MPANJI 14

Nzambi Hakweseka Chikuhwelelu chaAbarahama

WUNELUKI chuma chinakukeñayi kwilayi Abarahama hanu? Wudi nampoku, nawa chinakumwekana neyi nakukeña kujaha mwanindi. Muloñadi chinakwililayi ichi? Tusambilenu kwiluka njila muyavweleliwu Abarahama naSara mwanawu.

Anukaku, Nzambi wayikanini nindi akavwala mwana weyala. Ilaña chamwekeni neyi hichuma chakala muloña Abarahama naSara adiña akula dehi. Hela chochu, Abarahama wakuhweleleli nindi Nzambi natweshi kwila chuma chamwekanaña neyi chakala kwila. Dichi chumanyi chamwekeni?

Hanyima yakwila Nzambi nakani dehi chikaninu chindi, mwahitili chaaka chamukuma. Chelili Abarahama nashikiji dehi yaaka 100, Sara niyena washikijili yaaka 90, avweli mwana weyala, amutumba nijina nawu Isaka. Nzambi wahembeli chikaninu chindi!

Ilaña chelili Isaka nakuli dehi, Yehova wesekeli chikuhwelelu chaAbarahama. Wamutambikili nindi: ‘Abarahama!’ Abarahama wakwili nindi: ‘Yamonu!’ Dichi Nzambi wamwilili nindi: ‘Sendaku mwaneyi, mwaneyi wumu hohu Isaka, wuyi kumpidi yinakakuleja. Kwenoku wakamujahi mwaneyi wakamuhani neyi mulambu.’

Mazu wenawa amuneñesheli Abarahama, muloña waswejeli kumukeña mwanindi nankashi. Nawa anukaku, Nzambi wamukanini Abarahama nindi anyanindi akashakama mwituña daKenani. Indi ichi chadi kazatika ñahi neyi Isaka wafwili? Abarahama hachitiyishiliku, hela chochu wamwovwahilili Nzambi.

Chashikiliyi kumpidi, Abarahama wamukasili Isaka nakumwinka hakameña katuñiliyi. Kutwala muna wanoneli mpoku kulonda amujahi nachu mwanindi. Ilaña hampinji yenoyu kañelu kaNzambi hakumutambika nindi: ‘Abarahama, Abarahama!’ Yena hakwakula nindi: ‘Yamonu!’

Nzambi wahosheli nindi: ‘Bayi wumukatisha mukwenzi hela kumwila chuma chidi chejimaku. Ichi neluki dehi nami wankuhwelela, muloña hiwunañumini mwaneyi, yowu weyi wumu hohuku.’

Ochikuhwelelu cheneni chadiña naAbarahama hadi Nzambi! Wakuhweleli nindi kwosi chuma chakala kudi Yehovaku, nawa Yehova wadi kamusañula Isaka kufuma kudi afu. Ilaña hiyadiña nkeñelu yaNzambi yakwila nindi Abarahama amujahi Isakaku. Dichi Nzambi welishili mukoku kukakela muyiputa yadiña kwakwihi, dichi wamulejeli Abarahama kulambula mukoku mwiluña damwanindi.

Kutachika 21:1-7; 22:1-18.