Kapetulu 16

‘Swejenu Kukeñañana Mukachi Kenu’

1. Kakavulu chumanyi chayitiyishaña kuwaha enyi enzaña kukupompa kwawaYinsahu jaYehova?

ANTU neyi enza kukupompa kwawaYinsahu jaYehova katachi, kakavulu azañalalaña nakukeña kwamwekeshañawu kwenakuna. Kukeña kweniku akwimwonaña kuhitila mukuyitambwila nimukuhanjeka kwakuwahi. Iku kukeña akwimonaña nikudi enyi enzaña kukupompa kwetu kweneni. Mukwakushimuna nsañu wumu wasonekeli mazu hansañu yakupompa kweneni nindi: ‘Kwosi wunakuleta ditavu hamuloña wakunwa yitumbu yashetana hela kusheta walwa. Kwosi anakubideka nikukaloka. Kwosi kudishinjeka. Kwosi kudinyika. Kwosi anakuhosha chatama hela kushiñana. Kwosi anakusenseka hela kutukana. Kwosi anakunwa makanya. Kwosi wukombi. Kwosi anakunatola yifwoyu hanji. Chadiña chuma chekomwesha chikupu.’ Yuma yejimiyi yinakumwekesha kukeña kwabulaña ‘kwila chuma chabula kutelaku, hikwakwokwelaña kwindi hohuku.’—1 Akorinda 13:4-8.

2. (a) Mukuhita kwampinji, chumanyi chatela kumwekana hansañu yakumwekesha kukeña? (b) Hakumwimbujola Kristu, kukeña kwamuchidinyi kutwatela kumwekesha?

² Kukeña kwanyana evumu dimu dichinjikijilu chakwilukilaku eniKristu alala. (Yowanu 13:35) Chitwakula lwakuspiritu, twelukaña chakumwekesha kukeña nankashi. Kapostolu Pawulu walombeli nindi kukeña akwawu eniKristu “kusweji kuvula.” (Afwilipi 1:9) Kapostolu Yowanu wahosheli nindi kukeña kwetu kwatela kwikala kwakudihana. Wasonekeli nindi: “Chatutulililiyi [Mwana kaNzambi]  wumi windi, diku kutunelukili kukeña; chachiwahi ninetu kutulila ana kwetu wumi wetu.” (1 Yowanu 3:16; Yowanu 15:12, 13) Komana tunatweshi kuhana wumi wetu kukola ana kwetu? Hela chakwila muyuma yayivulu hichakeñekaña kudihanaku, twashañaku ñovu kushika kuchipimwinyi hakuyikwashaku makonu, hela chakwila hichinateleluku?

3. (a) Munjilanyi mutunateli kumwekeshela kukeña kwetu chikupu? (b) Muloñadi makonu chichinekalili chalema kuswejesha kukeñañana wumu namukwawu?

³ Kwendela hamu nanyidimu yetu yamwekeshaña spiritu yakudihana, twatela kwikala nampwila yayeni yakukeña amana kwetu. Izu daNzambi datukonkomwenaña nawu: “Keñañanenu nawana kwenu nawushona.” (Aroma 12:10) Wejima wetu twatiyaña mwomumu nawantu amakwawu. Komana kwila tudiza kukeña antu amakwawu nehi? Chineli kukuma kwañililu yamakonu yayikulu kudi mukamwihi, chikwikala chalema kuswila kwakwihi chikupu nawakwetu eniKristu. Bayibolu yahoshaña nawu: “Yuma yejima keña yikumi; . . . chasweja kulema yowu kukeñañana chacheni mukachi kenu; muloña kukeña kwabutaña nyiloña yayivulu.”—1 Petulu 4:7, 8.

Neyi Kukala Kunamwekani

4. (a) Muloñadi kukala chikunateli kumwekena owu adi mukachi kachipompelu? (b) Hela chakwila hitukutwesha kwila mwenimu mpinji yejimaku, kuwahanyi kukafumamu neyi tuzatisha kufumba kwaBayibolu?

⁴ Eña, hamuloña wakubula kuloña, mpinji yikwawu tunateli kwila yuma yikutiyisha amakwawu kutama. Amana kwetu niwena atela kutuvulumuna muyuma yayivulu. (1 Yowanu 1:8) Neyi chuma chamuchidiwu chinakumwekeni, watela kwiladi? Nsona yashimunaña nshimbi yitwatela kulondela. Ilaña yuma yahosha nsona hiyinateli kwesekana nayuma yitwelaña hamu neyi antu abula kuloñaku. (Aroma 7:21-23) Hela chochu, neyi tuzatisha chiwahi kufumba kwekala muBayibolu, twakahana chinjikijilu champwila yetu  yakumuzañalesha Yehova. Kwila mwenimu kwakaswejesha cheñi kukeña kutwakeña amakwawu.

5. Neyi muntu yakuvulumuna, muloñadi wutukubulila kumufuntishila katama?

⁵ Neyi antu anayihilishi, mpinji jikwawu akeñakeñaña jinjila mwakutendelamu ona wunayihilishi. Chumichi chakojejaña yuma kuswejelaku kutama. Neyi chakwila chinakukeña kufuntisha katama, twatela kumushila Nzambi chitelu chenichi. (Yishimu 24:29; Aroma 12:17-21) Amakwawu esekaña nikuleka kuhosha namuntu wunayiluwañeshi. Bayi twilaña mwenimu kudi akwetu akwakudifukulaku, muloña kudifukula kwetu hakwila nawu kwitejewi kwashindamena sweje-e hakukeña amana kwetu. (1 Yowanu 4:20) Dihafumini Pawulu kusoneka nindi: ‘Twalekenuhu kudovwahila nikudanakena muntu namukwawu mukudikeñela. Neyi kudi muntu wukweti muloña namukwawu amwanakeni; chiyayanakenenuwu enu kudi Yehova, ninenu nawa ilenu chochimu.’ (Akolose 3:13) Wunatweshi kwila mwenimu?

6. (a) Mapampa kañahi kitwatela kumwanakena mana kwetu? (b) Chumanyi chitwatela kutiyisha chikatukwashaku kumika neyi anatuvulumuni?

⁶ Indochu neyi muntu wumu nakutwalekahu kutuvulumuna ilaña hanakukoña nshidi yeneni yatela kumuhañilawu muchipompeluku? Nshidi yanyanya yamuchidiwu, kapostolu Petulu wafuukwilihu kuyanakena “mapampa katanu nakayedi.” Ilaña Yesu nindi: “[Bayi] kakashiki mumapampa katanu nakayedi hohuku; ilaña nami kakashiki mumakumi atanu nayedi, mapampa katanu nakayedi.” Wahosheli hakutoha kwamukudi wutukweti naNzambi kwesekeja nawutunateli kutambula kudi muntu wudi wejima. (Matewu 18:21-35) Twamuvulumunaña Nzambi muyuma yayivulu mafuku ejima—mpinji yikwawu nayililu yalwisu, nimuyuma yitwahoshaña hela kutoñojoka, hela yuma yitwakañanyaña kwila—chakadi nikwiluka netu tunakuvulumuna.  (Aroma 3:23) Ilaña Nzambi watwalekañahu kututiyila wushona. (Masamu 103:10-14; 130:3, 4) Wakeñaña nindi twikali nayililu yoyimu yakuditiyila luwi wumu namukwawu. (Matewu 6:14, 15; Aefwesesa 4:1-3) Kwila mwenimu tukwikala nakukeña ‘kwabulaña kuhemba yiluwa.’—1 Akorinda 13:4, 5; 1 Petulu 3:8, 9.

7. Chumanyi chitwatela kwila neyi mana kwetu wukweti nkunyi nanetu?

⁷ Kunateli kwikala mpinji yitunateli kwanuka netu, hela chakwila hitukweti nkunyi namana kwetuku, yena nateli kwikala nankunyi nanetu. Twatela kufuukulahu ‘kuyibuta nakukeña,’ neyi chinashimuni 1 Petulu 4:8. Neyi nehi twatela kuya nakuhosha nindi kulonda twikali cheñi nawubwambu wawuwahi.—Matewu 5:23, 24.

8. Neyi mukwetu mukwakwitiya yela chuma chakutuneñesha, chumanyi chitwatela kwila naniku kukala?

⁸ Hadaha mukwenu mukwakwitiya nakwila chuma chaneñeshaña antu amakwawu bayi neyi eyi nkaweyuku. Komana hichikuwaha kuhosha ninduku? Hadaha. Neyi wukumulumbulwila halweyi kukala mumesu awunda, chumichi chikuletesha yuma kuwahilaku. Chatachi watela kudihula neyi: ‘Chuma chinakwilayi hichetejewa chikupu munsonaku? Tahindi kukala kunakutohelaku hamuloña wakwila chisemwa chami ninkulilu yami yinambuki nayindi?’ Babalaku bayi wutuña nshimbi jeyi nakuhosha muwunakeñuku. (Yakoba 4:11, 12) Yehova watambwilaña antu akuyisemwa yejima chakadi chaambu, nawa nayiwundili hampinji yinakukulawu lwakuspiritu.

9. (a) Anyi atalaña yiluwa yanyiloña yamaneni muchipompelu? (b) Mpinjinyi yikwikalayi nañovu yakusambila kuhosha muntu anavulumunuwu, nawa nayitoñojoka yamuchidinyi?

⁹ Neyi wumu muchipompelu yakoña nshidi yeneni nankashi, chidi neyi wuvumbi, muntu yeniwu atela kumukwasha chakadi kulaba. Anyi atela kwila mwenimu? Aeluda.  (Yakoba 5:14, 15) Hela chochu, neyi muntu navulumuni mukwawu, hadaha munsañu jakulanda nakulandulula hela muwukakobukobu, ona anavulumunuwu diyi wukusambila kuya nakumuwana ona wunamuvulumuni kwakankawawu. (Matewu 18:15) Neyi anakañanyi kumanisha nsañwiyi, akuswina kumenji amalehi neyi chinashimuniwu haMatewu 18:16, 17. Kukeña kutwamukeña mana kwetu wunavulumuni nikufwila ‘kumufuntisha’ kukatukwasha kuzata muniyi njila yakukeña kumushika hamuchima windi.—Yishimu 16:23.

10. Neyi kukala kunamwekani, chumanyi chikatukwashaku kumona yuma chiwahi?

¹⁰ Neyi kukala kunamwekani, chili kweneni hela kwanyanya, tukuhetelamu neyi tweseka kwiluka chikupu chakwimonañayi Yehova. Hetejaña nshidi yidi yejimaku, nawa mumpinji  yindi yatelela, antu akoñaña nshidi yasweja nawa abulaña kubalumuka ayihañaña mukuloñesha kwindi. Hela chochu, bayi tulalamena netu wonsu wetu twavulumunaña muyuma yantesha nawa twakeñaña kutwanakena nikutumwekeshela luwi lwinduku. Dichi Yehova wemika chakutalilahu, diyi twatela kwimbujola neyi anatuvulumuni kudi antu amakwawu. Neyi twikala naluwi, dikwila nawu tunakwimbujola kukeña kwindi.—Aefwesesa 5:1, 2.

Keñakeñenu jiNjila ‘Jakuswejeshelamu Kukeña’

11. Muloñadi Pawulu chakolesheleliyi aKorinda ‘kuswejesha kukeña’?

¹¹ Pawulu washakamini tukweji nakukolesha yipompelu muKorinda nimuGriki. Wazatileña nañovu kulonda kukwashaku amana kwetu kwenakuna, nawa wayikeñeli. Ilaña amakwawu hiyamwekesheleña chisambu kudi yenaku. Adiña akalisha chikupu. Dichi wayikonkomweneni ‘kuswejesha kukeña’ hakumwekesha luwi. (2 Akorinda 6:11-13; 12:15) Chikuwaha neyi tukwiluka chipimu chitwatela kumwekeshela kukeña kudi acheñi nikukeña jinjila mwakuswejeshelamu kukeña.—1 Yowanu 3:14.

12. Tukuswejesha ñahi kukeña kudi ejima adi muchipompelu?

¹² Komana kudihu amakwawu muchipompelu yitwamonaña kwikala akala kudikunda nawu? Neyi tukweseka kudiwula tuyikonkojola twejima—neyi chochitwakeñaña wena kutwilila—chumichi chikukolesha wubwambu hakachi ketu. Yitoñojoka yetu hadi wena yinateli kuwahilaku neyi tukeña yililu yawu yayiwahi nikushindamena haniyi yililu. Chumichi chakaletesha kukeña kutukweti hadi wena kuswejelaku.—Luka 6:32, 33, 36.

13. Tunatweshi kwilukilaku ñahi amakwawu hakumwekesha kukeña kudi ana adi muchipompelu chetu?

¹³ Mwamweni, kudi mutwatela kukumina hayuma yitwatela kwilila amakwawu. Hitukutwesha kwimusha antu  ejima hakupompa kudi kwejimaku. Hichikutwesheka kupompesha antu ejima hampinji yitunatambiki amabwambu jetu netu adyi yakudyaku. Komana kwila tuswejesha kukeña kuhitila mukuhosha kapinji kantesha nakukeña kwiluka chiwahi muntu muchipompelu chetu nehi? Komana mukuhita kwampinji kwila tutambikahu muntu yitwabula kwiluka chiwahi kuzata nindi mumudimu wamwiha nehi?

14. Neyi tudi hakachi kaweniKristu yitwabula kwiluka, tunateli kumwekesha ñahi kukeña kwakweni kudi wumu namukwawu?

¹⁴ Kupompa kweneni kwawiniKristu kwekalaña himpinji yayiwahi yitwaswejeshelañamu kukeña antu. Kwapompaña antu amavulu. Ilaña hitukutwesha kwimusha ejimaku, hela chochu, tunateli kudihemba munjila yinakumwekesha nawu tunashi yuma yakeñawu hambidi yayuma yetu. Hampinji yakunooka, tunateli kumwekesha kukeña kuhitila mukwimusha antu adi kwakwihi nanetu. Ifuku dimu, antu ejima adi hamaseki akekala amana kwetu niahela, anuñañana mukudifukula kudi Nzambi walala nawa Tata yawantu ejima. Wakekala muzañalu weneni hakudiluka wumu namukwawu! Kukeña kwakweni dikwakatuletesha kwila mwenimu. Twatela kutachikaku yoyinu mpinji.

Kuhitulukamu kwaKuhanjeka

• Neyi kukala kunamwekani mukachi kaweniKristu, atela kukwimanisha ñahi, nawa muloñadi?

• Hampinji yitunakukula lwakuspiritu, munjilanyi kukeña kwetu mukunateleli kuswejelaku cheñi?

• Chekala ñahi chaswayi kumwekesha kukeña kwakweni kudi antu amavulu kubadika amabwambu yitwadiluka nawu hohu?

[Malwihu aKuzatisha haKudiza]

[Mwevulu wudi hefu 148]

Kukeña kwawiniKristu akwimwekeshelaña munjila jajivulu, chidi neyi hakupompa kwachipompelu