Kapetulu 19

Twalekenuhu naKuhosha Mazu aNzambi Chakadi Woma

1. (a) Nsañwinyi yayiwahi yashimwineñawu atumbanji twaYesu, indi aYudeya amakwawu elilidi? (b) Malwihwinyi yitwatela kwihula?

KWAKWIHI nayaaka 2,000 yinahitihu, Mwana kaNzambi, Yesu Kristu amuwayishili kwikala Mwanta wakumbidi weseki dejima. Yesu amujahili hamuloña wekakeja dawayilumbu ansakililu, ilaña Yehova wamusañwili kufuma mudi afu. Kuhitila mudi Yesu, wumi wahaya nyaka wunekali waswayi kuwana. Hampinji yashimwinineña atumbanji twaYesu iyi nsañu yayiwahi hatooka, dihatachikili niikañesha. Amakwawu ayishili mukaleya, nikuyihumpula nakuyileja kuleka kuhosha hadi Yesu. (Yililu 4:1-3, 17; 5:17, 18, 40) Indi atumbanji adi kwiladi? Neyi wadiña eyi, mutenowu wadi kwiladi? Komana wadi kutwalekahu nakushimwina chakadi woma?

2. (a) Nsañwinyi yayiwahi yatela kushimwinawu mumafuku etu? (b) Anyi akweti mudimu wakushimwina nsañu yayiwahi?

² Mu 1914, Mwanta waWanta waNzambi, Yesu Kristu amuswanyikili mwiwulu nakuyula ‘mukachi kawayilumbu jindi.’ (Masamu 110:2) Kulondelahu, Satana niandemoni jindi ayinatilili hamaseki. (Chimwekeshu 12:1-5, 7-12) Mafuku akukuminina anshakaminu yatama yamakonu atachika dehi. Chikela neyi iyi mpinji yinamani dehi, Nzambi wakakisañana kaayi kejima kanakuyulewa naSatana. (Danyeli 2:44; Matewu 24:21) Akapuluka akekala nachikuhwelelu chakushakama nawumi wahaya nyaka  kumbidi heseki dakekala paradisa. Neyi wunatambwili dehi iyi nsañu yayiwahi, watela kulejaku amakwawu. (Matewu 24:14) Hanu kwakulanyi kuwatela kutambwila?

3. (a) Indi antu akulaña nawudi kunsañu yaWanta? (b) Lwihwinyi lutwatela kwakula?

³ Hampinji yiwunakushimwina nsañu yayiwahi yaWanta, amakwawu atela kwiteja, ilaña amavulu hiyakashaku maanaku. (Matewu 24:37-39) Amakwawu atela nikukusekesha hela kukukañesha. Yesu wasoñamishili nindi ikañesha datela kufuma nikudi antaña jeyi. (Luka 21:16-19) Ikañesha datela kufuma cheñi kumudimu hela hashikola. Mumatuña amakwawu, aYinsahu jaYehova ayilekesha kudi nfulumendi. Neyi wikala mukukala kwamuchidiwu, komana wukatwalekahu kushimuna izu daNzambi chakadi woma ‘nikwimana wakola muchikuhwelelu’?—1 Akorinda 16:13.

Bayi Tushindamena haÑovu Jetuku

4. (a) Hakwila tudimwekeshi kwikala ambuña aNzambi ashinshika, chumanyi chalema chinakukeñeka? (b) Muloñadi kupompa kwawiniKristu chikwalemena?

⁴ Kulema kwakwikala ambuña aYehova ashinshika hikushindamena hayuma yindi yayiwahi. Chuma chimu chachiwahi hikupompa kwahachipompelu. Nsona jatukonkomwenaña kubula kudiwula kupompa. (Aheberu 10:23-25) Ana anakutwalekahu kwikala aYinsahu jaYehova ashinshika adishañaku chikupu kuwanika kukupompa mpinji yejima nawakwawu akwakudifukula. Hakupompa kwamuchidiwu, dihu twelukilaña jinsona chikupu. Cheñi, kutiyisha kwachalala chelukewa dehi kwaswejelañaku, nikwilukilaku jinjila jikwawu mutwatela kuchizatishila kwaswejelañaku. Twaswijewaña kwakwihi nawamana kwetu awiniKristu hakudifukula mukunuñañana nawa twakoleshewaña kwila nkeñelu yaNzambi. Spiritu yaYehova yahanaña wunlomboli kuhitila muchipompelu, nawa kuhitila  muniyi spiritu, dimwekalilañayi Yesu mukachi ketu.—Matewu 18:20; Chimwekeshu 3:6.

5. Neyi aYinsahu jaYehova anayilekeshi, chumanyi chazatikaña hansañu yakupompa?

⁵ Komana wawanikaña kukupompa kwejima mpinji yejima, nawa halweyi wazatishaña yuma yiwatiyaña yahoshañawu? Mpinji yikwawu, neyi aYinsahu jaYehova anayilekeshi, chekala chalema kupompa mutumazanvu twanyanya mumatala kumbadi. Maluña nimpinji yatela kushiyashana nawa kakavulu hiyatela kwilukewaku. Kupompa kukwawu kwekalañaku wufuku. Hela chakwila kudi kukala kwakumujimba hela wubanji, amana kwetu niahela ashinshika ashañaku ñovu yayeni yakuwanika kukupompa kudi kwejima.

6. Twatela kumwekeshaña ñahi nawu twashindamena hadi Yehova, nawa chumichi chinateli kutukwashaku ñahi kutwalekahu nakuhosha chakadi woma?

⁶ Kushindamena hadi Yehova kwamwekanaña kuhitila mukwinza kudi yena mukulomba kwahamuchima, nikwanuka netu tunakukeña wukwashu waNzambi. Komana dimu welaña? Yesu walombeleña kakavulu hampinji yadiñayi namudimu windi waheseki. (Luka 3:21; 6:12, 13; 22:39-44) Hawufuku wakwila henohu kanda amujahili hamutondu, Yesu wayikonkomweneni atumbanji twindi nindi: “Tonenuña nikulomba, kulonda mubuli kwiñila mukweseka.” (Maku 14:38, NW) Neyi tumona ikañesha kutalisha kunsañu yaWanta, tunateli kwesekewa nakufunta hanyima mumudimu wetu. Neyi antu akutusekesha hela kutuyandisha, hekwawu tunateli kuleka kushimwina kulonda kutondolwela kukala. Ilaña neyi tulomba chikupu spiritu yaNzambi kutukwashaku kutwalekahu kuhosha chakadi woma, amba katukiña nakubula kudiñija mukweseka kweniku.—Luka 11:13; Aefwesesa 6:18-20.

 Nsañu yaKushimwina Chakadi Woma

7. (a) Nsañu yidi mumukanda waYililu yinekali ñahi yakutuzañalesha? (b) Akulaku malwihu analoñeshiwu kunsa yayinu parakarafu, konkomwenaku chiyatela kutukwasha iyi nsañu.

⁷ Nsañu yidi mumukanda waYililu yatela kututiyisha kuwaha nankashi wonsu wetu. Yashimunaña chadiña apostolu niatumbanji amakwawu akusambila—antu adiña nayitoñojoka neyi yetwetu—chashindiluwu kukala nikudimwekesha kwikala ahamuka nawa ayinsahu jaYehova ashinshika. Twayenu tushinshiki chibalu chaniyi nsañu kuzatisha malwihu analondelihu ninsona jinateniwu. Chitukwilaña mwenimu, toñojokenu chimunateli kuhetelamu enu halwenu muyuma yimunakutaña.

Komana apostolu adiña antu ataña nankashi? Komana kubula woma kwanawa antu kwadiña kwakusemuka naku, hela kudi chuma chinamwekani? (Yowanu 18:17, 25-27; 20:19; Yililu 4:13)

Chumanyi chamukwashili Petulu kuhosha chakadi woma muchota chanyiloña chawaYudeya chamujahili Mwana kaNzambi? (Matewu 10:19, 20; Yililu 4:8)

Chumanyi chelileñawu apostolu muwuna mulungu henohu kanda ayileti kuSanihedilini? (Yililu 1:14; 2:1, 42)

Chelili anyuli ayileji apostolu kuleka kushimwina mwijina daYesu, indi aPetulu niYowanu akwili nawudi? (Yililu 4:19, 20)

Chelili anayumbiku dehi, apostolu alombeli wukwashu kudinyi? Komana alombeli nawu ikabisha dileki tahindi, elili ñahi? (Yililu 4:24-31)

Yehova wazatishili chumanyi hakuhana wukwashu neyi akwakukañesha eseka kulekesha mudimu wakushimwina? (Yililu 5:17-20)

 Indi apostolu amwekesheli ñahi nawu elukili muloña waweni wayipulwishiliwu? (Yililu 5:21, 41, 42)

Hampinji yelili atumbanji apalañani hamuloña wekabisha, chumanyi chiyatwalekelihu nakwila? (Yililu 8:3, 4; 11:19-21)

8. Yumanyi yayiwahi yafumini mukushimwina kwawatumbanji akusambila, indetu tunabombelewimu ñahi?

⁸ Mudimu wakushimwina nsañu yayiwahi hiwadiña wamukunkulwayuku. Kwakwihi nawatumbanji 3,000 apapatisheweli haPentekosta 33 C.E. ‘Akakwitiya adibombeli kudi Mwanta, mazaza aweni amayala nawambanda.’ (Yililu 2:41; 4:4; 5:14) Mukuhita kwampinji, nimukwakuyandisha antu jaNzambi wasweja kuzuwa, Sawulu wakuTarusa, wekalili mwiniKristu nawa watachikili kushimwina chalala chakadi woma. Wenjili nakwikala kapostolu Pawulu. (Aŋalija 1:22-24) Mudimu watachikili munkulakaji yayaaka yakusambila wamana wanyi. Dihu wunaswejeliku chikupu munanu mafuku akukuminina nawa wunashiki mumatuña ejima ahamaseki. Tudi nakukoleka kwakushimwina muniwu mudimu, nawa chitukwilaña mwenimu, tunateli kudizila kuchakutalilahu chemikawu ayinsahu ashinshika adiñaku dehi.

9. (a) Kukolekanyi kwazatishileñayi Pawulu hakushimwina? (b) Munjilanyi muwatandishilaña nsañu yaWanta kudi amakwawu?

⁹ Chelili Pawulu nadizi dehi chalala hadi Yesu Kristu, chumanyi cheliliyi? “Hohenohu hakushimuna nsañu yaYesu . . . nindi hiMwana kaNzambi.” (Yililu 9:20) Pawulu wahamekeleña haluwi lwaNzambi lwenzala wushona lwamumwekesheleliwu, nawa welukili nindi antu ejima anakukeña nsañu yayiwahi yatambwililiyi. Pawulu wadiña kaYudeya, dichi kwesekeja nakashidikilu kanana mafuku, weñilileña mumashikola nakushimwina.  Wadiña nakushimwina cheñi kwitala nikwitala nikuhosha nawantu hayisankanu. Nawa wakeñeleña kuya kumaluña amakwawu nakushimwina nsañu yayiwahi.—Yililu 17:17; 20:20; Aroma 15:23, 24.

10. (a) Indi Pawulu wamwekesheli ñahi kashinshi hakushimwina hela chakwila wadiña wahamuka? (b) Munjilanyi mutunateli kwimbujola yililu yaPawulu neyi hampinji yitunakushimwina kudi antaña, niantu yitwazataña nawu, hela akwetu akashikola?

¹⁰ Pawulu wadiña wahamuka cheñi nawa washinshika, dichi twatela kwikala. Kudi aYudeya wadiña nakuyilembelela kushindamena hakukana kwayikaniniwu ankakulula jawu kudi Nzambi. Kudi aGriki wahosheleña kushindamena hayuma yelukiluwu. Mpinji yikwawu wazatishileña chakutalilahu chindi yomweni hakudiza chalala kwikala njila yakuhaninamu wunsahu. Wahosheli nindi: “Yuma yejima yinelaña, nelilaña nsañu yayiwahi kulonda nidiiluku hamu nayu [amakwawu].”—1 Akorinda 9:20-23; Yililu 22:3-21.

11. (a) Chumanyi cheliliyi Pawulu hakutondolwela kuditadikishaña kakavulu nawakwakukañesha? (b) Mpinjinyi yitwatela kwimbujola chiwahi chakutalilahu chaPawulu, nawa munjilanyi? (c) Kudihi kwafumaña ñovu yakutwalekahu kuhosha chakadi woma?

¹¹ Hampinji yelili ikañesha dimuleteshi Pawulu kuya nakushimwina kwiluña dacheñi hakapinji kantesha, welileña mwenimu chatela kuditadikishaña nawakwakukañesha. (Yililu 14:5-7; 18:5-7; Aroma 12:18) Ilaña hatiyileña nsonyi hamuloña wansañu yayiwahiku. (Aroma 1:16) Hela chakwila Pawulu hakeñeleña kasawuntu—nimahumpu—atambwilileñayi kudi akwakukañeshaku, ‘womikili mudi Nzambi yetu’ nakutwalekahu kushimwina. Wahosheli nindi: “Mwanta wañimenenuku, wankolesheli, kulonda nsañu yisweji kushimununewa.” (1 Atesalonika 2:2; 2 Timotewu 4:17) Mutu wachipompelu chawiniKristu,  Yesu, nakutwalekahu kuhana ñovu yitwakeñaña hakwila tuzati mudimu washimwineñawu dehi mumafuku etu.—Maku 13:10.

12. Chumanyi chahanaña wunsahu wakuhamuka kwawiniKristu, nawa kwashindamena hanka?

¹² Nkeñelu yetu yidi yakutwalekahu kushimwina izu daNzambi chakadi woma neyi cheliliyi Yesu niambuña aNzambi ashinshika amakwawu amunkulakaji yayaaka yakusambila. Ichi hichinayi mukwila nawu kubula kwakamena hela kuyikanjikija antu ana anabuli kukeña nsañwiyuku. Ilaña hitwalekaña hamuloña wakwila antu hiyakamenañaku; cheñi ikañesha hidatwikañeshaña kushimwinaku. Kufwana Yesu, twatalaña kuWanta waNzambi neyi diyi nfulumendi yaloña heseki dejima. Twahoshaña nawulobu muloña twamwimenañaku Yehova, Mwanta Wakuleña Kwejima, nawa ninsañu yitwashimwinaña yindi bayi neyi yetuku. Nawa kukeña kutwamukeña Yehova kwatela kwikala njila yeneni yakumuhamekelamu.—Afwilipi 1:27, 28; 1 Atesalonika 2:13.

Kuhitulukamu kwaKuhanjeka

• Muloñadi chichinekalili chalema kushimwina nsañu yaWanta kudi antu ejima, hanu ñakwilwinyi yitwatela kutambwila?

• Munjilanyi mutwatela kumwekeshela nawu hitwashindamena hañovu yetu hakumukalakela Yehovaku?

• Yumanyi yalema yitwadizaña mumukanda waYililu?

[Malwihu aKuzatisha haKudiza]

 [Nyevulu yidi hefu 173]

Neyi chichadiña kunyima ambuña aYehova makonu ahoshaña izu daNzambi chakadi woma