Kapetulu 10

Wanta ‘Wakabula Kukisañanawu’

1. Walalanyi wunamwekeshiwu muyuma yinakumwekana mukaayi mukuhanda kwejima kwamuchidi wamuntu?

YUMA yinakumwekana mukaayi ifuku nifuku yinakumwekesha chikupu nawu antu anakañanyi kuwana muzañalu hakukaana wanta waYehova nakweseka kudiyula aweni. Kwosi muchidi wanfulumendi niwumu wunatweshi kuleta kuwaha kwakadi chambu kumuchidi wamuntuku. Hela chakwila antu anakuliliku mukwiluka jasayansi kushika hachipimu cheneni, anakañanyi kumanisha yikatu hela kufumishahu kufwa, anakañanyi kwila mwenimu hela tuhu kudi muntu wumu. Kuyula kwawantu kunakañanyi kufumishahu njita, nimadombu, niwubanji, nimajika kanwa, hela wuzweñi. Jinfulumendi jawukatu jichidi kuyula antu mumatuña amavulu. (Mukwakutaŋisha 8:9) Wuya hambidi mujakutuñatuña, nilwisu, nikubula kwiluka diyuma yejima yaleteshaña kutamisha ituña, nimenji, nimpepela. Akulumpi janfulumendi hakuzatisha maheta chatama, anakojeji yihandilu yawantu amavulu kukala hakuwana yuma yakeñañawu muwumi. Yaaka yayivulu yakuyula kwawantu yinamwekeshi ichi chikuma kwikala chalala: “Njila yamuntu hiyekala mudi yomwenuku, mudi muntu wendaña himwekala yakuyula nyendu yinduku.”—Yeremiya 10:23.

2. Chumanyi hohu chatela kumanisha makabi awantu?

² Chumanyi chatela kumanisha kukala? Wanta waNzambi, walejeliyi Yesu atumbanji twindi kuwilombelela  nawu: “Wanta weyi winzi. Muchima weyi awili hamaseki neyi chawilañawu mwiwulu.” (Matewu 6:9, 10) Wanta waNzambi wamwiwulu anawishimuni ha 2 Petulu 3:13 nawu “mawulu amaha,” wukayula “iseki dadiha,” dinakwimenaku chisaka chawantu aloña. Wanta waNzambi wakwiwulu walema nankashi muloña Yesu wawilishili kwikala mutu wampanji hakushimwina kwindi. (Matewu 4:17) Washimwini chitwatela kuwulemesha muwumi wetu, hakukonkomwena nindi: “Ilaña sambilenu kukeña wanta windi nikuloña kwindi.”—Matewu 6:33.

3. Muloñadi kudiza hansañu yaWanta waNzambi chikunekalili chuma cheneni chakunyakashana?

³ Kudiza hansañu yaWanta waNzambi hichuma cheneni chakwila mukunyakashana, muloña Wantiwu keña wukoñihu chuma chimu kulonda wuhimpi chiyulu chadinu iseki haya nyaka. Danyeli 2:44 yinashimwini dekulu nawu: ‘Hamafuku amba kekala anyantowu [nfulumendi yamakonu yinakuyula], Nzambi wamwiwulu wamba kaloñesha wanta [mwiwulu] wakabula kukisañanawu haya nyaka, wantowu hiyamba kawushiyila antu acheñuku [antu hiyakayula iseki kamuchiyediku]; wakahumona mawanta ejima [amakonu] puchi puchi, nakuyinoñesha, [wena nkawawu] wakemana mbe haya nyaka.’ Dichi Wanta wukakumisha anu mafuku akukuminina kuhitila mukukisañana ayinu ñililu yayuma yatama yejima. Kuyulewa kweseki naWanta wamwiwulu dihu hiyakakwitejawu. Owu muzañalu wutwatela kutiya hakusubuka kukaleta iwu Wanta wudi dehi kwakwihi nankashi!

4. Kutalisha kunsañu yaWanta, chumanyi chamwekeni mwiwulu mu 1914, nawa chumichi chinekali chalema ñahi kudi etu?

⁴ Mu 1914, Yesu Kristu amuswanyikili kwikala Mwanta nawa amwitejeli ‘kuya nakushinda mukachi kawayilumbu jindi.’ (Masamu 110:1, 2) Cheñi muchaaka chenichi,  “mafuku akukuminina” añililu yatama yayuma yamakonu dihatachikiliwu. (2 Timotewu 3:1-5, 13) Hampinji yoyimu, yuma yamweniyi Danyeli muchimwenu chawuprofwetu yamwekeni chikupu mwiwulu. “Wanyaka nanyaka,” Yehova Nzambi, hakumwinka Mwana kamuntu, Yesu Kristu, “nikuyula, nimpuhu, niwanta, kulonda antu amwacheñi namwacheñi ejima, ninyuza yawantu yejima, niakwamadimi eñi naeñi ejima akamukalakelaña.” Hakushimuna ichi chimwenu, Danyeli wasonekeli nindi: “Kuyula kwindi hikuyula kwahaya nyaka nanyaka, hikwamba kahitaku, niwanta windi [hiyamba kawukisañanaku].” (Danyeli 7:13, 14) Kuhitila muniwu Wanta wamwiwulu wudi mumakasa aKristu Yesu, dimwakatweshelayi Nzambi kuhana yuma yayiwahi yakadiluñishawu antu akeña kuloña yafukwililiyi anvwali jetu awuntu atachi hampinji yayinkeliyi muParadisa.

5. Yumanyi yakunama kutalisha hansañu yaWanta yinateli kutuzañalesha, nawa muloñadi?

⁵ Komana wunakufwila kwikala muntu washinshika  wakayulañawu kudi iwu Wanta? Neyi dimu, wukutiya kuwaha nankashi nantuñilu ninzatilu yaniyi nfulumendi yamwiwulu. Wukukeña kwiluka chuma chinakwila iyi nfulumendi makonu, nichiyakela kumbidi, nichuma chiyinakukeña kudeyi. Hampinji yiwukushinshika chiwahi haniwu Wanta, kusakilila kweyi kwatela kuswejelaku. Neyi wukwiteja chiyulu chawu wukushikahu chikupu hakulejaku amakwawu hayuma yayiwahi yakayililawu antu ovwahila kuWanta waNzambi.—Masamu 48:12, 13.

Anyuli aWanta waNzambi

6. (a) Indi Nsona yamwekesha ñahi muntu wukweti wanta windi wunamwekeshiwu kuhitila muWanta wawuMesiya? (b) Indi yuma yitwadizaña kutalisha haWanta yatela kutwikuma ñahi?

⁶ Chuma chatachi hikushinshika hachuma chamwekeshaña nawu iwu Wanta wawuMesiya hichinjikijilu chawanta waYehova yomweni. Yehova diyi wamwinkeli  Mwanindi “nikuyula nimpuhu, niwanta.” Hanyima yakwila Mwana kaNzambi anamwinki dehi wuswa wakutachika kuyula neyi Mwanta, mazu kufuma mwiwulu atwili mbila nawu: “Wanta wampata yamunu mwishina wunekali dehi wanta waMwanta wetu [Yehova Nzambi], niwaKristu windi; wakayula haya nyaka nanyaka.” (Chimwekeshu 11:15) Komana yuma yejima yitwamonaña yinakundami kuniwu Wanta niyuma yiwakalakalaña yinatweshi kutuswija kwakwihi naYehova yomweni. Yuma yitwadizaña yatela kusañumuna nkeñelu yetu yakwovwahila kuwanta windi haya nyaka.

7. Muloñadi chichinekalili chakutuzañalesha hakwiluka nawu Yesu Kristu diyi Chinlonda chaYehova Mukuyula?

⁷ Toñojokaku cheñi hawalala wakwila nawu Yehova namushi Yesu Kristu hetanda hamu neyi Chinlonda Mukuyula. Hakwikala Mukalawenu wazatishiliyi Nzambi hakuleña iseki niantu, Yesu weluka chikupu yuma yitwakeñaña kubadika yitweluka etu. Kubombelahu, kufuma tuhu hatachikilili chihandilu chawantu, Yesu wamwekesheli ‘kuwaha kwindi nawanyana kawantu.’ (Yishimu 8:30, 31; Akolose 1:15-17) Hamuloña wakusweja kukeña antu chamuletesheli kwinza heseki nawa waheni wumi windi neyi ifutu danyiloña hanyijimba yetu. (Yowanu 3:16) Chafuminimu watwenzulwila njila yakupulukilamu kufuma kunshidi nikukufwa nikukukoleka kwawumi wahaya nyaka.—Matewu 20:28.

8. (a) Kwambukaku nakuyula kwawantu, muloñadi nfulumendi yaNzambi chiyakatwalekelahu? (b) Kudinuñanyi kudi hakachi ‘kanduñu wamaana nikashinshi’ nanfulumendi yamwiwulu?

⁸ Wanta waNzambi hinfulumendi yakabula kuhimpa, nawa yahaya nyaka. Kutwalekahu kwaWanta weniwu anakumwekeshi hamuloña wakwila Yehova yomweni hafwañaku.  (Masamu 146:3-5, 10) Kwambukaku nawanyanta awantu, Yesu Kristu, enkawu wanta kudi Nzambi, niyena hafwañaku. (Aroma 6:9; 1 Timotewu 6:15, 16) Akwakumuyulishaku Kristu hamatanda amwiwulu akekala 144,000, ambuña aNzambi ovwahila ‘akunyichidi, akumadimi ejima, akumatuña ejima akunyuza yejima.’ Awa niwena ayinka wumi wabulaña kufwa. (Chimwekeshu 5:9, 10; 14:1-4; 1 Akorinda 15:42-44, 53) Amavulu hakachi kawu adi dehi mwiwulu, dichi ashalahu hakachi kawu achidi heseki anelishi “nduñu wamaana nikashinshi” wamakonu, wunakutwala hambidi yuma yinakundami kuniwu Wanta nakashinshi hamaseki.—Matewu 24:45-47.

9, 10. (a) Wanta waNzambi wukafumishahu kuluwañeshanyi kukweti chambu chatama? (b) Neyi hitunakukeña kwikala ayilumbu aWanta waNzambuku, kukalanyi kutwatela kutondolwela?

⁹ Katataka, hampinji yindi yatelela, Yehova wakatemesha akwakujilumuna kulonda akawahishi iseki. Akajilumuna antu ejima chikupu akaanaña kwiteja wanta windi mumushikila nawa asekeshaña yuma yinaloñeshiyi Yehova kuhitila mudi Yesu Kristu. (2 Atesalonika 1:6-9) Dakekala hiifuku daYehova, mpinji yeneni yitwatalilaña yakumuyiñisha hamu neyi Mwanta Wakuleña Kwejima. “Tiyenu, ifuku daYehova hidikwinza, dawukatu, hidikwinza nandombu nakuzuwa kwasweja; . . . kulonda kujilumwinamu akwanshidi adumu [mwituña].” (Isaya 13:9) “Ifuku odu hiifuku dandombu, hiifuku dayihuñu nakukabakana, hiifuku dakukisañana nakwila kwamahembi, ifuku damwidima nakwiyila, ifuku damavu namwidima wakushishita.”—Zefwaniya 1:15.

¹⁰ Nsakililu yakutwamba yejima ninfulumendi jejima jawuntu niamashidikawu, analuwañeshiwu kudi nyuli watama wakamwekanaña wayinu mpata, akayijilumuna haya  nyaka. Ejima adikundaña nadinu ituña kuhitila mukufwila yililu yatama yakudishindamena, niwupwapwoki, akayijilumuna. Satana niandemoni jindi hiyakadimona cheñi nawantu akekala hamasekiku, akayikasa chikupu hadi yaaka ikombakaji dimu. Kufumahu, Wanta waNzambi wakayula yuma yejima yidi hamaseki. Wenowu muzañalu kudi antu ejima akeña kuloña!—Chimwekeshu 18:21, 24; 19:11-16, 19-21; 20:1, 2.

Chakuwana Nkeñelu yaWanta

11. (a) Indi Wanta wawuMesiya wukashikija ñahi nkeñelu yaYehova kutalisha kwiseki? (b) Indi kuyula kwaWanta kwakayililadi antu akashakamaña hamaseki hayina mpinji?

¹¹ Wanta wawuMesiya wakashikija chikupu nkeñelu yaNzambi yatachi kutalisha kwiseki. (Kutachika 1:28; 2:8, 9, 15) Makonu, muchidi wamuntu wunakañanyi kuzatila hamu naniyi nkeñelu. Ilaña, “iseki dawantu dakenza” dakekala mumakasa aMwana kamuntu, Yesu Kristu. Ejima akapuluka wunsompeshi waYehova muyinu ñililu yayikulu akazatila hamu muwunlomboli waKristu Mwanta, saña azañalela kwila mwonsu mwakayilombolayi kulonda iseki dejima dakekali paradisa. (Aheberu 2:5-9) Antu ejima akatiya kuwaha nanyidimu yamakasawu nikudiluñisha chikupu nayuma yikedishaña iseki.—Masamu 72:1, 7, 8, 16-19; Isaya 65:21, 22.

12. Indi kuloña muyitoñojoka nimumujimba akakwileta ñahi hadi antu akayulañawu muWanta?

¹² Hampinji yayileñeliwu Adama niEvu, adiña amaninina, nawa nkeñelu yaNzambi kutalisha kwiseki yadiña nawu adinzeshi nawanyanawu, wonsu wawu ekali nayitoñojoka yayiwahi ninyijimba yaloña. Iyi nkeñelu yakamwekana chikupu mukuyula kwaniwu Wanta. Ichi chinakukeñeka kufumishahu yuma yafumaña munshidi, nawa haniwu muloña, Kristu wakalakalaña neyi Kapristu Muneni  bayi neyi Mwanta hohuku. Mukuwunda, wakakwashaku antu jindi ovwahila kuhetelamu mumulambu wawumi windi wawuntu walema wakubuta nachu nyiloña.

13. Nkiswinyi yakumujimba yamba kekalaku hampinji yakayulaña Wanta?

¹³ Muchiyulu chaWanta, antu ahamaseki akatambwila nkisu yayiwahi yakumujimba. “Henohu dihu hakatoneshawu mesu awamputamesu, dihu hakajikulawu matu awajika matu. Henohu dihu hakakilukayi mukwakubalakata neyi nkayi, niidimi dakamama dakemba tumina.” (Isaya 35:5, 6) Mujimba wunatami hamuloña wakushinakaja hela yikatu wakela se-ne-ne kubadika wamwana wanyanya, yikatu yakuzeyazeya yashimbulaña akayifumishahu. “Mujimba windi wukwila se-ne-ne, chakubadika mwana wanyanya; wukufunta cheñi muwukwenzi windi.” (Yoba 33:25) Ifuku dikenza dakabula kuhosha muntu nindi: “Ami nakataku.” Muloñadi? Muloña antu amutiyaña Nzambi woma akayamuna kumuhamba wanshidi nikuyuma yafwana yafumañamu. (Isaya 33:24; Luka 13:11-13) Eña Nzambi “wakayikombola madilu ejima kumesu awu, hikwakekala nawa cheñi kufwaku; hikwakekala nawa cheñi hela kuneña hela kudila hela kukataku. Yuma yakusambila yinahiti dehi.”—Chimwekeshu 21:4.

14. Indi kutambwila kuloña kwawuntu kwabombelamu chumanyi?

¹⁴ Hela chochu, yuma yayivulu yinabombelewimu hakwila nawu twikali aloña kubadika hakwikala namujimba wakola niyitoñojoka yayiwahi. Chabombelamu kumwekesha chikupu yililu yaYehova muloña atutuña ‘muchifwikija chaNzambi, kwesekeja nachekalayi.’ (Kutachika 1:26) Hakwila nawu twilimu, chinakukeñeka kudiza nankashi. Mwituña dadiha, “mwakekala kuloña.” Neyi chashimwineñahu dekulu Isaya nindi, “akwakushakama munu  mwishina akadiza kuloña.” (2 Petulu 3:13; Isaya 26:9) Ichi chililu chaletaña kuwunda—hakachi kawantu anyichidi yejima, nihadi amabwambu amukamwihi, nimuchisaka chamuntu, sweje-e dinu naNzambi yomweni. (Masamu 85:10-13; Isaya 32:17) Ana adizaña kuloña mukuhita kwampinji akayidizisha nkeñelu yaNzambi chiyakayilila. Kukeña kuyamukeñawu Yehova chikwakatanda munyichima yawu, akalondela nshimbi jindi muyuma yejima yamukuhanda kwawu. Akatwesha kuhosha neyi chahosheliyi Yesu nindi, ‘Nelaña yuma yamutiyishaña Tata yami kuwaha mafuku ejima.’ (Yowanu 8:29) Ochihandilu kuwaha hampinji yikashikijewa yumiyi kumuchidi wamuntu wejima!

Kushikijewa kwaYuma Yinakumwekana

15. Kuzatisha malwihu amuniyi parakarafu, shimunaku yuma yinakoñi Wanta nawa mwekeshaku chuma chitwatela kwila hayinu mpinji.

¹⁵ Kushikijewa kwakuwahi kwaWanta waNzambi niantu anakuyulewa kunakumwekana. Malwihu analondelihu nijinsona jikuyanukisha hayuma yimu yinashikijewi, cheñi nihayuma yinatweshi kwilawu antu ejima anakuyulewa amuWanta niyuma yatela kwilawu hayinu mpinji.

Wanta watachikili kulwa nanyi, nawa chumanyi chafuminimu? (Chimwekeshu 12:7-10, 12)

Kupompesha antu ashalahu kumu kudihi kwezaza dinenkiwu kashinshi kufuma hampinji yamuswanyikiliwu Kristu hetanda? (Chimwekeshu 14:1-3)

Mudimwinyi washimwinañahu dehi Yesu nindi wakazata hanyima yakulendumuka kwehuñu deneni neyi chasonekawu haMatewu 25:31-33?

Mudimwinyi watachi wuyanakukalakalawu makonu? Anyi anakuwuzata? (Masamu 110:3; Matewu 24:14; Chimwekeshu 14:6, 7)

 Muloñadi akwakukañesha akamatuña nachiyulu ninsakililu chiyanakañenyiwu kukañesha mudimu wakushimwina? (Zekariya 4:6; Yililu 5:38, 39)

Kuhimpikanyi kunekali munshakaminu yanana ovwahilaña kukuyula kwaWanta? (Isaya 2:4; 1 Akorinda 6:9-11)

Wanta Wekombakaji daNyaka

16. (a) Indi Kristu wakayula yaaka yiñahi? (b) Yumanyi yayiwahi yakelawu hampinji yakuyula nihanyima yakuyula?

¹⁶ Hanyima yakumukasila Satana niandemoni jindi mwikela, Yesu Kristu niakwakumuyulishaku indi a 144,000, akayula neyi anyanta niatupristu hadi ikombakaji danyaka. (Chimwekeshu 20:6) Hayina mpinji, muchidi wamuntu akawilisha kwikala wamaninina, nakufumishahu nshidi chikupu nikufwa kwaletayi Adama. Chikela Ikombakaji daNyaka yaKuyula dinamani dehi, hanyima yakukalakala chiwahi mudimu windi neyi Kapristu-Mwanta wawuMesiya, Yesu ‘wakahana wanta’ kudi Tata yindi, “kulonda Nzambi akekali diyi hohu kanka windi chikupu, mwejima.” (1 Akorinda 15:24-28) Haniyi mpinji, Satana akamumbaku hakapinji kanti kulonda yokeseki antu anakuliwu hakukwasha kwawu wanta waYehova mwanta wakuleña kwejima. Hanyima yaniku kweseka kwakukumishaku, Yehova wakamukisañana Satana niakwakudikaña akekala kukabadi kindi. (Chimwekeshu 20:7-10) Ana akwashaña wanta waYehova—wuswa windi wakuyula—akamwekesha chikupu kwovwahila kwawu kwakadi kuhumeka. Kulondelahu, akayilisha kwikala nawulunda weneni chikupu naYehova, anetejewi kudi yena hamu neyi anyanindi awamayala niawambanda, etejewa kudi Nzambi kwikala nawumi wahaya nyaka.—Aroma 8:21.

17. (a) Chumanyi chikamwekena Wanta kunsa yekombakaji danyaka? (b) Munjilanyi muchinekalili chalala nawu Wantowu ‘hiyamba kawukisañanaku’?

 ¹⁷ Dichi, mudimu waYesu yomweni nia 144,000 kutalisha kwiseki wakahimpa. Indi mudimu wawu wakumbidi wakekala mudimwinyi? Bayibolu hiyashimunaku. Ilaña neyi tukwikala ashinshika nakunyamuna wanta waNzambi, twakekala amomi hakumana kweKombakaji daNyaka Dakuyula nakwiluka chidi nkeñelu yaYehova kutalisha kudi wena cheñi nawa nikuyuma yakuhayamisha yamwiwulu niyahamaseki. Hela chochu, kuyula kwaKristu kwekombakaji danyaka ‘kwahaya nyaka’ nawa Wanta windi ‘hiyakawukisaku.’ (Danyeli 7:14) Munjilanyi? Muloña watachi wudi nawu, wuswa wakuyula kwindi hiyakawuhana kumakasa awantu akweti nkeñelu yacheñiku, muloña Yehova wakekala Nyuli. Cheñi, Wantiwu ‘hiyakawukisañanaku’ muloña yuma yiwunakoñi yakekalaku haya nyaka. (Danyeli 2:44) Nawa Kapristu Mwanta wawuMesiya hamu nialundanindi anyanta atupristu akayilemeshaña haya nyaka muloña wakushinshika hamudimu wawu kudi Yehova.

Kuhitulukamu kwaKuhanjeka

• Muloñadi Wanta waNzambi chiwunekalili chuma chakumanisha makabi awantu nkawawu? Mpinjinyi yikatachika kuyula Mwanta waWanta waNzambi?

• Chumanyi chinasweji kukuletela ikoku hansañu yaWanta waNzambi nihayuma yiwukakoña?

• Yumanyi yinakoñi Wanta yitunakumona namesu, nawa lubadinyi lutukweti?

[Malwihu aKuzatisha haKudiza]

[Mwevulu wudi hefu 92, 93]

Hampinji yikayulaña Wanta waNzambi, antu ejima akadiza kuloña