Kapetulu 8

 ‘Kulwisha nawaSpiritu Atama’

1. Muloñadi chitwatela kwilukila nyidimu yawaspiritu atama?

ANTU amavulu asekeshaña yitoñojoka yakwila nawu kwekala aspiritu atama. Ilaña hinsañu yamukunkulwayiku. Hela chakwila antu ayikuhwelela hela nehi, aspiritu atama ekala kwoku, nawa esekaña kuleta kukala hadi antu ejima. Akwakudifukula aYehova niwena ayikabishaña. Nawa diwu akabishañawu chikupu. Kapostolu Pawulu wahosheli nindi: “Hitwalwishaña nawantu akweti nyijimba namashuku, twalwishaña namawanta [akamwekanaña], nawakwañovu, nawakwakuyula mwidima wamakonu, nawaspiritu atama amumawulu.” (Aefwesesa 6:12) Mumafuku etu kukala kunakuleta aspiritu atama kunabadiki kwamwekanaña mpinji yejima muloña Satana amunatili kufuma mwiwulu nawa nahili, hakwiluka nindi wukweti kampinji kanti kanashaliku.—Chimwekeshu 12:12.

2. Chinekali ñahi chaswayi kudetu kushinda ndombu yakulwisha nawaspiritu abadika antu ñovu?

² Komana chaswayi kushinda ndombu yakulwisha nawaspiritu akweti ñovu jabadika antu? Eña, kuhitila hohu mukushindamena chikupu hadi Yehova. Twatela kumutiyilila nikwovwahila Izu dindi. Kwila mwenimu, tunatweshi kutondolwela kukisika lwakumujimba, nimuyililu, nimuyitoñojoka kwamonañawu antu anakuyulewa naSatana.—Yakoba 4:7.

Anyuli aMwituña Adi muMawulu

3. Anyi aswejaña kukañeshayi Satana, nawa munjilanyi?

³ Yehova watulejaña chikupu yililu yidi mwituña, muloña wakwila wayimwenaña heluña dindi damwiwulu. Wamwinkeli  kapostolu Yowanu chimwenu mwamulumbulwiliwu Satana neyi “chazañombi muneni wuchinana.” Wadiña wadiloñesha dehi kudyañana, neyi chinatwesheki, Wanta waNzambi wawuMesiya chelili tuhu wusemuki mwiwulu mu 1914. Chakañenyi Satana mukuna kweseka, waleteli ikañesha dasweja kutama hadi añimeni ahamaseki aniwu Wanta. (Chimwekeshu 12:3, 4, 13, 17) Indi Satana wadi kwasa ñahi iyi njita? Kuhitila mudi añimeni indi awantu.

4. Indi nsulu yañovu yanfulumendi yawantu hinyi, nawa tuneluki ñahi chenichi?

⁴ Chalondelelihu, Yowanu amumwekesheleli kanyama wukweti nyitu yitanu nayiyedi ninseñu ikumi, kanyama wukweti wanta “wanyichidi yejima, niwamatuña ejima niwamadimi ejima niwanyuza yejima.” Iwu kanyama wemenañaku chibalu chejima chamukaayi chamatuña nachiyulu. Yowanu amulejeli nawu “chanzañombi [Satana Diyabolu] hakumwinka [kanyama] ñovu jindi, niitanda dindi dawanta niwanta weneni.” (Chimwekeshu 13:1, 2, 7) Eña, Satana diyi nsulu yañovu niwanta wanfulumendi jawantu. Dichi neyi chasonekeliyi kapostolu Pawulu nindi, ‘anyuli amwituña’ alala ‘hiyaspiritu atama amumawulu,’ ayulaña nfulumendi jawantu. Owu ejima anakufwila kudifukula kudi Yehova atela kutiyishisha ichi chuma chalema.—Luka 4:5, 6.

5. Anyuli amatuña nachiyulu anakuyipompeshela kudihi chakatataka?

⁵ Hela chakwila anyuli amavulu amatuña nachiyulu ahoshaña nawu hiyakakwitiya, ilaña kwosi nyuza yatiyililaña kukuyula kwaYehova hela kuna kwaMwanta windi, Yesu Kristu yatondayiku. Wejima wawu alwishaña chatama nakukakela kuñovu jawu aweni. Makonu, neyi chinahoshi nsañu yidi muChimwekeshu, ‘mazu onenawu kudi aspiritu awandemoni’ anakupompesha anyanta awakamatuña “kunjita yefuku odu deneni daNzambi Watwesha yejima” yaAmagedoni.—Chimwekeshu 16:13, 14, 16; 19:17-19.

6. Muloñadi kusoñama chikunakukeñekela hakutondolwela kudiñija munsañu jakuhakwila yililu yaSatana?

 ⁶ Mafuku ejima, wumi wawantu awuluwañeshaña nansañu yamatuña nachiyulu, ninshakaminu yawantu, nimaheta, niyikonkojola yansakililu yasandaña yisaka yawantu. Muniyi yikonkojola, kakavulu antu ekalañamu nambadi—munhoshelu hela munzatilu—namatuña, ninyichidi, nimadimi awantu, hela antu amuchidi wumu kuyakundamawu. Hela chakwila antu hiyanakundami kunoyu yikonkojolaku, kakavulu wukuwana anadiñijimu dehi nakuhakwilaku kabadi kamu nawa nikufwisha kekwawu. Hichikweti muloña namuntu hela izanvu diyanakuhamekaku, ilaña muntwinyi yomweni yanakuhakwilawu? Bayibolu yalumbululaña hatooka nawu: “Mpata yamunu mwishina yashakamaña mudi owu watama.” (1 Yowanu 5:19) Hanu dinu, muntu nateli kutondolwela ñahi kumusenuna hamu nawantu amavulu? Kuhitila hohu mukuhakwilaku Wanta waNzambi chikupu nikutwalekahu kubula kudiñija munsañu jamatuña.—Yowanu 17:15, 16.

Tufuta Twanowu Watama

7. Indi kubabala kwaSatana anakwimwekeshi ñahi hanzatishilu yindi yansakililu yakutwamba?

⁷ Munsañu yejima yanyaka, Satana wazatishaña nhoshelu niikañesha dakumujimba kulonda kusenwinamu antu kufuma kukudifukula kwalala. Wazatishaña cheñi tufuta tukwawu—twayililu yakubabala. Mukubabala kwindi, nahembi antu amavulu chikupu mumwidima kuhitila munsakililu yakutwamba, nakuyilisha atoñojokeña nawu amukalakelaña Nzambi. Hakubula kumwiluka Nzambi chiwahi nikukeña chalala, atela kuyihuñumuna nayuma yamwidima niyitoñojoka yanyidimu yansakililu hela kuzañalala nanyidimu yamaneni. (2 Atesalonika 2:9, 10) Ilaña, anatusoñamishi nawu nimukachi kanowu adiña mukudifukula kwalala, ‘amakwawu akasenuka . . . , akatiyilila aspiritu akutwamba, ninsañu  jalejañawu andemoni.’ (1 Timotewu 4:1) Chumichi chinatweshi kuzatika ñahi?

8. Indi Satana nateli kutusenuna ñahi nakudiñija munsakililu yakutwamba hela chakwila twadifukulaña kudi Yehova?

⁸ Mukubabala, Diyabolu watwilukukaña kuhitila muyuma yitwazeyamu. Komana tuchidi kuchina antu? Neyi dimu, tunateli kwiteja ikakeja dakufuma kudi antaña hela antuñi netu kutachika kwila yaaku yafumaña munsakililu yakutwamba. Komana twaditiyaña? Neyi dimu, twatela kutiya kutama hampinji yanakutufumbawu hela neyi amakwawu akaana kwiteja yuma yitunahoshi. (Yishimu 15:10; 29:25; 1 Timotewu 6:3, 4) Chatela tuhimpi mmwenu yetu nakukakela kuchakutalilahu chaKristu, hadaha tunateli kukakela kummwenu yanowu ‘atotomonaña nsañu kumatu’ nakuhosha nawu kutaña Bayibolu hohu nikushakama chakadi kwila chuma chatama chinashikili. (2 Timotewu 4:3) Hela chakwila tuya kwizanvu dansakililu yacheñi hela tukakela chikupu kunsakililu yetu yamwaka hichuma chalema kudi Satanaku, ilaña chuma chalema kudi yena yowu neyi tubula kudifukula kudi Yehova munjila yalombwelañamu Nzambi kuhitila Mwizu dindi nikuloñesha kwindi.

9. Indi Satana mukubabala wazatishaña ñahi wuvumbi hakuwanisha nkeñelu yindi?

⁹ Satana cheñi mukubabala wakokolaña antu kulonda adizañalesheña nayuma yayiwahi munjila yaheña. Welaña mwenimu kuhitila munjila yakufwila kwila wuvumbi. Hakukaana nshimbi yayiwahi yaBayibolu, amavulu mukaayi amonaña wuvumbi welañawu antu abula kudisumbula neyi himuzañalu wetejewa munshimbi hela neyi hinjila yimu yakumwekeshelamu nawu anakuli. Indochu ana adisumbula? Amavulu elaña wuvumbi. Hela chakwila kwosi wuneli wuvumbi mumaluwi awuku, antu amavulu afuukulañahu kudiseña hela kwambuka kulonda kusumbula hela kusumbuka namuntu wacheñi. Kafuta kazatishañayi Satana, kakufwila kuluwañesha antu kulonda ahandeña nachiseki chakatataka,  kuyileñesha adiwuleña yuma yafumañamu oyu yashimbulaña bayi yawu aweniku, ilaña niyawakwawu, sweje-e hawulunda wawu naYehova niMwanindi.—1 Akorinda 6:9, 10; Aŋalija 6:7, 8.

10. Munjilanyi mwesekelañayi Satana kuluwañeshela yililu yetu kutalisha kuwuvumbi nimadombu?

¹⁰ Kufwila kukwawu kwachisemwa hikuhema. Neyi kuhema kweniku kwatelela, kwatela kukwashanaku lwakumujimba, nimuyitoñojoka, nikwikala wakasunuka. Hanu dinu twatela kwila ñahi neyi Satana mukubabala kwindi yazatisha mpinji yakunooka kulonda kweseka kuhuñumuna yitoñojoka yetu kufuma kudi Nzambi? Chakutalilahu, tweluka netu Yehova wahela kwila wuvumbi nimadombu. Neyi mafilimu, nimaprogiramu ahanyivwimbimbi, niitala dayisela dimwekesha yuma yamuchidowu, komana twatwalekañahu nakuyitala? Anukenu nenu, Satana wukumona kwila nindi yuma yamuchidiwu yinaswejeliku muloña mpinji yindi yakumupatila mwikela yidi kwakwihi, chineli “antu atama niakwakutwamba akuya nakusweja, wena akudimba akwawu, niwena akuyidimba.” (2 Timotewu 3:13; Chimwekeshu 20:1-3) Dichi twatela kutwalekahu kwikala asoñama kuyililu yaSatana.—Kutachika 6:13; Masamu 11:5; Aroma 1:24-32.

11. Munjilanyi munateli kumuhuñumwinawu muntu weluka chalala hansañu yakuhoña nakutachika kupesha neyi chakwila hanasoñamiku?

¹¹ Tweluka cheñi netu ana ejima adiñijaña munyichidi yejima yakupesha—kuhoña, niwuloji, hela kweseka kuhanjeka nawafu—hichishimashima kudi Yehova. (Kuhituluka 18:10-12) Neyi twiluka chumichi, hitwakatoñojokahu kuya kudi atutepa, hela kuyitambwila hetala detu kulonda elilihu yuma yawandemoniku. Komana tunateli kuyitiyilila neyi adi hachisanji chanyivwimbimbi hela haIntaneti? Hela chakwila hitukwiteja kutuuka kudi chimbukiku, komana twatela kukasa ipiñu munkuku yankemba nakutoñojoka netu  dinateli kumukiña mwana kuwubanji? Hakwiluka netu Bayibolu yahisha kukanyika amakwawu nayitumbu, komana tunateli kwiteja muntu kuyula yitoñojoka yetu?—Aŋalija 5:19-21.

12. (a) Indi tumina twazatishewaña ñahi kutwikojeja kutoñojoka hayuma yitweluka netu yatama? (b) Indi nvwalilu yamuntu, ninsakwilu, hela nhoshelu yatela kumwekesha ñahi nawu wakeña antu akweti nshakaminu yahelayi Yehova? (c) Chumanyi chinakukeñeka kudetu neyi tunakukeña kutondolwela kufwa mutufuta twaSatana?

¹² Bayibolu yahoshaña nawu wuvumbi niwuzondu wamumuchima wejima (niyitoñojoka yamajilu) bayi muyitenaña mukachi kenuku. (Aefwesesa 5:3-5) Indochu neyi mazu amuchidi wenowu adi mutumina tunakutiyakana chiwahi, tumina twakuleta ikoku, hela twanyingongu yinakutwaleka? Komana twatela kufuntila hayikuma yatumina tunakuhameka kwila wuvumbi, nikuzatisha yitumbu yashetana munjila yakuhemesha, niyililu yikwawu yatama? Tahindi hamuloña wakwila tweluka netu hitwatela kwimbujola nshakaminu yawantu owu adiñijaña muniyi yumaku, komana twakeñaña kudilukisha kudi wena kuhitila mukwimbujola nvwalilu yawu, ninsakwilu yawu, hela nhoshelu yawu? Kenoku kafuta kutama kazatishañayi Satana hakusenwinamu antu kulonda atiyilileña kuyitoñojoka yindi yatoka! (2 Akorinda 4:3, 4) Hakwila nawu tubuli kufwa munyihetu yindi, twatela kutondolwela kusenunewa netuña. Twatela kuyiluka ‘akwakuyula mwidima wamakonu’ nikulwisha ndombu yawu chikupu.—1 Petulu 5:8.

Adiloñesha Kwikala akaKwimika Mushindu

13. Munjilanyi muchinekalili chaswayi kudetu kushinda ituña dinakuyulewa naSatana, nakubula kuloña kwetu?

¹³ Henohu Yesu kanda yofwi, wayilejeli atumbanji twindi nindi: “[Kolenu], ami nemiki mpata yamunu mwishina mushindu.” (Yowanu 16:33) Niwena atwesheli kwikala  akakwimika mushindu. Chimwahitili yaaka 60, kapostolu Yowanu wasonekeli nindi: “Wemikaña mpata yamunu mwishina mushindu hinyi? Yowu wetiyaña nindi Yesu diyi Mwana kaNzambi.” (1 Yowanu 5:5) Chikuhwelelu chamuchidiwu achimwekeshaña kuhitila mukwovwahila lushimbi lwaYesu nikushindamena Hezu daNzambi, neyi cheliliyi Yesu. Chumanyi chikwawu chinakukeñeka? Cheñi twatela kukundama kwakwihi nachipompelu muloña Yesu diyi Mutu wachu. Neyi tuvulumuna, twatela kubalumuka mumuchima chikupu nikulomba kwanakena kudi Nzambi kushindamena hamulambu waYesu. Kwila mwenimu, anetu nawa tunateli kwikala akakwimika mushindu hela chakwila hitwaloñaku nawa twavulumunaña.—Masamu 130:3, 4.

14. Tañaku Aefwesesa 6:13-17, nawa zatishaku malwihu ninsona yinashiwu muniyi parakarafu neyi dihakushindamena kuhanjeka hankisu yafumaña muchibalu chejima chachitwa chakuspiritu.

¹⁴ Hakwila nawu tutweshi, twatela kukwata “kuyitwa yaNzambi  yejima,” chakadi kudiwula hela chuma chimu. Mwani bakulenu Bayibolu yenu haAefwesesa 6:13-17, kulonda mutañi chiyinalumbululi haniyi yitwa. Kulondelahu, kuhitila mukwakula malwihu adi heshina, shinshikenu chimunateli kuhetelamu mukukiñewa kwahanaña chitwa hichitwa.

‘Kupimpila mahina ansañu yalala’

Hela chakwila tweluka chalala, indi kudiza mpinji yejima, nikutoñojokañahu hachalala chaBayibolu, nikuwanika kukupompa kukutukiña ñahi? (1 Akorinda 10:12, 13; 2 Akorinda 13:5; Afwilipi 4:8, 9)

‘Chikuñu chakujika hebwambu chakuloña’

Mwini nshimbi jakuloña hinyi? (Chimwekeshu 15:3)

Lumbululaku chatela kudiñijayi muntu mukukala kwakuspiritu neyi yakaañanya kulondela nshimbi jaYehova? (Kuhituluka 7:3, 4; 1 Samweli 15:22, 23)

‘Vwalenu kunyendu nkwabilu jakwenda nansañu yakuwunda yayiwahi’

Kuzatisha nyendu yetu kakavulu nakushimuna mpinji yejima kudi antu hayuma yinaloñeshiyi Nzambi yakuwunda kwatukiñaña ñahi? (Masamu 73:2, 3; Aroma 10:15; 1 Timotewu 5:13)

‘Nkebu yeneni yachikuhwelelu’

Neyi tukweti chikuhwelelu chakola chikupu, twamba kela ñahi neyi tumona makabi anateli kutwileñela kujinoka hela kuchina? (2 Anyanta 6:15-17; 2 Timotewu 1:12)

‘Itepa dachikuñu dawamwinu’

Indi kuchiñeja kwawamwinu kunateli kukwasha ñahi  muntu kubula kumusenuna kuhitila mukwakamena nankashi maheta akumujimba? (1 Timotewu 6:7-10, 19)

‘Mpoku yakabali yakuspiritu’

Twatela kushindamena hachumanyi mpinji yejima yitunakulwila wuspiritu wetu wunalukukiwu hela wawakwetu? (Masamu 119:98; Yishimu 3:5, 6; Matewu 4:3, 4)

Hakutwesha njita yakuspiritu, chumanyi chikwawu chinakukeñeka chalema nankashi? Chinateli kuzatishewa kapampa kañahi? Kwimenakunyi? (Aefwesesa 6:18, 19)

15. Tunatweshi ñahi kuzatilahu nañovu hakuzuña ndombu yakuspiritu?

¹⁵ Hakwikala amashidika aKristu, tudi kukabadi kamukanka weneni wamashidika adi munjita yakuspiritu. Neyi twikala asoñama nawa tuzatisha chiwahi yitwa yaNzambi yejima, hitwamba kadimbuka muniyi njitaku. Ilaña, twakekala akwakuhana wukwashu kudi akwetu ambuña Nzambi. Twakadiloñesha nikufwila kuzatilahu chikupu, mukushimwina nsañu yayiwahi yaWanta waNzambi wawuMesiya, nfulumendi yamwiwulu yalwishañayi Satana chikupu.

Kuhitulukamu kwaKuhanjeka

• Muloñadi akwakudifukula aYehova chiyabulilañawu kudiñija munsañu jamatuña?

• Tufutanyi tukwawu twazatishañayi Satana hakukisañana eniKristu lwakuspiritu?

• Indi yitwa yaNzambi yejima yakuspiritu yatuhembaña ñahi munjita yetu yakuspiritu?

[Malwihu aKuzatisha haKudiza]

[Nyevulu yidi hefu 76]

Nyuza anakuyipompeshela kuAmagedoni