MPANJI 15

Iñoda Loti Watalili Kunyima

LOTI nichisaka chindi ashakamineña hamu naAbarahama mwituña daKenani. Ifuku dimu Abarahama wamwilili Loti nindi: ‘Mpata yinakehi yayimuna yeyi niyamami. Mwani twambuki. Neyi wukuya kukabadi aka ami nukuya kukabadi kekwawu.’

Loti watalili mwaya mpata. Wamweni chibalu chimu champata yayiwahi chadiña namenji nimatahu amawahi chakudyishila ayimuna. Idi iluña dadiña hiNkambi yaYodana. Dichi Loti wayili kwenoku nichisaka chindi niyimuna yindi. Nkumininaku, atuñili mukala wawu mumusumba waSodoma.

Antu amuSodoma adiña atama nankashi. Ichi chamuneñesheli Loti muloña yena wadiña muntu wamuwahi. Nzambi niyena waneñeli nawa. Nkumininaku, Nzambi watemesheli añelu ayedi kuya nakumuleja Loti nindi hakukeña kujilumuna Sodoma nimusumba wukwawu wadiña kwakwihi waGomara, muloña wakutama kwawu.

Añelu amulejeli Loti nawu: ‘Nyakalaku! Sendaku ñodeyi nianyaneyi awambanda ayedi mufumi munu!’ Loti nichisaka chindi adiña nakulabajala, dichi añelu ayikwatili kumakasa nakuyidisha mumusumba. Dichi kañelu wumu wahosheli nindi: ‘Temukenu kulonda muhandi! Bayi mutala hanyimaku. Temukilenu kumpidi muloña abuli kuyijaha.’

Loti nianyanindi ovwahilili nawa afumini muSodoma. Hiyemeni hela chanteshaku. Nawa hiyatalili kunyimaku. Ilaña iñoda Loti hovwahilililiku. Hanyima yakwenda chintampu kufuma muSodoma, wemeni nakutala munyima. Dichi iñoda Loti hakubalumuka ilola damuñwa. Wunamumoni hamwevulu?

Tunatweshi kudizilaku chuma chimu. Chinakutuleja nawu Nzambi wapulwishaña antu amwovwahilaña, ilaña antu abulaña kumwovwahila akajimbesha wumi wawu.

Kutachika 13:5-13; 18:20-33; 19:1-29; Luka 17:28-32; 2 Petulu 2:6-8.