MPANJI 13

Abarahama—Ibwambu daNzambi

URI wadiña mukala wumu kwayiliwu antu nakushakama hanyima yaDibaji. Wekalili musumba wumu waya mpuhu nawa wadiña namatala amawahi. Ilaña antu adiñamu adiña nakudifukula kudi tunzambi twakutwamba. Dichiyelileñawu nimuBabeli nawa. Antu amuUri niamuBabeli hiyadiña neyi Nowa namwanindi Shemi atwalekelihu kumuzatila Yehovaku.

Nkumininaku, chimwahitili yaaka 350 hanyima yadibaji, Nowa wachikuhwelelu wafwili. Mwahitili hohu yaaka yiyedi iwu iyala yiwunakumona hamwevulu wavwalikili. Wadiña muntu walema kudi Nzambi. Ijina dindi wadiña Abarahama. Abarahama washakamineña mumusumba waUri hamu nichisaka chindi.

Ifuku dimu Yehova wamulejeli Abarahama nindi: ‘Shiyaku ituña daUri, wushiyi niantaña jeyi wuyi mwituña dinakakuleja.’ Komana Abarahama wamwovwahilili Nzambi nakushiya kunyima yuma yejima yayiwahi yamuUri? Eña, wamwovwahilili. Muloña wakwila Abarahama wadiña nakumwovwahila Nzambi mpinji yejima, dichamuteneneniwu nawu ibwambu daNzambi.

Chafuminiyi Abarahama muUri, akachisaka chindi amakwawu ayili nindi hamu. Wayili hamu nitata yindi Tera. Nimwihwindi Loti wayili nindi. Hamu tuhu niiñodindi Sara wayili nindi. Mukuhita kwampinji, ashikili wejima wawu heluña datenañawu nawu Harana, dihafwililiyi Tera. Adiña kwakulehi naUri.

Mukuhita kwampinji Abarahama niamwitala dindi afumini muHarana nakuya kwiluña datenañawu nawu Kenani. Kuna Yehova wahosheli nindi: ‘Idi didi ituña dinakayinka anyaneyi.’ Abarahama washakamineña mumatenti muKenani.

Nzambi wamukwashili Abarahama, hakwikala namulaka weneni wanyikoku nianyama amakwawu nimakulakaji awañamba. Ilaña Abarahama niSara hiyadiña nanyanaku.

Chashikijiliyi Abarahama yaaka 99, Yehova wahosheli nindi: ‘Nakukani nami wukekala tata yanyunza yawantu.’ Indi ichi chadi kuzatika ñahi muloña Abarahama naSara adiña ashinakaja dehi nankashi chakwila tuhu hiyanatweshi nikukwata kulusemuku?

Kutachika 11:27-32; 12:1-7; 17:1-8, 15-17; 18:9-19.