Tiyaku Mwakukulejawu, Itejaku Kufumba
Kapetulu 15
Tiyaku Mwakukulejawu, Itejaku Kufumba
1. (a) Muloñadi wejima wetu chitwakeñekelaña kutuleja nikufumba? (b) Lwihwinyi lutwatela kutoñojokahu?
BAYIBOLU haYakoba 3:2 yahoshaña nawu, “wejima wetu twaluwaña kakavulu [NW].” Tunateli kwanuka mapampa namapampa yitwakañanyaña kwikala antu akonkomwenaña Izu daNzambi nawu twikali. Dichi tweluka netu Bayibolu yekala yoloka hakuhosha nawu: ‘Tiyaku mwakukulejawu, itejaku kukufumba, kulonda wakekali namaana kukukuminina kweyi.’ (Yishimu 19:20) Chakadi nikujina yililu yetu twayihimpa dehi nakuyesekeja hamu nantañishilu yaBayibolu. Hanu dinu neyi mukwetu mwiniKristu yatulejaku hayuma yimu, twakulaña ñahi?
2. Chumanyi chitwatela kwila neyi tunatambwili kuleja kwahalwetu?
2 Amakwawu esekaña kudiyiñisha aweni, nikukehesha muloña wukwetiwu, hela kutuntulwila akwawu nyiloña. Ilaña chachiwahi kutiyilila kuleja nikwilamu. (Aheberu 12:11) Hela chochu, kwosi niwumu watela kukuhwelela amakwawu kwila mwaloña hela wukutwalekahu kuleja akwawu maana hatuyuma twanyanya hela hansañu yeteja Bayibolu muntu kudifuukwilaku. Cheñi, hadaha owu wunakulejana haneluki yikuma yejimaku, nawa atela kumulejayu mukalemesha. Dichi mumpanji yikulondelahu, twayenu tuchifwikiji neyi kuleja hela kufumba kunatwinkiwu kwakuwahi, nawa kunashindameni haBayibolu. Indi wumu watela kwila ñahi?
Yakutalilahu Yitwatela Kwanukaña haMpinji Yitunakutambwila Kuleja
3, 4. (a) Indi Bayibolu yikweti yumanyi yinateli kutukwashaku kwikala nammwenu yayiwahi hansañu yakuleja nikufumba? (b) Mwanta Sawulu welilidi nakuleja kwatambwiliyi, nawa chumanyi chafuminimu?
3 Izu daNzambi dikweti yakutalilahu yazatikili yawantu atambwilili kuleja kwakeñekeleña. Mpinji yikwawu, kuleja kwadiña nakwendela hamu nakufumba. Muntu wumu walejeluwu maana wadiña Mwanta Sawulu wamuIsarela. Wakañenyi kumwovwahila Yehova hansañu yaweniAmaleki. EniAmaleki adikañili nawambuña aNzambi, dichi wunsompeshi waYehova wadiña wakwila nawu eniAmaleki ejima niayimuna awu atela kuyijilumuna ji-i. Ilaña Mwanta Sawulu wamumbiliku mwanta wawu niayimuna awu amawahi.—1 Samweli 15:1-11.
4 Yehova watemesheli kaprofwetu Samweli kuya nakumuzuwila Sawulu. Indi Sawulu welilidi? Watadikili nindi yena wayishindili eniAmaleki ilaña wakuminini dakupulwishaku mwanta wawu. Chumichi chambukili nalushimbi lwaYehova. (1 Samweli 15:20) Sawulu wesekeli kutuntulwila antu nyiloña hakubula kujaha ayimuna, nindi: “Natiyili woma wawantu hinukwovwahila izu dawu.” (1 Samweli 15:24) Wamwekeni neyi washili kashinshi nankashi hakudisamba kwindi chakwila hakumwila niSamweli nindi yomulemeshi kumesu awantu. (1 Samweli 15:30) Nkumininaku, Yehova wamukaanini Sawulu kwikala mwanta.—1 Samweli 16:1.
5. Chumanyi chamumwekeneni Mwanta Uziya chelili yakaani kuleja?
5 Mwanta wawaYuda Uziya ‘wamumotokeli Yehova Nzambi yindi, hakwiñila mutembeli yaYehova nindi yochi insensi.’ (2 Kushindulula 26:16) Ilaña atupristu hohu diwu etejeluwu kwocha insensi. Chelili mukulumpi wawatupristu yamulekeshi Uziya, mwanta walendumukili nakuzuwa. Chumanyi chamwekeni? Bayibolu yashimunaña nawu: “Mbumba hiyikwidika mwihama dindi, . . . muloña Yehova namweti dehi. Mwanta Uziya wadiña mukwambumba hohu nikwifuku dakufwa kwindi.”—2 Kushindulula 26:19-21.
6. (a) Muloñadi Sawulu niUziya mwayedi wawu chiyakaanininiwu kuleja? (b) Muloñadi kukaana kuleja chikunekalili kukala kweneni makonu?
6 Muloñadi chichayikalilili aSawulu niUziya mwayedi wawu kwiteja kuleja? Kudivwimba dichadiña chuma chacheni, wudi wejima wadiña nakudinyamuna yomweni. Amavulu adiletelaña yineñi hamuloña wanichi chaaku. Achimonaña nawu neyi eteja kuleja chikulumbuluka nawu amukunkulwayi hela ijina dawu dikutama. Ilaña kudivwimba hiwufwayi. Kudivwimba kwabutaña yitoñojoka yamuntu chakwila natweshi nikukaana wukwashu wunakuhanayi Yehova kuhitila Mwizu dindi nikuloñesha kwindi. Yehova nindi: “Kudinka wanta kwasambilaña, kujilumuka kwakumininaña; muchima wakudivuna wasambilaña, kudimbuka kwakumininaña.”—Yishimu 16:18; Aroma 12:3.
Twatela Kwiteja Kuleja
7. Yumanyi yayiwahi yitunateli kudizilaku munjila yetejelelimu Mosi kuleja?
7 Munsona mwekala cheñi yakutalilahu yayiwahi yawantu etejeli kuleja, nawa tunateli kudizilaku kuniyi yakutalilahu. Toñojokaku hadi Mosi, walejeluwu kudi muku windi weyala chatela kuzatayi namudimu weneni. Mosi wamutiyililili nikwilamu chakadi nikulaba. (Kwidika 18:13-24) Hela chakwila Mosi wadiña nawuswa chikupu, muloñadi chetejeleliyi kuleja? Muloña wadiña wadizoza. “Mosi wadiña mwovu [wadizoza] nankashi, kubadika amayala ejima [adiña] heseki dejima.” (Kuchinda 12:3) Kudizoza kwekala kwalema munjilanyi? Zefwaniya 2:3 yashimunaña nawu kwalema muloña kwaletaña wumi.
8. (a) Nshidinyi yakoñeliyi Davidi? (b) Indi Davidi wahosheli nindidi chamuzuwililuwu kudi Natani? (c) Yuma yatamanyi yafumini munshidi yaDavidi?
8 Mwanta Davidi welili wuvumbi naBatisheba nakweseka kubuta nyiloña yeniyi kuhitila mukujahisha nfumwindi Uriya. Yehova watemesheli kaprofwetu Natani kuya nakumuzuwila Davidi. Davidi wadanakeneni nawa wetejeli chakadi nikulaba nindi: “Namuvulumuni dehi Yehova.” (2 Samweli 12:13) Hela chakwila Yehova wamwanakeneni Davidi, yihuñu dinu wayimweni muloña wayiluwa yindi. Yehova wamulejeli nindi mpoku yakabali ‘hiyakafuma mwitala dinduku,’ nawa cheñi añodi jindi akayihana kudi ‘mukwawu,’ nawa nindi mwana wakavwalika muwujila “wakafwa hohu.”—2 Samweli 12:10, 11, 14.
9. Chumanyi chitukubula kujimbala neyi anatuleji hela kutufumba?
9 Mwanta Davidi welukili nkisu yafumaña mukutiyilila kuleja kwakuwahi. Mpinji yikwawu, wadiña nakumusakilila Nzambi kwafumineña iku kuleja. (1 Samweli 25:32-35) Komana ninetu dichitwekala? Neyi dimu, amba katukiña kukubula kuhosha nikwila yuma yayivulu yinateli kukojeja chineñi. Indochu neyi twila yuma yatela kukojeja kutwileja hela tuhu kutufumba? Mwani bayi tujimbala netu chumichi hichinjikijilu chakukeña kwaYehova, nayitoñojoka yetu yakwikala nawumi wahaya nyakaku.—Yishimu 3:11, 12; 4:13.
Yililu Yabadika Kulema Yitwatela Kumwekesha
10. Chililwinyi chamwekesheliyi Yesu chakeñekeleña kudi owu akeñila muWanta?
10 Hakwikala nawulunda wawuwahi naYehova niana kwetu awiniKristu, twatela kwikala nayililu yayiwahi. Yesu watenenihu chililu chimu hampinji yemikiliyi mwana wanyanya mukachi kawatumbanji twindi nindi: “Chiña mubalumuka, mwikali neyi anyana anyanya, mukunkulwayi himwakatwesha kwiñila muwanta wamwiwuluku. Dichi yowu wukudizoza neyi mwana wanyanyiwu, diyi nabadiki muwanta wamwiwulu.” (Matewu 18:3, 4) Atumbanji twaYesu ateleli kwikala adizoza muloña mwadiña ntadi mukachi kawu nawu hinyi wabadika.—Luka 22:24-27.
11. (a) Kudanyi kutwatela kwikala adizoza, nawa muloñadi? (b) Neyi twikala adizoza, twakela ñahi neyi atuleja?
11 Kapostolu Petulu wasonekeli nindi: “Wejima wenu dikumbakeshenu kudizoza, kulonda mukalakeli akwenu; muloña Nzambi wadikañaña nawakwakudinka wanta, hakwila akwakudizoza wayinkaña luwi.” (1 Petulu 5:5) Tuneluki netu twatela kwikala adizoza kumesu aNzambi, ilaña iyi nsona yinashimuni nawu twatela cheñi kudizoza kudi akwetu akakwitiya. Neyi twikala adizoza, hitwakakaana maana akatwilejawuku, ilaña twakadizila kudi wena.—Yishimu 12:15.
12. (a) Chililwinyi chalema chinesekaniku nakudizoza? (b) Muloñadi chitunateli kwakamena hayuma yatela kuletelela amakwawu muloña wayililu yetu?
12 Chililu chadifwanaku nankashi nakudizoza hikwakamena chidiwu antu amakwawu. Kapostolu Pawulu wasonekeli nindi: “Bayi muntu alonda yakudiwahisha nachu yomwenuku, chiña yakuwahisha nachu mukwawu. . . . Dichi dinu, hela mukudya hela mukunwa, mumwelaña mwejima ilenu kulonda kulemesha Nzambi. Bayi mwila chuma chakudimbwisha hela aYudeya, hela aHeleni [aGriki], hela chipompelu chaNzambuku.” (1 Akorinda 10:24-33) Pawulu hadiña nakuhosha nindi tuleki yuma yejima yahalwetu yitunakeñuku, ilaña watukokwomweneni nindi kubula kwila chuma chidi chejima chinateli kumuleja muntu kwila munafuukuli chinleji chindi nindi chaluwaku.
13. Chakutalilahwinyi chinateli kumwekesha neyi twekala nachaaku chakuzatisha kuleja kwamuNsona?
13 Komana washaña yuma yakeñañawu amakwawu hambidi yayuma yiwakeñaña? Wonsu wetu twatela kudiza kwila mwenimu. Kudi jinjila jajivulu mutwatela kwilila chenichi. Chakutalilahu, shinshikenu hanvwalilu ninsakwilu. Iyi hiyuma yabombelamu kufuukula kwamuntu kushindamena hawunlomboli waNsona wakwikala washikila, awutotombu, niwunyonji. Dichi neyi wuneluki neyi hamuloña wankulilu yawantu amuchituñilu cheyi, nvwalilu yeyi hela nsakwilu yakañeshaña amakwawu kubula kutiyilila kumazu aWanta, komana kwila wuhimpa nehi? Mwamweni, kukwashaku muntu mukwawu kuheta wumi wahaya nyaka hichuma chalema nankashi kubadika kuditiyisha eyaweni kuwaha.
14. Muloñadi chichinekalili chalema kwikala adizoza nikwakamena amakwawu?
14 Yesu wemikili chakutalilahu hakwikala wadizoza nihakumwekesha kwakamena amakwawu, wawelesheli ninyendu yawatumbanji twindi. (Yowanu 13:12-15) Izu daNzambi dahosheli hadi yena nawu: “Yitoñojoka yadiñi mudi Kristu Yesu yiikali nimudenu nawa. Yena wekala mwomwekalilayi Nzambi, watoñojokeli nindi kubwambuka naNzambi hichuma chakuhukulaku, ilaña wadibalumwini kwikala wakadi kulema, hakwikala mwekalila nduñu, hakwikala chaduwu antu. Chamumwenuwu himuntu, hakudizoza, hakwovwahilaña ho-o, ndo nikukufwa.”—Afwilipi 2:5-8; Aroma 15:2, 3.
Bayi Wukaana Kufumba kwaYehovaku
15. (a) Yumanyi yitwatela kuhimpa kulonda twikali nawuntu wakumuzañalesha Nzambi? (b) Kuzatisha chumanyi mwatwinkelañayi Yehova wonsu wetu kuleja nikufumba?
15 Hamuloña wakwila wonsu wetu tuyakwanshidi, chinakukeñeka kuhimpa muyililu yetu nimunzatilu neyi tunakukeña kumwekesha wuntu waNzambi yetu. Twatela kuvwala “wuntu wawuha.” (Akolose 3:5-14, NW) Kuleja nikufumba kwatwikwashañaku kumona njila munakukeñeka kuwahisha nikwiluka mwakuwahishila. Nsulu yeneni yanshimbi yitwakeñaña yekala muBayibolu. (2 Timotewu 3:16, 17) Nyikanda yahosha haBayibolu nikupompa kwatanjika kuloñesha kwaYehova kwatukwashaña kuzatisha Izu daNzambi. Hela chakwila twatiyahu dehi kuleja kweniku, komana twatela kwanuka netu kunatwiteleli nawa chinakukeñeka kuzatilahu?
16. Wukwashi wamuchidinyi watwinkañayi Yehova hamuntu hamuntu?
16 Hamuloña wakusweja kwakamena, Yehova watukwashaña nakukala kwetu. Yihita yawantu anayikwashi kuhitila mukudiza Bayibolu kwahetala. Anvwali alejaña nikufumba anyanawu kulonda adihembi kuyililu yaletaña chineñi. (Yishimu 6:20-23) Mukachi kachipompelu, kakavulu amakwawu ehulaña ankoñi elukisha yuma kulonda ayilejuku maana nichakwila kulonda akuliluku mumudimu wawu wamwiha. Aeluda mpinji yikwawu, alombaña kuleja kudi wumu namukwawu hela kudi amakwawu elukisha yuma mumudimu wamwiha. Ana ashikahu lwakuspiritu azatishaña Bayibolu hakukwashaku ana anakukeña wukwashu, elaña mwenimu naspiritu yakudizoza. Neyi hiwukulejana, anukaku neyi chiña ‘wikala wababala kuchina akenda kakweseka.’ (Aŋalija 6:1, 2) Eña, wonsu wetu twakeñaña kutuleja nikutufumba kulonda tudifukuli kudi Nzambi walala wumu hohu mukunuñañana.
Kuhitulukamu kwaKuhanjeka
• Mukudikeñela Yehova watukwashaña ñahi kumona njila mutwatela kuwahisha halwetu?
• Muloñadi amavulu chichayikalilaña kwiteja kuleja kwakeñekaña, nawa chekala chafwana ñahi?
• Yililwinyi yabadika kulema yakatukwashaku kwiteja kuleja, nawa Yesu wemikili ñahi chakutalilahu haniyi nsañu?
[Malwihu aKuzatisha haKudiza]
[Mwevulu wudi hefu 142]
Uziya wakaanini kuleja dichi amweteli nambumba
[Mwevulu wudi hefu 142]
Mosi wahetelelimu kuhitila mukwiteja kuleja kwaYetero
