Mwakamenu Nzambi Hetala
Kapetulu 17
Mwakamenu Nzambi Hetala
1. Indi kuzatisha wunlomboli wafumaña Mwizu daNzambi wunakwashi ñahi maluwi?
YEHOVA diyi Watachikili maluwi, nawa Izu dindi dahanaña wunlomboli wawuwahi nankashi wakulombwelamu yisaka. Hamuloña wakuzatisha iwu wunlomboli, antu amavulu anawahishi maluwi awu chiwahi. Chinawahi hakumona nawu, antu amakwawu adiña nakushakama hohu hamu anasonekeshi maluwi awu munshimbi. Amakwawu analeki kwila wuvumbi nawantu abula kwikalawu nawu mumaluwi. Amayala akwamadombu adiña nakutukola añodi jawu nianyanawu anadizi kwikala naluwi niwushona.
2. Yumanyi yinakukeñeka munshakaminu yachisaka?
2 Nshakaminu yachisaka chawiniKristu yabombelamu yuma yayivulu, chidi neyi chitwamonaña kushakama haya nyaka mumaluwi, yuma yitwelaña hakushikija nyidimu yetu muchisaka, nichitwahembaña amuchisaka. (Aefwesesa 5:33–6:4) Hela chakwila tweluka chahoshaña Bayibolu hansañu yanshakaminu yachisaka, chikwikala chalema cheñi kuzatisha kufumba kwaBayibolu. Kwosi niwumu hadetu wukukeña kwikala neyi ana antu atanyishiliyi Yesu hamuloña wakutondolwela nshimbi jaNzambi. Adiña nakudidimba nawu kudihana hohu munsakililu chadiña chashikila. (Matewu 15:4-9) Hitunakukeña kudifwikija neyi twamwakama Nzambi henohu tunakukañanya kukumwekesha mumataletuku. Ilaña tunakukeña kumwekesha nawu twamwakamaña Nzambi muwalala muloña ‘hikuheta kwakweni.’—1 Timotewu 5:4; 6:6; 2 Timotewu 3:5.
Maluwi Akashimbula Yaaka Yiñahi?
3. (a) Chumanyi chinakumwekena maluwi amavulu, nawa chumanyi chitwatela kufwila kwila? (b) Kuzatisha Bayibolu yeyi, akulaku malwihu anatanjikiwu mwishina daniyi parakarafu.
3 Maluwi amavulu anakumana chikupu. Adisumbula amakwawu anashakami hamu hadi yaaka yayivulu afuukulañahu kudiseña nakusumbula hela kusumbuka namuntu wacheñi. Cheñi nawa hichinekali chakuhayamisha hakutiya nawu atwansi adisumbula anambuki hanyima yakwikala mumaluwi hakapinji kantesha hohuku. Hichikweti muloña nayuma yelañawu amakwawuku, twatela kumutiyisha Yehova kuwaha. Ichi dinu twayenu tushinshiki hamalwihu analondelihu nijinsona kulonda tutali chahosha Izu daNzambi hansañu yakushakama haya nyaka mumaluwi.
Neyi iyala namumbanda anadisumbuli, atela kukuhwelela kushakama hamu yaaka yiñahi? (Maku 10:6-9; Aroma 7:2, 3)
Chumanyi chinateli kukojeja kudiseña nakwikala wasubuka kusumbula cheñi kunetejuwu kudi Nzambi? (Matewu 5:31, 32; 19:3-9)
Indi Yehova watiyaña ñahi hansañu yakudiseña kwabula kwitejewa Mwizu dindi? (Malaki 2:13-16)
Komana Bayibolu yeteja kwambuka neyi diyi njila yakumanishilamu kukala kwamumaluwi? (1 Akorinda 7:10-13)
Muloña wamuchidinyi wunateli kwitejelawu kwambuka? (Masamu 11:5; Luka 4:8; 1 Timotewu 5:8)
4. Muloñadi maluwi amakwawu chashimbwilañawu?
4 Maluwi amakwawu ashimbulaña muloña adisumbula ashakamaña hamu. Muloñadi? Kuhembela sampu wonsu wawu anapami dehi mwaka dinu adisumbuli dichuma chalema. Ilaña chekala chalema kuwana muntu wakeña yuma yiwatiyaña kuwaha nawa yiwunatweshi kuhosha nindi mukukasunuka. Chuma chasweja kulema, hikuwaana muntu wamukeña Yehova nawa walemeshaña Izu dindi neyi dihawushindamenu wakumanishilamu kukala. (Masamu 119:97, 104; 2 Timotewu 3:16, 17) Muntu wamuchidowu hakekala nayitoñojoka yakwila nawu neyi yuma kwenda chiwahi nehi, hikwakekala kwambuka hela kudiseñaku. Hakazatisha yiluwa yamwinikwindi kwikala njila yakulekelamu nyidimu yinduku. Ilaña wakomika kukala kwejima nawa wakawaana njila yakukwimanishilamu.
5. (a) Indi kumwovwahila Yehova kwazataña mudimwinyi mumaluwi? (b) Hela chakwila kunamwekani ikañesha, ihetanyi dinateli kwinza hamuloña wakukakela kunshimbi jaYehova?
5 Satana wahoshaña nindi neyi tukaba, tukuleka nshimbi jaYehova. (Yoba 2:4, 5; Yishimu 27:11) Ilaña aYinsahu jaYehova amavulu ayandaña hamuloña wakwila amwini kwawu ayikañeshaña, hela chochu hiyaleka chikaninu chamaluwi awuku. Atwalekañahu nakumwovwahila Yehova nikuhemba nshimbi jindi. (Matewu 5:37) Amakwawu omikaña ekalaña namuzañalu wakudibomba hamu nawakwawu amumaluwi hakumukalakela Yehova hamu—hela tuhu hanyima yakuyikañesha hadi yaaka yayivulu! (1 Petulu 3:1, 2) Hakwila eniKristu akweti eni kwawu abulaña kumwekesha chinjikijilu chakuhimpa hela akweti enikwawu ayitemuka hamuloña wakwila nawu amukalakelaña Yehova, awa niwena eluka nawu akayikiswila hamuloña wakuhana wunsahu wakumwakama Nzambi hetala.—Masamu 55:22; 145:16.
Muntu Wejima Watela Kuzata Mudimu Windi
6. Hakwila nawu mwikali namaluwi amawahi, ntanjikilwinyi yatela kulemeshewa?
6 Hela chochu, kwikala namaluwi amawahi chakeñekaña yuma yayivulu kubadika kushakama hohu hamu. Chuma chalema kudi muntu wejima wamumaluwi hikwikala nakalemesha kantanjikilu yaYehova yawumutu. Chumichi chaleteshaña yuma kwenda chiwahi nikwikala nayitoñojoka yakudikiña hetala. Ha 1 Akorinda 11:3, twatañañahu nawu: “Mutu weyala diyi Kristu; mutu wamumbanda diyi iyala; mutu waKristu diyi Nzambi.”
7. Indi wumutu anateli kuwuzatisha ñahi muchisaka?
7 Wamona chuma chatachi chahosha iyi vasi? Eña, iyala wudi wejima wukweti Mutu, Kristu, kwatela kwovwahilayi. Chumichi chinayi mukwila nawu iyala watela kuzatisha wumutu windi munjila yamwekeshaña yililu yaYesu. Kristu wamwovwahilaña Yehova, wachikeña chipompelu nankashi, nawa wachakamenaña. (1 Timotewu 3:15) ‘Wadihenenihu yomweni kuchikoola.’ Yesu hadisambañaku nawa wakamenaña, ilaña ‘wawunda nawa wadizoza mumuchima.’ Ana enzaña kudi yena nawu ayilomboli ‘amonaña kunooka munyichima yawu.’ Iyala neyi wukuhemba chisaka chindi muniyi njila, dikwila nawu nakumwekesha nawu wamwovwahilaña Kristu. Mumbanda wawiniKristu niyena chamuwahilaña nikumukwashaku kuzatila hamu nanfumwindi nikwovwahila wumutu windi.—Aefwesesa 5:25-33; Matewu 11:28, 29; Yishimu 31:10, 28.
8. (a) Muloñadi mumatala amakwawu chimwamwekenaña nawu kuzatisha jinjila jawiniKristu kwamukunkulwayi? (b) Chumanyi chitwatela kwila neyi chuma chamuchidiwu chitumwekena?
8 Hela chochu, kukala kunateli kumwekana. Hadaha yililu yakubula kukeña kulombolewa kudi amakwawu yaswejeli kupama henohu muchisaka kanda mwikalihu niwumu watachikili kuzatisha nshimbi jamuBayibolu. Kulomba chuma munjila yayiwahi niyililu yakukeña kunateli kumwekana neyi kwamukunkulwayi. Tuneluki netu, Bayibolu yahoshaña nawu tuleki “ndombu, nimapumba, nikutukana.” (Aefwesesa 4:31) Ilaña neyi amakwawu muchisaka anakumwekana neyi hiyanelukihu chidi chejimaku, chumanyi chimwatela kwila? Eña, Yesu hembujoleli ana amutiyishileña woma nikumutukolaku, ilaña washindameneni hadi Tata yindi. (1 Peter 2:22, 23) Dichi neyi kukala kunamwekani mwitala, mwekeshenu wunsahu wakumwakama Nzambi kuhitila mukulomba kudi Yehova kulonda yoyikwashi kubadika kuzatisha jinjila jakwituña.—Yishimu 3:5-7.
9. Chatela awaneña yiluwa, amayala amavulu awiniKristu anadizi kwiladi?
9 Mwahitaña mpinji hakwila nawu kuhimpa kumwekani, ilaña kufumba kwaBayibolu kwazatikaña chikupu neyi wukuzatisha chiwahi nawa nakashinshi. Amayala amavulu enzaña nakuchiwana neyi maluwi awahilañaku neyi chakwila eluka chikupu chahembañayi Kristu chipompelu. Chipompelu chenichi chatuñewa nawantu abula kuloña. Ilaña Yesu wachikeña, wachimikila chakutalilahu chachiwahi, nawa wazatishaña jiNsona hakuchikwasha kukulilaku. Waheni wumi windi kukoola chipompelu. (1 Petulu 2:21) Chakutalilahu chindi chinakwashiku amayala awiniKristu amavulu kuzata chiwahi neyi nyitu yayisaka nikuhana wukwashu chikupu mumaluwi awu. Chumichi chaletaña yuma yayiwahi kubadika kuwanaña hohu kwayiluwa hela kukaana kuhosha.
10. (a) Munjilanyi munateliyi iyala hela mumbanda—hela tuhu muntu wejima wahoshaña nindi himwiniKristu—kukoleshelayi chihandilu chawamakwawu hetala? (b) Chumanyi chatela kuzatika kulonda kuwahishaku chihandilu?
10 Indochu neyi iyala hashaku maana kuyuma yakumujimba yakeñekaña kuchisaka chinduku hela hakeñaña kuloñesha kuhanjeka kwaBayibolu nachisaka ninyidimu yikwawuku? Indi neyi mumbanda hazatilaña hamu nikumwekesha kwovwahila kwawuNzambuku? Amakwawu amanishaña kukala kuhitila mukuhanjeka nachisaka mukalemesha kutalisha hakukala kukwetuwu. (Kutachika 21:10-12; Yishimu 15:22) Hela chakwila yakufumamu hidiyi twakuhwelelaku, muntu wejima watela kuwahishaku nshakaminu hetala kuhitila mukumwekesha nyikabu yaspiritu yaNzambi mukuhanda kwetu kwejima, nikumwekesha kwakamena kudi antu ejima amuchisaka. (Aŋalija 5:22, 23) Chikaleñesha yuma kuwahilaku bayi kuhembela nawu muntu mukwawu yazatilihuku, ilaña kuhitila mukuzata mudimu wetu, chumichi chikamwekeshaña nawu tunakumwakama Nzambi.—Akolose 3:18-21.
Kwakuwana Wukwashu
11, 12. Chumanyi chinahaniyi Yehova chakutukwashaku kwikala nanshakaminu yayiwahi muchisaka?
11 Antu ayaña kwakuvulu nakutambula maana hansañu yayisaka yawu. Ilaña tweluka netu Izu daNzambi dikweti maana amawahi chikupu, nawa tudi amuzañalu hakwikala mukuloñesha kwindi kunakumwekana, Nzambi watukwashaña kuyizatisha. Komana wunakuhetelamu chikupu muniwu wukwashu?—Masamu 119:129, 130; Mika 4:2.
12 Kubombela hakuwanika kukupompa kwachipompelu, komana wambulahu mpinji yakudiza kwaBayibolu kwachisaka mpinji yejima? Yisaka yelaña mwenimu yinateli kuzatila hamu nakwikala anuñañana mukudifukula kwawu. Nshakaminu yachisaka chawu yakisulewaña hampinji yinakuzatishawu Izu daNzambi mukuhanda kwawu.—Kuhituluka 11:18-21.
13. (a) Neyi tukweti malwihu anakundami kunsañu yachisaka, kudihi kakavulu kutunateli kuwana wukwashu? (b) Chumanyi chitwatela kumwekesha mukufuukula kwejima kutunakufuukulahu?
13 Hadaha wunateli kwikala namalwihu kutalisha kunsañu yamuchisaka. Chakutalilahu, wunateli kudihula neyi, kukeheshaku kuvwala anyana kwakuwahi? Komana kufumisha ivumu kwetejewa? Neyi mwana hanakushaku maana nankashi kunsañu yakuspirituku, chinakukeñeka kuzata kushika kuchipimwinyi mwaka yatachiki kudifukwila hamu nachisaka? Malwihu amavulu amuchidiwu ahoshewa munyikanda yasonekawu kudi aYinsahu jaYehova. Dizaku kuzatisha nyikanda yakwashaña kudiza Bayibolu, kushilahu niindekisi kulonda muwani wukwashu. Neyi himukweti nyikanda yinashimuniwu muindekisuku, keñakeñenu mulayibulali yaHetala daWanta. Hela neyi wukweti nyikandiyi hakompyuta yeyi. Wunateli kwihula malwihweyi kudi eniKristu awamayala niambanda apama dehi. Ilaña bayi wukuhwelela ñakwilu yamalwihu ejima kwikala yakwiteja hela yakukaanaku. Kakavulu watela kudifuukwila halweyi hela namwinikweyi. Dichi, fuukulaku yitoñojoka yinakumwekesha nawu wamwakamaña Nzambi bayi neyi kudi antu amavulu hohuku, ilaña nihetala.—Aroma 14:19; Aefwesesa 5:10.
Kuhitulukamu kwaKuhanjeka
• Indi kumwovwahila Yehova kunakukeñekeladi hakwikala washinshika kudi muntu wamumaluwi?
• Neyi tudi mukweseka hamuloña wakukala muchisaka, chumanyi chikatukwashaku kwila chuma chakumuzañalesha Nzambi?
• Hela chakwila amakwawu muchisaka anakuluwañesha, chumanyi chitwatela kwila hakuwahishaku nshakaminu?
[Malwihu aKuzatisha haKudiza]
[Mwevulu wudi hefu 155]
Wumutu weyala watela kumwekesha yililu yaYesu
[Mwevulu wudi hefu 157]
Kwikala nakudiza kwaBayibolu mpinji yejima nachisaka kwakwashaña kwikala anuñañana
