MPANJI 23

Yilota yaFwaro

MUNAHITI dehi yaaka yiyedi, nawa Yosefu wuchidi mukaleya. Mukwakutwala lupasa hamwanukiliku. Ifuku dimu nampinji yawufuku, Fwaro hakulota yilota yiyedi yalema nankashi, dichi hakujinoka chiyalumbuluka. Wunamumoni chinakamiyi ahana? Chikwelili ntetemena Fwaro hakutambika antu jindi akwamaana nakuyawilamu yuma yaloteliyi. Ilaña akañenyi kumuleja mwalumbulukila yilota yindi.

Nkumininaku mukwakutwala lupasa hakumwanuka Yosefu. Hakumuleja Fwaro nindi: ‘Mpinji yinadiña mukaleya mwadiña muntu wadiña nakulumbulula yilota.’ Fwaro wamufumishili Yosefu mukaleya chakubula nikunata mpinji.

Fwaro hakumuleja Yosefu yilota yindi nindi: ‘Namona añombi anyikaji amawahi atanu nayedi. Kutwalamuna hinukumona cheñi añombi anyikaji akosa atanu nayedi. Añombi akosa hiyakudya añombi amaneni.

‘Muchilota chami chamuchiyedi namona nyitu yatidiku yitanu nayiyedi yakola, yinakumena kwishina dimu. Hinukumona cheñi nyitu yanyanya yominina yitanu nayiyedi. Nyitu yanyanya yominina yatachikili kuminya yina nyitu yitanu nayiyedi yayiwahi.’

Yosefu hakumuleja Fwaro nindi: ‘Yilota yiyedi yinakulumbulula chuma chimu. Añombi atanu nayedi atoha ninyitu yayiwahi yatidiku yitanu nayiyedi, hiyaaka yitanu nayiyedi. Niañombi atanu nayedi akosa ninyitu yatidiku yominina yinakulumbulula yaaka yikwawu yitanu nayiyedi. Kwakenza yaaka yitanu nayiyedi yikasweja kwidika yakudya muEjipitu. Kwakekala cheñi yaaka yitanu nayiyedi yikabula kwidika yakudya.’

Dichi Yosefu hakumuleja Fwaro nindi: ‘Tondaku muntu wamaana kulonda wumwilishi mukulumpi wakupompesha yakudya haniyi yaaka yitanu nayiyedi yayiwahi. Antu hiyakafwa nanzala hampinji yakalondelahu yaaka yitanu nayiyedi yatama yakañulawu yakudya yanteshaku.’

Fwaro watiyili kuwaha namazwawa. Dichi hakumutonda Yosefu kulonda apompeshi yakudya nakuyihemba. Yosefu diyi chinlonda chaFwaro nawa nekali muntu walema nankashi muEjipitu.

Chimwahitili yaaka yitanu nayisatu, hampinji yanzala, Yosefu hakumona antu anakwinza. Wunayiluki wenawa antu? Diwu ana kwindi awakulumpi 10! Tata yawu Yakoba nayitumi kuEjipitu muloña hiyakweti yakudya kumukala wawu kuKenaniku. Yosefu hakuyiluka ana kwindi, ilaña wena hiyamwilukiluku. Wuneluki chanabuliliwu kumwiluka? Muloña Yosefu wakulili nankashi nawa wavwalili yikovwelu yamuchidi wacheñi.

Yosefu hakwanuka nindi chadiñayi kansi waloteli ana kwindi anakwinza nakumufukamina. Wunakwanuka kutañahu nsañwiyi? Dichi Yosefu hakwiluka nindi Nzambi diyi wamutemesheli kuEjipitu nawa hamuloña washikila. Wunatoñojoki neyi Yosefu welili chumanyi? Twayenu tutali ntahi.

Kutachika 41:1-57; 42:1-8; 50:20.