MPANJI 17

Ampamba Adiña Ambuka

AWA anyana awamayala ayedi adihanu ambuka chikupu, hidimuku? Wunayiluki majinawu? Chibinda diyi Esawu, hakwiliwu kansi wunakubiña anyikoku diyi Yakoba.

Esawu naYakoba adiña anyana awamayala ampamba aIsaka naRebeka. Tata yawantu, Isaka, wakeñeliku Esawu chikupu, muloña wadiña chibinda nanochu waleteleña yakudya hetala kulonda chisaka chidyeña. Ilaña Rebeka waswejeli kukeñaku Yakoba muloña wadiña mwana wamwena nawa wawunda.

Nkaaka yawu Abarahama wachidiña wamumi, dichi twatela kutoñojoka ochu Yakoba chatiyileñayi kuwaha kutiyilila kudi nkaaka yindi chadiñayi nakuhosha hadi Yehova. Nkumininaku, Abarahama chashikijiliyi yaaka 175 wafwili, henohu ampamba adi hohu nayaaka 15.

Chashikijiliyi yaaka 40 Esawu wasumbwili ambanda ayedi amwituña daKenani. Ichi chayineñesheli aYakoba naRebeka nankashi muloña ana ambanda hiyadiña nakudifukula kudi Yehovaku.

Dichi ifuku dimu chuma chimu chamwekeni, chaletesheli Esawu kumuhilila mana kwindi Yakoba. Mpinji yashikili yakeñeliyi Isaka kumukiswila mwanindi wamukulumpi. Chelili Esawu diyi wadiña mukulumpi hadi Yakoba, Esawu wakuhweleleli kutambula iji nkisu. Ilaña Esawu wadiña walandisha dehi wuswa windi wakutambula nkisu kudi Yakoba. Cheñi nawa, hampinji yasemukiliwu awa ampamba, Nzambi wahosheli nindi Yakoba wakatambula nkisu. Nawa ichi dichamwekeni. Isaka waheni nkisu kudi mwanindi Yakoba.

Hanyima yanichi, cheliliyi Esawu yeluki chumichi, wamuhililili Yakoba. Wahilili chakwila yahosha nikuhosha nindi chiña tuhu yokamujahi Yakoba. Rebeka chachitiyiliyi wakameneni nankashi. Dichi wamulejeli nfumwindi Isaka nindi: ‘Chikasweja kutama neyi Yakoba niyena yosumbula mumbanda wamuKenani.’

Isaka wamutambikili mwanindi Yakoba nakumuleja nindi: ‘Bayi wusumbula mumbanda wamunu muKenaniku. Dichi yaku kwitala dankaaka yeyi Betuweli kuHarana wakasumbuli mwana kamwanindi Labani.’

Yakoba wamutiyililili tata yindi hohenohu watachikiliku lwendu lwindi lwakuya kwadiña nakushakama antaña jindi kuHarana

Kutachika 25:5-11, 20-34; 26:34, 35; 27:1-46; 28:1-5; Aheberu 12:16, 17.