Dina Neñili Mukukala
MPANJI 20
Dina Neñili Mukukala
WUNAYIMONI antu anakwendelayi Dina? Nakuya nakuhempula anyana awambanda ashakamaña mumpata yaKenani. Indi tata yindi Yakoba wukutiya kuwaha hanichi? Hakwila nawu chitukwashiku kwakula ilu lwihu, anukaku chadiña nakutoñojokawu Abarahama naIsaka hadi ambanda amuKenani.
Komana Abarahama wakeñeleña nindi mwanindi Isaka asumbuli mumbanda wamuKenani? Inehi, hachikeñeliku. Indi Isaka naRebeka akeñeleña nawu mwanawu Yakoba asumbuli mumbanda wamuKenani? Inehi, hiyachikeñeliku. Wuneluki muloña waweni?
Muloña wadiña wakwila nawu awantu amuKenani adifukwileña kudi tunzambi twakutwamba. Hiyadiña antu amawahi atela kusumbwila hela kusumbukilakuku, nawa hiyadiña antu amawahi atela kudikwata nawu wubwambuku. Dichi tunateli kwiluka netu Yakoba hakutiya kuwaha hakumona neyi mwanindi wamumbanda nakwati wubwambu nawanyana awambanda amuKenaniku.
Dina chalala weñilili mukukala. Wunamumoni iwu iyala wakuKenani wunakumutala Dina hamwevulu? Ijina dindi diyi Shekemi. Ifuku dimu henjiliyi Dina nakuyendela, Shekemi wamusendeli Dina nakumukanjikija kukama nindi. Ichi chadiña chatama, muloña antu adisumbula hohu diwu atela kukama hamu. Ichi chuma chatama cheliliyi Shekemi chaleteli yikonkojola yamaneni.
Chachitiyiliwu ana kwa Dina, ahilili nankashi. Hakachi kawu awa ayedi, aSimeyona naLevi ahilili nankashi chakwila anoneli jimpoku jawu jatubali nakuya mumusumba nakukwata amayala chakuyibajimwisha. Simeyona niLevi niana kwawu ajahili Shekemi niamayala amakwawu. Yakoba wahilili nankashi muloña anyanindi akoñeli chuma chatama.
Indi iku kukala kwatachikili ñahi? Muloña wadiña wakwila nawu Dina wakwatili wubwambu nawantu abulileña kwovwahila nshimbi jaNzambi. Hitwatela kukwata wubwambu nawantu amuchidiwuku, hidimuku?
