Muntu Owu Ashimwiniwu Wunsahu Kudi Atuprofwetu Ejima
Kapetulu 4
Muntu Owu Ashimwiniwu Wunsahu Kudi Atuprofwetu Ejima
1. Indi walala kutalisha kuchihandilu chaYesu henohu kanda yekali muntu, wunamwekeshidi kutalisha kuwubwambu windi naYehova?
“TATA wakeña Mwana, wamulejaña yuma yejima yelañayi yomweni.” (Yowanu 5:20) Wenowu wubwambu wawuwahi wadiluñishiliyi Mwana naTata yindi, Yehova! Wubwambu wamukamwihi watachikili hampinji yamuleñeliwu, makombaji ayaaka yakachindewaña henohu kanda yavwaliki muwuntu. Wadiña Mwana kaNzambi wasemuka nkawindi hohu, diyaleñeliwu hohu kudi Yehova yomweni. Yuma yejima yamwiwulu niyahamaseki ayileñeli kuhitila mudi iwu Mwana wawedi wasweja kukeñewa. (Akolose 1:15, 16) Wadiña cheñi neyi Izu daNzambi, hela Mukwakumuhoshelaku, kuhitila mudi Yena, nkeñelu yaNzambi dimwayimwekesheleliwu kudi amakwawu. Iwu Mwana waswejeli kukeñawu kudi Nzambi, wekalili muntu, Yesu Kristu.—Yishimu 8:22-30; Yowanu 1:14, 18; 12:49, 50.
2. Kushika kuchipimwinyi wuprofwetu waBayibolu kuwunatalishi hadi Yesu?
2 Henohu Mwana kaNzambi wawedi kanda yovwaliki munjila yachihayamisha neyi muntu, wuprofwetu wawuvulu wonenawu awusonekeli hadi yena. Kapostolu Petulu waheni wunsahu kudi Konelisu nindi: “Amushimunaña wunsahu kudi atuprofwetu ejima.” (Yililu 10:43) Mudimu waYesu awusonekeli muBayibolu chakwila nikañelu wamulejeli kapostolu Yowanu nindi: “Kushimuna kwashimunañawu Yesu hispiritu yawuprofwetu.” (Chimwekeshu 19:10) Wuprofwetu weniwu washimwini hatooka nawu diyi Mesiya. Wamwekesheli nyidimu yashiyashana yadi kukalakalayi hakushikija nkeñelu yaNzambi. Yuma yejimiyi yatela kwikala yakutuzañalesha chikupu makonu.
Yuma Yasolweli Wuprofwetu
3. (a) Muwuprofwetu wudi haKutachika 3:15, hinyi wunakwimenaku kapela, “mumbanda,” ‘nimbutu yakapela’? (b) Muloñadi chichinateli kwikalila chakuzañalesha nankashi kudi antu jaYehova ‘hakumuchika kapela kumutu’?
3 Wuprofwetu watachi wamuchidiwu awuprofweteli hanyima yakudikaña muEdeni. Yehova wamwilili kapela nindi: ‘Nukusha nkunyi mukachi keyeyi namumbanda, nimukachi kalubutu lweyi nilubutu lwindi; akakuchika kumutu, nineyi wakamuchika kukatutu.’ (Kutachika 3:15) Wuprofwetu weniwu wahosheli chikupu hadi Satana, owu wemeneniku kapela. “Mumbanda” hikuloñesha kwaYehova kwalala kwakwiwulu, kudi neyi mumbanda washinshika kudi yena. ‘Mbutu yakapela’ yinabombelimu añelu ejima niantu amwekeshaña yililu yaSatana, owu amudimbululaña Yehova niantu Jindi. ‘Kumuchika kapela kumutu’ kunakulumbulula kukisañana kwakukumishaku kwachiluwañimbi Satana, wamutwambilaña Yehova nawa waleteli yihuñu yayeni hadi muchidi wamuntu. Hanu dinu hinyi wabadikamu munilu ‘lubutu’ wamba kachikañana? Iyi “[hi]nsañu yakujinda” yinahembiwu hadi yaaka yayivulu.—Aroma 16:20, 25, 26.
4. Indi ndandanda yakuvwalika kwaYesu yakwashili ñahi kumwiluka nawu diyi Lubutu lwakaniniwu?
4 Chimwahitili yaaka 2,000 yansañu yawantu yanyaka, Yehova waheni wunsahu wukwawu. Wahosheli nindi Lubutu lwakenjila muchisaka chaAbarahama. (Kutachika 22:15-18) Ilaña ndandanda yinakulombola kuLubutu yadikushindamena hakutonda kwaNzambi bayi neyi kuchisaka chawantuku. Hela chakwila Abarahama wamukeñeli mwanindi Ishimeli, wavwalikilili mudi Haga, Yehova wamwilili nindi: “Chitiyañenu chami nakamukoleshelayi Isaka, yowu Isaka akakuvwelawu kudi Sara.” (Kutachika 17:18-21) Nkumininaku chitiyañenu chenichi achikolesheli bayi mudi wedi waIsaka weyala Esawuku, ilaña mudi Yakoba, mwafuma nyitaña 12 yawaIsarela. (Kutachika 28:10-14) Mukuhita kwampinji, achimwekesheli neyi Lubutu lwakavwalikila mumutaña waYuda, wamuchisaka chaDavidi.—Kutachika 49:10; 1 Kushindulula 17:3, 4, 11-14.
5. Hampinji yatachikili Yesu mudimu windi hamaseki, chumanyi chamwekesheli hatooka nawu wadiña Mesiya?
5 Yumanyi yikwawu yaheniwu kutalisha kukwilukewa kwaLubutu? Henohu kuchidi yaaka yakubadika ha 700 kumbidi, Bayibolu yateneni Betelemi neyi didi iluña mwakavwalikila Lubutu lwakaniniwu. Yamwekesheli cheñi nawu Lubutu lwatachikili dehi kuhanda kufuma tuhu “kunyaka yahaya nyaka,” kufuma tuhu mpinji yamuleñeliwu mwiwulu. (Mika 5:2) Mpinji yashikila yakumwekana kwindi hamaseki neyi Mesiya niyena ayishimwineñahu dehi kuhitila mudi kaprofwetu Danyeli. (Danyeli 9:24-26) Hampinji yamuwayishiliwu Yesu naspiritu yajila, nakwikala Muntu Wawayishewa waYehova, izu daNzambi yomweni datiyakeni kufuma mwiwulu dakumwilukisha nachu nawu hiMwanindi. (Matewu 3:16, 17) Lubutu alusolweli. Dichaletesheli Fwilipu kuhosha nachikuhwelelu nindi: ‘Tunawani muntu atenenuwu kudi Mosi muNshimbi, nikudi Atuprofwetu, diyi Yesu.’—Yowanu 1:45.
6. (a) Hanyima yakufwa kwaYesu, chumanyi chelukiliwu atumbanji twindi? (b) Hinyi ‘lubutu lwamumbanda,’ wabadika nawa kuchika mutu wakapela kunakulumbulukadi?
6 Chalondelelihu, atumbanji twaYesu elukili nawu nyikanda yayivulu yawuprofwetu yahosheli hadi yena yekalili mbadi yaNyikanda yajila. (Luka 24:27) Chalumbulukili chikupu nawu Yesu diyi ‘lubutu lwamumbanda,’ wabadika wamba kachika mutu wakapela, nikumukisañana Satana chikupu. Kuhitila mudi Yesu, yikaninu yaNzambi kutalisha kumuchidi wamuntu, niyuma yejima yitwafwilaña dimwakayishikijilawu.—2 Akorinda 1:20.
7. Kubombela hakwiluka Muntu owu ashimunawu muwuprofwetu, chumanyi chikwawu chakuhetesha chitwatela kwiluka?
7 Hakwiluka chumichi chinateli kutukwasha ñahi? Bayibolu yashimunaña hadi kalama wakuEtiyopiya wadiña nakutaña iwu wuprofwetu kutalisha kukwinza kwaNkuli nawa Mesiya. Hakudikomokela, dichi hakumwila mukwakushimwina Fwilipu nindi: “Kaprofwetu nateninyi, mwani?” Ilaña kalama hakumishili nsañu hampinji yamwakwiliwuku. Hanyima yakutiyilila nakanañachima kulumbulula kwaFwilipu, iyaliwu welukili nindi kutiyisha nikusakilila kwaniwu wuprofwetu kwakeñekeleña yena kwilahu chuma chimu. Wachimweni neyi watela kupapatishewa. (Yililu 8:32-38; Isaya 53:3-9) Komana ninetu dimutwelaña?
8. (a) Indi mulambu waAbarahama wesekeli kulambulayi Isaka wadiña nakwimenaku chumanyi? (b) Muloñadi Yehova chamulejeleliyi Abarahama nindi nyuza yejima yakawenaku kukooleka kuhitila muLubutu, nawa chumichi chinakundami ñahi nikudetu lelu dinu?
8 Toñojokaku cheñi hansañu yakukolesha yaAbarahama yakweseka kulambula Isaka, mwanindi wumu hohu wavweliyi naSara. (Kutachika 22:1-18) Chumichi chadiña nakwimenaku chuma chakeñeleña kwilayi Yehova—chakuhana Mwanindi wumu hohu: “Chaswejeliyi Nzambi kukeña mpata yamunu mwishina, weheni Mwanindi wumu hohu, kulonda muntu wukumukuhwelela aheti wumi wahaya nyaka, akabuli kunoña.” (Yowanu 3:16) Chumichi chinatwinki chikuhwelelu netu neyi chochaheniyi Yehova Mwanindi wumu hohu kulonda kushikija nkeñelu Yindi, cheñi Wamba ‘katulunjikilahu yuma yejima namakasa ayedi.’ (Aroma 8:32) Chumanyi chinakukeñeka kudi etu? Neyi chasonekawu haKutachika 22:18, Yehova wamulejeli Abarahama nindi nyunza yejima yakawenaku kukooleka kuhitila muLubutu, “nanochu [chovwahililiyi Abarahama] mwizu [daNzambi].” Anetu nawa twatela kumutiyilila Yehova niMwanindi: “Muntu wukukuhwelela Mwana wukweti wumi wahaya nyaka; hakwila muntu wabulaña kwovwahila Mwana hakamona wumiku, kuzuwa kwaNzambi kwashakama hadi yena.”—Yowanu 3:36.
9. Neyi twasakililaña hakuchiñeja kwawumi wahaya nyaka wunapeleshiwu kuhitila mumulambu waYesu, chumanyi chitwatela kwila?
9 Neyi tukusakililaña hakuchiñeja kwawumi wahaya nyaka wunapeleshiwu kuhitila mumulambu waYesu, twakakeña kwila yuma yinatulejiyi Yehova kuhitila mudi Yesu. Iyi nshimbi yinesakani nakukeña kutwamukeña Nzambi niantuñi netu. (Matewu 22:37-39) Yesu wachimwekesheli nindi kukeña kutwamukeña Yehova kukaletesha etu kutañisha amakwawu ‘kuhemba yuma yejima yanatulejiyi [Yesu].’ (Matewu 28:19, 20) Dichi tunakufwila kumwekesha kukeña kweniku kudi akwetu ambuña aYehova kuhitila ‘mukupompelaña hamu’ nawu mpinji yejima. (Aheberu 10:25; Aŋalija 6:10) Cheñi, hakumutiyilila Nzambi niMwanindi, bayi tutoñojoka netu akeñaña kuloña kudetuku. Aheberu 4:15 yahoshaña nawu hakwikala Kapristu ketu Muneni, watweshaña “kutiya wushona chitwazeyazeyañetu.” Ochichinekali chakukudeja, sweje-e neyi twinza kudi Nzambi mukulomba kuhitila mudi Kristu kulonda yotukwashiku kushinda mutwazeyazeyaña!—Matewu 6:12.
Mwekeshaku Chikuhwelelu Mudi Kristu
10. Muloñadi chikwabulila wamwinu chiña hohu mudi Yesu Kristu?
10 Hanyima yakuyilumbulwila aYudeya muchota cheneni muYerusalema nawu wuprofwetu waBayibolu washikijiweli hadi Yesu, kapostolu Petulu wakunkulwili namazu añovu nindi: “Hikwekala kuhanda mudi wacheñuku, muloña munu mwishina mukachi kawantu hiyanenkumu ijina dacheñi dakuhanda nachuku.” (Yililu 4:12) Hamuloña wakwila anyana kaAdama ejima hiyakwanshindi, kufwa kwawu hikwalema chakwila akuzatishi neyi ifutu danyiloña hadi muntuku. Ilaña Yesu wadiña waloña, nawa niwumi windi wadiña washikila kuwulambula. (Masamu 49:6-9; Aheberu 2:9) Walambwili kudi Nzambi ifutu dashikila chikupu mukulema nawumi waloña wajimbesheliyi Adama. (1 Timotewu 2:5, 6) Chumichi chatwenzulwila njila yakutambwilamu wumi wahaya nyaka mwituña daNzambi dadiha.
11. Lumbululaku mulambu waYesu chiwunateli kutuhetesha chikupu.
11 Ifutu danyiloña datwenzulwila cheñi njila yakutambwilamu kukoleka kukwawu nichakatataka. Chakutalilahu, hela chakwila tudi akwanshidi, mulambu waYesu wachipelesha kulonda twikali nachinleji chamuchima chitooka hamuloña wakwanakena nshidi. Kwanakeniku kunabadiki kuna kwayanakeneniwu aIsarela kuhitila munyilambu yawatunyama yakeñekeleña muNshimbi yaMosi. (Yililu 13:38, 39; Aheberu 9:13, 14; 10:22) Ilaña hakwila nawu atwanakeni chinakukeñewa kwiteja chalumbuluka chikupu ochitunakukeña mulambu waKristu: “Neyi tukwila netu hitukweti nshiduku, tunadidimbi, ninsañu yalala hiyekala mudetuku. Neyi tukwiteja mutunavulumuni, yena washinshika, waloña, wukutwanakeña nyiloña yetu nakututookesha kuheña kwejima.”—1 Yowanu 1:8, 9.
12. Muloñadi kupapatishewa mumenji chikunekalili chuma chalema hakwikala nachinleji chamuchima chachiwahi kudi Nzambi?
12 Indi akwanshidi atela kumwekesha ñahi chikuhwelelu mudi Kristu nimumulambu windi? Hampinji yelili antu amunkulakaji yamwaka watachi anekali dehi akakwitiya, achimwekesheli hatooka. Munjilanyi? Apapatisheweli. Muloñadi? Muloña Yesu washimwini nindi atumbanji twindi ejima atela kupapatishewa. (Matewu 28:19, 20; Yililu 8:12; 18:8) Muntu hatela kukañesha wuya hambidi windi neyi muchima windi wunamutiyishi kuwaha nachawaana chachiwahi chaheniyi Yehova kuhitila mudi Yesuku. Watela kuhimpa muwumi windi, nakudihana yomweni kudi Nzambi mukulomba, nikumwekesha kudihana kwindi kuhitila mukupapatishewa mumenji. Kuhitila mukumwekesha chikuhwelelu muniyi njila ‘dimwakulombelayi kudi Nzambi chinleji chamuchima chachiwahi.’—1 Petulu 3:21.
13. Neyi twiluka netu tunavulumuni, chumanyi chitwatela kwila naniyi nshidi, nawa muloñadi?
13 Eña, nihanyima yachipapatishu, yaaku yakuputola yekalaña kwoku. Twatela kwiladi neyi chinamwekani? Kapostolu Yowanu wahosheli nindi: ‘Nakuyisonekela yumiyi kulonda mubuli kuvulumuna. Neyi kudi muntu wunavulumuni, tukweti ihaku kwaTata, Yesu Kristu waloña. Yena diyi ifutu danyiloña yetu.’ (1 Yowanu 2:1, 2) Komana ichi chinayi mukwila nawu hela tukuputola nshidi yamuchidinyi, neyi tulomba kudi Nzambi netu yotwanakeni, nshidi yejima akuyanakena tahindi? Hichinatalishi mwenimuku. Chuma cheneni chikuletesha kwanakena hikubalumuka mumuchima chikupu. Wukwashu niwena watela kukeñewa kufuma kudi akulumpi hela antu ashikahu amuchipompelu chawiniKristu. Twatela kwiteja nikwiluka kutama kwazatika nikutiya kutama chikupu hanichi chuma kulonda twakashiku ñovu yayeni yakubula kufuntilahu. (Yililu 3:19; Yakoba 5:13-16) Neyi twila mwenimu, dihu dinu hitukukuhwelela wukwashu waYesu nikukoleshewa naluwi lwaYehova.
14. (a) Lumbululaku njila yalema munatuhetesheli mulambu waYesu. (b) Neyi chalala tukweti chikuhwelelu, chumanyi chitwatela kwila?
14 Mulambu waYesu wunenzunwini ‘kamukanka kanyanya’ njila yakwikala nawumi wahaya nyaka mwiwulu, chibalu chamuchiyedi chalubutu lunashimuniwu haKutachika 3:15. (Luka 12:32; Aŋalija 3:26-29) Wunenzunwini cheñi mabiliyoni amuchidi wawantu amakwawu njila yakwikala nawumi wahaya nyaka muparadisa hamaseki. (Masamu 37:29; Chimwekeshu 20:11, 12; 21:3, 4) Wumi wahaya nyaka ‘hichamukunkulu chaNzambi chahanañayi . . . mudi Kristu Yesu Mwanta wetu.’ (Aroma 6:23; Aefwesesa 2:8-10) Neyi tudi nachikuhwelelu munichi chamukunkulu nawa twahamekaña munjila muyachihaniniwu, twamba kachimwekesha. Kushinshika hakuwaha kunamuzatishiwu Yesu kudi Yehova hakwila nkeñelu Yindi nichichinekalili chalema kudetu kulondela mumahaji aYesu, twakelisha mudimu wawiniKristu kwikala mudimu wasweja kulema hanyidimu yejima mukuhanda kwetu. Chikuhwelelu chetu chikamwekena hakwiteja kulejaku amakwawu hachamukunkulu chachiwahi kufuma kudi Nzambi.—Yililu 20:24.
15. Indi kwikala nachikuhwelelu mudi Yesu Kristu kunateli ñahi kukwatankesha?
15 Chikuhwelelu chamuchidiwu chatukwantakeshaña chiwahi! Hamuloña wanichi chikuhwelelu, twaswijewaña kwakwihi naYehova, nikudi Mwanindi, nawa nikudi wumu namukwawu mukachi kachipompelu chawiniKristu. (1 Yowanu 3:23, 24) Chatukojejaña kwikala namuzañalu netu Yehova naluwi lwindi namwinki Mwanindi “ijina dabadika majina ejima [kushiyahu tuhu ijina daNzambi]; kulonda mwijina daYesu manuñu ejima akafukami, niamwiwulu niahamaseki, niamwishina damaseki; nimadimi ejima aketeji nawu Yesu Kristu diyi Mwanta, kulonda kulemesha Nzambi Tata.”—Afwilipi 2:9-11.
Kuhitilukamu kwaKuhanjeka
• Mesiya chamwekeniyi, muloñadi ana akuhweleleli Mwizu daNzambi chikupu chiyamwilukilililiwu?
• Yumanyi yitwatela kwila hakumwekesha netu twasakililaña hamulambu waYesu?
• Hijinjilanyi mulambu waYesu muwunatuhetesheli dehi? Indi chumichi chatela kutukwasha ñahi neyi hitukulomba kudi Yehova netu yotwanakeni nshidi?
[Malwihu aKuzatisha haKudiza]
[Mwevulu wudi hefu 36]
Yesu wayilejeli atumbanji twindi nindi atela kuleja amakwawu kuhemba nshimbi jaNzambi
