Kapetulu 2

Mulemeshenu Yehova Hamu Neyi Nzambi Walala Wumu Hohu

1. Indi Nzambi walala hinyi?

BAYIBOLU yahoshaña nawu hela kudi yuma yayivulu yamonañawu nawu anzambi, “hakwinza etu twamonaña netu kudi Nzambi wumu hohu, diyi Tata.” (1 Akorinda 8:5, 6) Iwu “Nzambi wumu hohu” diyi Yehova, Nleñi wayuma yejima. (Kuhituluka 6:4; Chimwekeshu 4:11) Yesu wamuteneneña nindi “Nzambi yami ninenu Nzambi yenu.” (Yowanu 20:17) Waditejeli naMosi wasambilili kuhosha nindi: “Yehova diyi Nzambi [walala], hikudi wacheñuku.” (Kuhituluka 4:35) Yehova wasweja kubadika kuhita chuma chejima chakudifukulaku chidi neyi, akishi, niantu akudifukulaku, hela chilumbu chindi Satana Diyabolu, “nzambi yampata yamakonu.” (2 Akorinda 4:3, 4) Kwambukaku nayuma yejimiyi, Yehova diyi ‘Nzambi walala wumu hohu,’ neyi chamuteneniyi Yesu—Yowanu 17:3.

2. Hampinji yitunakudiza hadi Nzambi, indi yihandilu yetu yatela kwikala ñahi?

² Antu asakililaña adizaña hayililu yaNzambi yazañaleshaña muchima, nawa adizaña hayuma yanakoñiyi niyamba kakoñayi, aswijewaña kudi yena. Kukeña kwawu kuyamukeñawu Yehova chikwasweja, kwayileteshaña kumulemesha. Munjilanyi? Njila yatachi yidi yakulejaku amakwawu hadi yena. Aroma 10:10 yashimunaña nawu: ‘Nakanwa muntu wetejaña nakumona kuhanda.’ Njila yikwawu yidi yakuhitila mukumwimbujola mumazu nimunzatilu. Aefwesesa 5:1 yahoshaña nawu: “Ikalenu akwakumwimbujola Nzambi, neyi anyana akeñewa.” Hakwila nawu twili mwenimu chikupu, twatela kwiluka yililu yaYehova yayeni.

3. Yililwinyi yaNzambi yabadikamu?

 ³ MuBayibolu yejima, mudi mazu amavulu amwekeshaña yililu yabadikamu yaNzambi. Yililu yindi yasweja kubadika yiwaana himaana, wuñanji, ñovu, nikukeña. ‘Kudi yena kudi maana.’ (Yoba 12:13) ‘Mwatwalañayi mwejima mwawuñanji hohu.’ (Kuhituluka 32:4) ‘Watakalala nañovu.’ (Isaya 40:26) ‘Nzambi diyi kukeña.’ (1 Yowanu 4:8) Hela chochu, hakachi kayililu yaNzambi yabadika yiwaana, chililwinyi chasweja kubadika, chahita yililu yejima chamwekeshaña ochekalayi Nzambi?

“Nzambi Diyi Kukeña”

4. Chililwinyi chaNzambi chadiña chalema hakuleña yileñaleña yejima niyuma yonaña yejima?

⁴ Toñojokenu chamuletesheli Yehova kuleña yileñaleña yonsu niyileñaleña yikweti maana, yakuspiritu niantu. Komana adiña maanindi tahindi ñovu jindi? Inehi, hela chakwila Nzambi wayizatishili, bayi neyi diyamuletesheli kuleña yumaku. Hela wuñanji windi hiwakeñekeli kuhana chawaana chawumiku. Ilaña, kukeña kwaNzambi kwasweja, dikwamuletesheli kuhana muzañalu wamaana akuhanda kudi amakwawu. Kukeña dikwamuletesheli kufuukulahu nindi muchidi wamuntu wovwahila watela kushakama haya nyaka muParadisa. (Kutachika 1:28; 2:15) Kukeña dikwamuletesheli kuloñesha chakufumishahu kuhisha kwaleteli kuputola kwaAdama hamuchidi wamuntu.

5. Kwesekeja naBayibolu, Yehova hichifwikija chachililwinyi, nawa muloñadi?

⁵ Komana, hayililu yejima yikwetiyi Nzambi, kukeña dichililu chindi chabadika. Dichekalayi. Hela chakwila yililu yikwetiyi yidi neyi maana, wuñanji, niñovu yalema, Bayibolu hiyahoshañahu nawu Yehova wekala wumu haniyi yililuku. Ilaña yahoshaña nawu yena diyi kukeña. Mwamweni, Yehova diyi chifwikija chakukeña. Iku kukeña kwashindamena hanshimbi, bayi hayitoñojokaku. Kukeña kwaNzambi akwiyulaña  nanshimbi yalala nawa yaloña. Himuchidi wakukeña wasweja kubadika, neyi chinamwekeshiyi Yehova Nzambi yomwenindi. Kukeña kwamuchidiwu hichinjikijilu chakubula ichima nawa mpinji yejima kwendelaña hamu nawunsahu wamwekenaña munyidimu.

6. Chumanyi chaleteshaña chikali chaswayi kudetu kumwimbujola Nzambi hela chakwila watubadika?

⁶ Ichi chililu chachiwahi chakukeña dichatwikojejaña kumwimbujola Nzambi wamuchidiwu. Hakwikala antu akuminina, abula kuloña, aputoloña, twatela kutoñojoka netu hitukutwesha kumwimbujola Nzambi chiwahiku. Chakutalilahu chikwawu chakukeña kwaYehova kwabadika dichichi: Weluka mutwakuminaña nawa hakeñaña etu kwikala aloñaku. Weluka nindi chakatataka hitunashikili nimukuloñaku. (Masamu 51:5) Dimuloña waweni Masamu 130:3, 4 chiyahoshelaña nawu: ‘Neyi Yehova wukushinshika mwaluwañawu antu, hinyi wukwimana, eyi Mwanta? Ilaña kudeyi kwekala kwanakena chikupu.’ Mwamweni, Yehova ‘hiNzambi wenzala wushona, watoñaña antu, hazuwaña swayuku, wasweja niluwi.’ (Kwidika 34:6) “Muloña eyi [Yehova] wumuwahi waanakenaña.” (Masamu 86:5) Kwenoku kukundeja! Kwenoku kuwaha kwakukalakela Nzambi muwahi nikumona chatwakamenañayi mukukeña ninaluwi!

7. Indi kukeña kwaYehova kunatweshi kumwekana ñahi munyidimu yindi yakuleña?

⁷ Kukeña kwaYehova kwatela kumwekena cheñi munyidimu yindi yakuleña. Toñojokaku hayuma yayiwahi yayivulu yahanayi kulonda tudiluñisheña yidi neyi, mpidi jajiwahi, nimavunda, nimajiya nituluñalwiji. Watwinka yakudya yayiwahi yashiyashana kulonda tuyitiyeña kuwaha hakuyidya nikutwikutisha. Cheñi, Yehova waloñesha nkenu jajivulu jajiwahi nawa jepukaña mavumba amawahi kushilahu niyileñaleña yawanyama yayiwahi. Waleñeli yuma yatela kuyitiyisha antu kuwaha, hela chakwila hakeñeleña kuyileñaku.  Eña, kushakama mukanu kaayi katama, munshakaminu yamakonu yakadi kuloña, hitukutwesha kutiya kuwaha nayileñaleña yindi chikupuku. (Aroma 8:22) Ilaña toñojokaku hayuma yamba katwililayi Yehova muParadisa! Ñimbi yamasamu natushiiki nindi: “Wakamununaña muchikasa cheyi, yuma yejima yikweti wumi wayiikutishaña nayuma [yayiwahi] yakeñawu.”—Masamu 145:16.

8. Chakutalilahwinyi chasweja kubadika chakukeña kwaNzambi kutalisha kudetu?

⁸ Chakutalilahwinyi chasweja kubadika chakukeña kwaYehova kutalisha kumuchidi wamuntu? Bayibolu yalumbulula nawu: “Chaswejeliyi Nzambi kukeña mpata yamunu mwishina, waheni Mwanindi wumu hohu, kulonda muntu wukumukuhwelela aheti wumi waha nyaka, akabuli kunoña.” (Yowanu 3:16) Komana chadiña hamuloña wakuwaha kwawantu chaletesheli Yehova kwila mwenimu? Aroma 5:8 yakulaña nawu: “Nzambi wamwekeshaña kukeña kwindi yomweni kudetu, hohitwachidiñi akwanshidi Kristu watufwilili.” Eña, Nzambi watemesheli Mwanindi waloña hamaseki kulonda kuhana wumi windi neyi ifutu danyiloña damulambu wakutukula nachu kumuloña wanshidi nikufwa. (Matewu 20:28) Ichi chenzulwili njila yawantu amukeña Nzambi kuheta wumi wahaya nyaka. Twamusakililaña Nzambi hakukeña kwanatandishiyi kudi ejima anakukeña kwila nkeñelu yindi, muloña Bayibolu yatulejaña nawu: “Nzambi hakamenaña antu kumesuku; hakwila munyuza yejima, muntu wamwakamaña yena, welaña mwaloña, amutiyaña kudi Nzambi kuwaha.”—Yililu 10:34, 35.

9. Indi walala wakwila nawu Yehova watwinka Mwanindi kwikala ifutu danyiloña chatela kwitwilisha etu kwiladi?

⁹ Indi walala wakwila nawu Yehova wahana Mwanindi kwikala ifutu danyiloña kudetu, kutwenzunwina njila yaya kuwumi wahaya nyaka, chikuletesha kuzatisha ñahi wumi wetu makonu? Ichi chatela kuswejesha kukeña kwetu kudi  Nzambi walala, Yehova. Hampinji yoyimu, chatela kutwilisha kukeña kumutiyilila Yesu wamwimenañaku Nzambi. “[Yesu] wafwilili ejima kulonda antu akuhanda abuli kudihandila cheñi awenawu, [ilaña] amuhandileña yena wayifwilili.” (2 Akorinda 5:15) Kwenoku kuwaha hakulondela mumahanji aYesu, muloña wadiña chakutalilahu chachiwahi hakwimbujola kukeña niwushona waYehova! Ichi anachimwekeshi namazu ahosheliyi Yesu kudi akwakudizoza nindi: “Inzenu kudami enu ejima mudi nakukabakana, mwasenda yalema, ami nukuyinookesha. Ditwikenu mpanda yami, mudizili kudami muloña ami nawunda, nadizoza mumuchima, ninenu mukumona kunooka munyichima yenu. Muloña mpanda yami yaswayi, nichisenda chami chapela.”—Matewu 11:28-30.

Kumwekesha Kukeña Kudi Amakwawu

10. Jinjilanyi jikwawu mutwatela kumwekeshela kukeña kudi akwetu eniKristu?

¹⁰ Tukumwekesha ñahi netu tukweti muchidi wakukeña akwetu eniKristu neyi kukwetiyi Yehova niYesu hadetu? Talenu njila jajivulu mutwatela kwilila mwenimu: “Kukeña kwadiwunjikaña, kukweti niluwi; kukeña hikwahetaña ichimaku; kukeña hikwadinkaña wantaku; hikwaditoheshañaku; hikwelaña chuma chabula kutelaku; hikwakokwelaña kwindi hohuku; hikwanyakalaña kuzuwaku; hikwafuukwilaña mukwawu chuma chatamaku; kwazañalalaña nayuma yabula kuloñaku, kwazañalalaña nansañu yalala. Kwovwahilaña yuma yejima, kwetejaña yuma yejima, kwachiñejaña yuma yejima, kwatatakenaña mwahita yuma yejima. Kukeña hikwakañanyañaku.”—1 Akorinda 13:4-8; 1 Yowanu 3:14-18; 4:7-12.

11. Kudanyi cheñi kutwatela kumwekesha kukeña, nawa munjilanyi?

¹¹ Kudanyi cheñi kutwatela kumwekesha kukeña, nawa munjilanyi? Yesu nindi: ‘Yenu mwakelishi atumbanji  munyuza yejima, mwakayipapatishi mwijina daTata, nidaMwana, nidaSpiritu yajila. Mwakayileji kuhemba yuma yejima yinayilejenu.’ (Matewu 28:19, 20) Ichi chinabombelimu kushimwina nsañu yayiwahi yaparadisa yetuña dadiha daNzambi dinakwinza kudi ana achidi kanda ekali akwetu eniKristu. Yesu wachimwekesheli hatooka nindi kukeña kwetu hikwatela kukumina hohu kudi akwetu yitwetiya nawuku, ilaña wahosheli nindi: “Neyi mukukeña antu ayikeñaña hohu, mwakadiila mwodi? Hidimu mwelaña ansonkeshuku? Neyi mukwimusha ana kwenu hohu munabadikili akwenu hadihi? Hidimu mwelañawu [akamatuñaku]?”—Matewu 5:46, 47; 24:14; Aŋalija 6:10.

‘Endenu Mwijina daYehova’

12. Muloñadi ijina daNzambi chidamutelela yena hohu?

¹² Njila yikwawu yalema yakulemeshelamu Nzambi walala hikwiluka, nikuzatisha, nikutañisha amakwawu ijina dindi dambukaku, daYehova. Ñimbi yamasamu wahosheli yitoñojokiyi yakufuma heshina damuchima nindi: “Kulonda antu eluki nawu, ijina deyi yeyi Yehova yeyi hohu, Mukwakubadika heseki dejima.” (Masamu 83:18, NW) Ijina Yehova dalumbuluka nawu “Wakojejaña Yuma Kwikalaku.” Diyi Mukwakufuukula Muneni, mpinji yejima washikijaña kufuukula kwindi kunkumishilu yayiwahi. Chiña Nzambi walala wumu hohu diyi watela kwikala nanidi ijina, muloña antu hiyakutwesha kwiluka nawu wuswa wawu wukawanisha yumaku. (Yakoba 4:13, 14) Yehova nkawindi diwunatweshi kuhosha nindi izu dindi “dakakoña chachiwahi” mudimu wadu waditemesheleliyi. (Isaya 55:11) Antu amavulu azañalalaña neyi amona katachi ijina daNzambi muBayibolu yawu nikudiza chidalumbuluka. (Kwidika 6:3) Ilaña akahetelamu naniku kwiluka neyi chakwila ‘akwendela mwijina daYehova . . . haya nyaka.’—Mika 4:5.

13. Chumanyi chinabombelimu mukwiluka ijina daYehova nikwendela mwijina dindi?

 ¹³ Kutalisha kwijina daNzambi, Masamu 9:10 yahoshaña nawu: “Awa eluka ijina deyi akakuhweleleyi.” Ichi chinabombelimu yuma yayivulu kubadika hakwiluka ijina Yehova, chinabuli kulumbuluka hohenohu nawu kumukuhwelela. Kwiluka ijina daNzambi chalumbuluka kutiyisha nikumusakilila Nzambi nanochu chekalayi Yehova, nikulemesha wanta windi, nikwovwahila nshimbi jindi, nikumukuhwelela muyuma yejima. (Yishimu 3:5, 6) Chochimu, kwendela mwijina daYehova chalumbuluka kudihana kudi yena nikumwimenaku neyi wumu wawakwakudifukula indi, nikuzatisha chikupu wumi wetu kwesekana nankeñelu yaNzambi. (Luka 10:27) Komana dimuwunakwila?

14. Neyi tunakukeña kumukalakela Yehova haya nyaka, chumanyi chikwawu chinakukeñeka kubadika kuzata hohu mudimu?

¹⁴ Neyi tunakukeña kumukalakela Yehova haya nyaka, bayi chitwilisha kwikala nayitoñojoka yakwila nyidimu hohuku. Kapostolu Pawulu wamulejeli Timotewu, wamukalakeleli Yehova hadi yaaka yayivulu nindi: “Chikonkwanyi cheyi chikali chakudidizisha kwakama Nzambi.” (1 Timotewu 4:7 NW) Kwakama kwafumaña kumuchima wenzala nakusakilila kwamuntowu anakwakamawu. “Kwakama Nzambi” kwahanaña chikupu kalemesha nimpuhu kudi Yehova yomweni. Kwamwekeshaña kudinuña kwakuwahi nayena muloña wakusweja kumuhameka nijinjila jindi. Chatuleteshaña kwilisha antu ejima alemesheña ijina dindi nankashi. Neyi tunakukeña kwendela mwijina daYehova, Nzambi walala wumu hohu haya nyaka, twatela kumwakama Nzambi muwumi wetu.—Masamu 37:4; 2 Petulu 3:11.

15. Munjilanyi mutunateli kumwakamina Nzambi?

¹⁵ Hakwila nawu tumukalakeli Nzambi munjila yetejewa, chiña tudifukulaña kudi yena nkawindi, muloña  yena ‘hiNzambi wamukawu.’ (Kwidika 20:5) Hitunateli kumukeña Nzambi hampinji yoyimu tukeña adinu ituña datama, mwanekaliyi Satana nzambuku. (Yakoba 4:4; 1 Yowanu 2:15-17) Yehova weluka chikupu chinakukeña kwikalayi muntu wudi wejima. (Yeremiya 17:10) Neyi twakeña kuloña chikupu, yena wamonaña nawa wakatukwasha kumika kukala kwetu kwamafuku onsu. Hakutukwashaku naspiritu yindi yajila yañovu, watwilishaña tushindi kutama kwejima kunenzali mukanu kaayi. (2 Akorinda 4:7) Wakatukwashaku cheñi kuhemba chikuhwelelu chetu chawumi wahaya nyaka muparadisa hamaseki. Chumichi chinekali hikuchiñeja kwalema! Twatela kumwekesha kusakilila nankashi nikumukalakela Yehova Nzambi walala mukudikeñela, wukaletesha wumi wahaya nyaka kwikala waswayi.

16. Chumanyi chimwatela kukeña kwila, hamu nayihita yawantu amakwawu?

¹⁶ Yihita yawantu mukaayi kejima aneteji mutambikewa wañimbi yamasamu namuzañalu wasonekeli nindi: “Mulemeshenu Yehova nanami hamu, tutuumbakeshenu ijina dindi hamu.” (Masamu 34:3) Yehova nayitambiki nindi mwikali hakachi kamazaza anakuvula munyuza yejima anakumuhameka Yehova.

Kuhitulukamu kwaKuhanjeka

• Indi Yehova himuntu wamuchidinyi? Tunahetelimu ñahi kuhitila mukutiyisha chiwahi yililu yindi?

• Munjilanyi mutwatela kukwashila amakwawu kudiza chalala kutalisha hadi Nzambi?

• Chumanyi chinabombelimu mukwiluka ijina daYehova nikwendela mwijina dindi?

[Malwihu aKuzatisha haKudiza]

 [Nyevulu yidi hefu 14]

Yehova, mukukeña kwindi kwasweja, ‘wakakamununa chikasa chindi nakwikutisha yuma yejima yikweti muuya’