Kapetulu 21

 Nkeñelu yaYehova Yinashikijewi Mukulema

1, 2. (a) Indi Yehova wukweti nkeñelwinyi kutalisha kuyileñaleña yindi yikweti maana? (b) Anyi ashiliwu hakachi kachisaka chaNzambi chadinuña chawakwakudifukula?

YILEÑALEÑA yejima yikweti maana yanuñañana mukudifukula kudi Nzambi walala wumu hohu nawa wejima wawu adiluñishaña kusubuka kwakwikala anyana kaNzambi—iyi diyi nkeñelu yaNzambi yikweti kukeña. Cheñi, dichuma chafwilañawu nankashi antu akeña kuloña.

² Yehova watachikili kushikija iyi nkeñelu yalema hampinji yatachikiliyi mudimu wakuleña. Chileñaleña chasambililiyi kuleña wadiña Mwanindi wunekali “kutoñeka kwalubanji lwakulema kwaNzambi, diyi wamufwana chikupu mwekalilayi” kufuma tuhu hakusañuka kwindi. (Aheberu 1:1-3) Iwu Mwana wadiña wambukaku, amuleñeli kudi Nzambi yomweni. Nkumininaku, kuhitila mudi iwu Mwana dimwaleñeleluwu yuma yejima: kutachikila kudi añelu amwiwulu, kulondelahu niantu hamaseki. (Yoba 38:6; Luka 3:38) Yileñaleña yejimiyi yatuñili chisaka chimu chakuleña kwejima. Wejima wawu, Yehova wadiña Nzambi yawu, Mwanta Wakuleña Kwejima, nawa Tata yawu wenzala kukeña.

3. (a) Chumanyi chitwaswana wejima wetu kufuma kudi anvwali jetu atachi? (b) Chumanyi chachiwahi Yehova chayiloñesheleliyi anyana kaAdama?

³ Chelili anvwali jetu atachi ayinki muloña wakufwa  hamu neyi akwakuvulumuna mumushikila, ayifumishili muEdeni nawa ayikaanini kudi Nzambi. Hiyekalili cheñi hakachi kachisaka chindi chakuleña kwejimaku. (Kutachika 3:22-24; Kuhituluka 32:4, 5) Wejima wetu tuyanyanawu, dichi twasemuka nachaaku chakukeña kwila nshidi. Ilaña Yehova welukili nindi amakwawu hadi anyana kaAdama niEvu akakeña kuloña. Dichi mukudikeñela Waloñesheli njila mwatela kuwanina awa antu ‘kusubuka kwasweja kwalubanji lwakulema kwawanyana kaNzambi.’—Aroma 8:20, 21.

Isarela Najimbeshi Wuselewa Windi

4. Kukolekanyi Yehova kwayinkeliyi aIsarela akushankulu?

⁴ Mukuhita kwayaaka 2,500 kufuma hamuleñeluwu Adama, Yehova waheni kukoleka kudi antu amakwawu kwakwikala nawubwambu wabadika naYena. Watondeli aIsarela akushankulu kwikala antu jindi nawa wayinkeli Nshimbi jindi. (Kutachika 12:1, 2) Wayilishili kwikala muza nawa wayizatishili kwesekeja nankeñelu yindi. (Kuhituluka 14:1, 2; Isaya 43:1) Hela chochu, achidiñi muwuduñu wanshidi nikufwa, dichi hiyadiluñishili kusubuka kwakulema kwalubanji kwadiluñishiluwu Adama niEvu hatachiku.

5. Indi aIsarela ajimbesheli ñahi wubwambu wawu wabadika naNzambi?

⁵ Hela chochu, aIsarela adiña nawuselewa kudi Nzambi. Adiña cheñi namudimu wakumulemesha Yehova hamu neyi Tata yawu nikuzatila hamu nankeñelu yindi. Yesu wakonkomweneni hakulema kwakukalakala iwu mudimu. (Matewu 5:43-48) Dichi muza wawaIsarela wakañenyi kwila mwenimu. Henohu ana aYudeya ahosheleña nawu ‘tukweti Tata yetu wumu, yowu Nzambi,’ Yesu wahosheli nindi yililu yawu nispiritu yamwekesheli nawu nhoshelu yeniyi yakutwamba. (Yowanu 8:41, 44, 47) Mu 33 C.E.,  Nzambi wafumishilihu Lushimbi, niwubwambu wabadika nawaIsarela wamanini. Komana ichi chayili mukwila nawu antu hiyakekalahu nakukoleka kwakwikala nawubwambu naNzambuku?

Kupompesha “Yuma yamuMawulu”

6. Indi ‘wunlomboli’ washimwiniyi Pawulu haAefwesesa 1:9, 10 wukweti nkeñelwinyi?

⁶ Kapostolu Pawulu wahosheli nindi amakwawu mukachi kamuchidi wawantu atela kudiluñisha wubwambu wabadika naNzambi. Chakutalilahu, kutalisha kuntanjikilu yaYehova yakwila nawu ana akumwekesha chikuhwelelu anateli kwikala ayilolu amwitala Dindi. Pawulu wasonekeli nindi: “[Nzambi] hakutuleja nsañu yajindiliwu mumuchima windi, mwatiyililiyi kuwaha, [wunlomboli] mudi Kristu, nichamba kawanina nyaka; kulonda yuma yamumawulu niyahamaseki yejima yakahwili mudi Kristu.” (Aefwesesa 1:9, 10) Iwu ‘wunlomboli’ washindamena hadi Yesu Kristu. Mudi yena, dimwanayileteliwu antu kwikala nañimenu yetejewa kumesu aNzambi. Hakachi kawu, antu antesha hohu akweti chikuhwelelu chakushakama kwiwulu. Antu amavulu nankashi akashakama hamaseki haya nyaka.

7. “Yuma yamumawulu” hiyanyi?

⁷ Chatachi, kutachika haPentekosta 33 C.E., kashinshi akiheni kudi “yuma yamumawulu,” dikwila nawu, ana akekala answana naKristu muWanta wamwiwulu. Hamuloña wakwikala nachikuhwelelu mukulema kwamulambu waYesu, dimwayitenenenuwu nawu aloña kudi Nzambi. (Aroma 5:1, 2) Mukuhita kwampinji, aYudeya niaJentili ayibombelelimu, nawa “yuma yamumawulu” yikushika ku 144,000. (Aŋalija 3:26-29; Chimwekeshu 14:1) Hakachi kawu ashalahu hohu diwu achidi hamaseki.

 Kupompesha ‘Yuma Yahamaseki’

8. ‘Yuma yahamaseki’ hiyanyi, nawa wubwambu wawu naYehova wudi ñahi?

⁸ Wulomboli wowumu diwunakupompesha ‘yuma yahamaseki.’ Yihita yawantu makonu anakuyipompesha nachikuhwelelu chakushakama hamaseki haya nyaka. Kuzatila hamu nawanswana ashalahu aWanta, atiyakeshaña ijina daYehova nikunyamuna kudifukula kwindi. (Isaya 2:2, 3; Zefwaniya 3:9) Niwena amutenaña Yehova nawu “Tata” muloña amwiluka nawu diyi nsulu yawumi. Nawa adiluñisha hakwikala nawuselewa kumesu indi kuhitila mukwikala nachikuhwelelu mumashi apwekesheliyi Yesu. (Chimwekeshu 7:9, 14) Dichi chineli achidi kanda amaninini, kwilukewa hamu neyi anyana kaNzambi chikupu kwakekalaku kumbidi.

9. Kushiikanyi Aroma 8:21 yikunahembeli muchidi wamuntu?

⁹ Awa akweti kuchiñeja kwakushakama hamaseki chayinu mpinji anakutalila mpinji yikela yileñaleña yawantu ‘akayifumishi muwuduñu wakutoka.’ (Aroma 8:21) Kupulwisha kweniku kukatachika hanyima yakwila Kristu ninjita yindi yakwiwulu analeti dehi ihuñu deneni kunsa yachu kuhitila mukukumisha naAmagedoni. Ichi chikalumbuluka kujilumuka kwetuña datama dejima daSatana, nakusinsishahu nkisu yaNyaka Ikombakaji Dimu Dakuyula kwaKristu muñovu jaWanta.—Chimwekeshu 19:17-21; 20:6.

10. Ambuña aYehova akemba kaminanyi kakushimeka nachu?

¹⁰ Wenowu muzañalu wukekalaku hampinji yikadibombawu ambuña aYehova hamaseki hakwimbujola mazu awambuñindi amwiwulu adikuwaña namuzañalu nawu: “Eyi Yehova Nzambi, Watwesha yejima, nyidimu yeyi yeneni yakuhayama! Muwayaña mwaloña mwalumbuluka, eyi Mwanta wahaya nyaka. Wukubula kwakama nakulemesha ijina deyi eyi Yehova, hinyi? Muloña eyi yeyi  kanka weyi, yeyi wajila hohu. Muloña nyuza yejima yakenza nakudifukula kudeyi naniyi nyidimu yaloña yiwunamwekeshi dehi.” (Chimwekeshu 15:3, 4) Eña, ambuña aYehova ejima akadinuña mukudifukula Nzambi walala wumu hohu. Niafu niwena akayisañula nawa akayinka kukoleka kwakutiyakesha mazwawu nakumushimeka Yehova.—Yililu 24:15.

Kusubuka Kwakuwahi Kudi Kumbidi

11. Kusubukanyi kwakuwahi kwakadiluñishawu antu akapuluka ihuñu deneni?

¹¹ Hanyima yehuñu deneni dikamana naAmagedoni, dinawahishi dehi ituña datama, Satana Diyabolu hakekala cheñi “nzambi wampata yamakonu[ku].” Akwakudifukula aYehova hiyakalwishaña cheñi nayuma yatama yaletañayi Satanaku. (2 Akorinda 4:4; Chimwekeshu 20:1, 2) Nsakililu yakutwamba hiyakamutwambila cheñi Yehova nakwikala chuma chakwambula nshakaminu yawantuku. Ambuña aNzambi walala hiyakayiheñeshela cheñi wuñanji hela kuyidila hanyitu kudi nfulumendi jawantuku. Kwenoku kusubuka kwakadiluñishawu ambuña aNzambi!

12. Munjilanyi mukalubukilawu antu ejima kunshidi nikuyuma yafumañamu?

¹² Chakela “Mwana kamukoku waNzambi, mukwakufumisha nshidi yawantu ampata yamunu mwishina,” Yesu wakazatisha kulema kwamulambu windi kulonda kujima nachu nshidi jamuchidi wamuntu. (Yowanu 1:29) Chadiñayi Yesu hanu hamaseki nakuyanakena antu nshidi, wokileña antu ananakeniyi neyi chinjikijilu chakuyanakena. (Matewu 9:1-7; 15:30, 31) Munjila yoyimu, Yesu Kristu hamu neyi Mwanta waWanta waNzambi wakwiwulu, wakooka amputamesu, atumama, anjika matu, ayifwayi, ayizaluki, niantu ejima akweti yikatu yashiyashana. (Chimwekeshu 21:3, 4) “Lushimbi lwanshidi” akalwifumishahu  kulonda yitoñojoka ninzatilu yawantu ovwahila ejima yikekali yakuzañalesha, kudi awenawu nikudi Nzambi. (Aroma 7:21-23) Kushika kukukuma kwaNyaka Ikombakaji, akayilisha kwikala antu amaninina, ‘muchifwanisha nawa neyi chekalayi’ Nzambi walala wumu hohu.—Kutachika 1:26.

13. Hakumana kwaChiyulu chaNyaka Ikombakaji, chumanyi chakelayi Kristu, nawa chumanyi chikafumamu?

¹³ Chikela Kristu nelishi dehi yitoñojoka yamuchidi wamuntu kwikala yamaninina, kufumahu wukalubula wanta wamudishiliwu kudi Tata yindi hakukoña iwu mudimu: “Hakahanayi Kristu wanta kudi Nzambi, yowu Tata; hamba kela nanoñeshi dehi kuyula kwejima, niwanta wejima, niñovu jejima. Chiña akayula yule-e, nichamba kadatayi ayilumbu [jaNzambi] ejima.” (1 Akorinda 15:24, 25) Chiyulu chaWanta hadi Nyaka Ikombakaji chakashikija chikupu nkeñelu yachu. Dichi hikwakekala cheñi iyi nfulumendi yabula kulema kwikala hakachi kaYehova nimuchidi wamuntuku. Chikela nshidi nikufwa akayifumishahu chikupu niantu anayikuuli dehi, ninkeñelu yaYesu yakwikala Nkuli yikamana. Bayibolu yalumbulula nawu: “Henohu niyomweni Mwana nawa wakamwovwahila Mukwakwovwahisha yuma yejima; kulonda Nzambi akekali diyi hohu kanka windi chikupu [kudi ejima].”—1 Akorinda 15:28.

14. Antu ejima akekala awanina akayihana kuchumanyi, nawa muloñadi?

¹⁴ Kufumahu, antu akekala awanina akayinka kukoleka kwakumwekesha nawu anatondihu kumukalakela Nzambi walala wumu hohu haya nyaka. Henohu kanda ayilishi kwikala anyana kaNzambi chikupu, Yehova wakayinka ana akekala awanina mukweseka kwakumishaku. Satana niandemoni jindi akayifumisha mwikela. Chumichi hichikaleta wubanji wahaya nyaka kudi ana amukeña Yehova chalalaku. Dichi antu akabula kwovwahila nakudiñija  awenawu mukudikaña naYehova, akayijilumuna haya nyaka, kushilahu nichiluwañimbi watachi niandemoni jindi.—Chimwekeshu 20:7-10.

15. Nshakaminu yamuchidinyi yikekalaku cheñi hakachi kayileñaleña yejima yikweti maana?

¹⁵ Kufumahu, Yehova dihakayilishayi kwikala anyanindi ejima anelishiwu kwikala awanina akwashileña wanta waNzambi hampinji yakuna kweseka kwamakumishilu. Kufuma hayina mpinji nakutwalekahu, akadiluñisha chikupu kusubuka kwakulema kwawanyana kaNzambi nakwikala hakachi kachisaka chaNzambi chakuleña kwejima. Yileñaleña yakuspiritu niyawantu mwiwulu nihamaseki yikweti maana yakanuñañana cheñi mukudifukula kudi yena hamu neyi Nzambi walala wumu hohu. Nkeñelu yaYehova yakashikijewa mukulema! Komana wunakukeña kwikala hakachi kachisaka chamuzañalu, wahaya nyaka chakuleña kwejima? Neyi dimu, tunakukonkomweni kutiyilila chinakuhosha Bayibolu ha 1 Yowanu 2:17: “Mpata yamunu mwishina yikuhita, nikufwila kwayu kwatama, hakwinza muntu welaña muchima waNzambi [wakashakama] haya nyaka.”

Kuhitulukamu kwaKuhanjeka

• Henohu kudikaña kanda kumwekani muEdeni, wubwambwinyi wadiñawu nawu akwakudifukula aYehova nayena?

• Mudimwinyi wukwetiwu ambuña aNzambi?

• Anyi akekala anyana kaNzambi, nawa chumichi chinakundami ñahi kunkeñelu yaYehova kutalisha kukunuñañana kwakudifukula?

[Malwihu aKuzatisha haKudiza]

 [Mwevulu wudi hefu 190]

Antu ovwahila akadiluñisha wumi muparadisa yaheseki dejima