañalu hakufuma munaka kaayi kanenzali nalwisu, niyililu yaheña, nimadombu nakupompela hamu nawantu asweja kumukeña Yehova nikwovwahila nshimbi jindi.

Tondolwelenu Yuma Yaletaña Chaambu

12. Muloñadi wutwatelela kutondolwela yililu yakudimena?

¹² Hakwila nawu tubuli kukisañana kukwatankana kwetu kwalema kwamukaayi kejima, twatela kutondolwela yuma yaletaña chaambu. Chuma chimu hikwikala nayililu yakudimena kufuma kudi Yehova ninshimbi jindi. Yehova watukwashaña kulonda tuyitondolweli kuhitila mukutwilukisha wayikojejaña, Satana Diyabolu. (2 Akorinda 4:4; Chimwekeshu 12:9) Satana diyi waluwañesheli aAdama niEvu kudiwula chuma chahosheliyi Nzambi nakuleta yitoñojoka yambukaku nankeñelu yaNzambi. Chafuminimu chadiña hikukala kwayishikeneneni ninetu nawa. (Kutachika 3:1-6, 17-19) Akanu kaayi kanenzali nayililu yakudimena kufuma kudi Nzambi nikunshimbi jindi. Dichi twatela kukañesha yililu yamuchidiwu mukachi ketu.

13. Chumanyi chikumwekesha nawu chalala tunakudiloñesha kutambwila wumi wamwituña daNzambi dadiwahi dadiha?

¹³ Chakutalilahu, toñojokenu hayikaninu yayiwahi yaYehova yikasinsa hampata yamakonu yatama namawulu amaha niiseki dadiha “mwakekala kuloña.” (2 Petulu 3:13) Komana ichi kwila chitwilisha etu kutachika kudiloñesha kulonda twakekaliku hayina mpinji yikavula kuloñaku? Ichi chinayi mukwila nawu kutiyilila kufumba kwaBayibolu: “Bayi mukeña mpata yamunu mwishina, hela yuma yamunu mwishinaku. Neyi muntu wukukeña mpata yamunu mwishina, kukeña kwaTata hikwekala mudi yenaku.” (1 Yowanu 2:15) Dichi, twatela kutondolwela yililu yadinu ituña—yililu yakudimena, niyililu yakudakamena eyaweni, niyililu yachi yatama nimadombu. Tuchili chikali chaaku chakumutiyilila Yehova nikumwovwahila munyichima  yetu, hela chakwila kudi chinambukiku nakubula kuloña kwatukakela. Chihandilu chetu chejima chihaneña wunsahu wakwila nawu yitoñojoka yetu nikufwila kwetu kwashindameni hakwila nkeñelu yaNzambi.—Masamu 40:8.

14. (a) Muloñadi chichalemena kukwatisha kunkisu yakudiza hajinjila jaYehova nikujilondela munshakaminu yetu makonu? (b) Indi nsona yinateniwu muparakalafu yinakulumbulukadi kudi etu halwetu?

¹⁴ Neyi mpinji yapimayi dehi Yehova yamba kakisañanayi yinu nshakaminu yatama yamakonu ninana akeña njila jayu yinza, Yehova hamba kalabaku. Hamba kateñulula yina mpinji hela kuhimpa nshimbi jindi kulonda kwiteja ana achidi akakela kwituña iku anakudiza nkeñelu yaNzambi nanyichima yiyedi nakwilamuku. Ayinu diyi mpinji yakwilahu chuma chimu! (Luka 13:23, 24; 17:32; 21:34-36) Wenowu muzañalu wudiku hakumona izaza deneni hidikukwata kuniyi nkisu yalema, nakufwila chikupu nshimbi janakuhanayi Yehova kuhitila Mwizu dindi nikuloñesha kwindi nawa nakwendela hamu munjila yindi yakuya kwituña dadiha! Nawa chitwasweja kudiza hadi Yehova, dihu hitukuswejesha kumukeña nikukeña kumukalakela.

Kuhituluka kwaKuhanjeka

• Indi nkeñelunyi yaYehova kutalisha kukudifukula?

• Kukulilakunyi kutwatela kukeñesha kwila hanyima yakwila tunadizi dehi ntañishilu yalema yamuBayibolu?

• Chumanyi chitwatela kwila hamuntu hamuntu hakwila twikali akwatankana hamu nawakwetu akwakudifukula aYehova?

[Malwihu aKuzatisha haKudiza]

 [Mwevulu wudi hefu 4]

‘Akwakudizoza akaswana ituña, nawa akatiya kuwaha nankashi nakushakama chachiwahi mukuwunda’