Yakoba Nayi kuHarana
MPANJI 18
Yakoba Nayi kuHarana
WUNAYILUKI awa amayala anakuhoshayi nawu Yakoba? Hanyima yakwenda mafuku amavulu, Yakoba wayiwanini kwishima. Adiña nakubiña nyikoku yawu. Yakoba wayihwili nindi: ‘Munafumi kudihi?’
Ahosheli nawu, ‘KuHarana.’
Yakoba wayihwili nindi; ‘Mwamwiluka Labani?’
Amwakwili nawu, ‘Eña.’ ‘Talaña mwanindi wamumbanda Racheli iwu wukwinziwu namulaka wanyikoku yatata yindi.’ Wunamumoni Racheli ona wunakwinza kuna?
Yakoba chamweniyi Racheli nanyikoku yamandumi yindi Labani, wayili nakulañumuna ilola dadiña heshima kulonda anyikoku anwi menji. Dichi Yakoba hakumupwepujola Racheli nawa hakudilumbulula. Racheli watiyili muzañalu nankashi, dichi wayili kwitala nakumuleja tata yindi Labani.
Labani watiyili kuwaha nankashi hakumutambwila Yakoba kulonda ashakameña nindi. Nawa chelili Yakoba amwihwuli jakusumbula Racheli, Labani watiyili kuwaha. Hela chochu, Labani wamulejeli Yakoba kuzata mwiha dindi hadi yaaka yitanu nayiyedi kulonda akamwinki Racheli. Cheliliyi Yakoba waswejeli kumukeña Racheli wamuzatilili. Ilaña chelili mpinji yakumusumbula yinashikili dehi, wuneluki chamwekeni?
Labani wamwinkeli mwanindi wamukulumpi Leya mwiluña daRacheli. Cheliliyi Yakoba eteji kumuzatila Labani yaaka yikwawu yitanu nayiyedi, Labani wamwinkeli Racheli kulonda ekali iñodindi cheñi. Munoyu mpinji Nzambi wetejeli amayala kusumbula ambanda kubadika hawumu. Ilaña katataka, Bayibolu yamwekeshaña nawu, iyala watelela kusumbula mumbanda wumu hohu.
