MPANJI 19

Yakoba Wudi naChisaka Cheneni

TALAÑA ichi chisaka cheneni. Awa diwu anyana kaYakoba 12 awamayala. Wadiña cheñi nawanyana awambanda. Wunayiluki majinawu awa anyana? Twayenu twilukihu majina awanyana amu.

Leya wavweli Rubeni niSimeyona, niLevi niYuda. Racheli chamweniyi nindi hadiña nakuvwala anyanaku, waneñeli nankashi. Dichi wamwinkeli Yakoba nduñu yindi Biliha, Biliha wavweli anyana awamayala ayedi Dani niNafwatali. Dichi Leya niyena wamwinkeli Yakoba nduñu yindi Zilipa, Zilipa wavweli Gadi niAsheri. Nkumininaku Leya wavweli cheñi anyana awamayala ayedi, Isakari niZebuluni.

Nkumininaku Racheli wavweli mwana. Wamutumbili ijina nindi Yosefu. Kumbidi tukudiza jajivulu hadi Yosefu muloña wekalili muntu walema nankashi. Awa diwu anyana awamayala 11 avweliyi Yakoba hampinji yashakamineñayi natata yaRacheli Labani.

Yakoba wadiña cheñi nawanyana awambanda, ilaña Bayibolu yahosha hohu hadi ijina damwana wumu. Ijina dindi diyi Dina.

Mpinji yashikili yakeñeleñayi Yakoba kufuma kudi Labani kulonda afunti kuKenani. Dichi wapompesheli chisaka chindi cheneni hamu ninyilaka yindi yawanyikoku niañombi nakuya lwendu lwalulehi.

Chafuntiliyi Yakoba nichisaka chindi muKenani mwahitili hohu mpinji yantesha, Racheli wavweli mwana weyala mukwawu. Wamuvweleli henohu achidi munjila. Racheli wakabakeni nankashi, nkumininaku wafwilili hakupaapa. Ilaña mukeki weyala wahandili. Yakoba wamutumbili ijina nindi Benjamini.

Tunakukeña kwanuka majina awanyana kaYakoba awamayala 12 muloña nyunza yejima yaIsarela yafuma mudi wena. Cheñi nyitaña 12 yamuIsarela ayitumba majina kufuma kudi anyana kaYakoba 10 awamayala nianyana kaYosefu ayedi awamayala. Isaka wahandili mafuku amavulu hanyima yakusemuka kwanawa anyana awamayala. Nawa watela wadiña namuzañalu hakwikala nawejikulu amavulu. Ilaña twayenu tutali chamwekeni kudi mwijikulwindi wamumbanda Dina.

Kutachika 29:32-35; 30:1-26; 35:16-19; 37:35.