MPANJI 26

Yoba Washinshika Kudi Nzambi

WUNAMUTIYILI wushona iwu iyala wakata? Ijina dindi diyi Yoba, hakwila iwu mumbanda diyi iñodindi. Wuneluki chinakumulejayi Yoba? ‘Muhoshi Nzambi chatama, wufwi kweyi.’ Twayenu tutali chaletesheli yahoshi mazu amuchidiwu, nimuloña waweni wakabakeneniyi Yoba nankashi.

Yoba wadiña muntu washinshika nawa wamwovwahilili Yehova. Washakamineña mwituña daUzi, kwakwihi naKenani. Yehova wamukeñeli Yoba nankashi, ilaña kwadiña muntu wamuheleli. Wunamwiluki yenowu muntu?

Wadiña Satana Diyabolu. Anukaku, Satana diyi kañelu watama wamuhela Yehova. Diyi wakojejeli Adama niEvu abuleña kumwovwahila Yehova. Cheñi nawa watoñojokeli nindi watela kwilisha antu ejima kubula kumwovwahila Yehova. Hanu dinu watwesheli? Inehi. Toñojokaku hadi amayala nawambanda achikuhwelelu amavulu yitunadizihu. Wunatweshi kutenahu añahi majina?

Chafwiliwu aYakoba naYosefu muEjipitu, Yoba diyi muntu wadiña wamukuhwelela Yehova mukaayi kejima. Yehova wakeñeli Satana yeluki nindi hanatweshi kwilisha antu ejima kukoñaña yuma yatamaku, dichi Yehova wahosheli nindi: ‘Mushinshiki Yoba. Wunamoni ochankuhwelelayi.’

Satana watadikili nindi, ‘Wakukuhwelela muloña wamukiswila nawa wamuhetesha yuma yayivulu yayiwahi. Ilaña neyi wukumutambula yuma, wukukutuka.’

Dichi Yehova wamwilili nindi: ‘Ilaku. Mutambuli yuma yejima. Ilaku yuma yatama yejima yiwunakukeña kumwila Yoba. Tukutala neyi wukuntuka. Ilaña bayi wumujahaku.’

Chakusambila, Satana welishili antu kwiya añombi jaYoba niangameli nianyikoku jindi ayijahili. Chalondelelihu wajahili anyanindi 10 awamayala niawambanda nampepela. Kulondelahu, Satana wamukatishili Yoba nayikatu yatama chikupu. Yoba wayandili nankashi. Dimuloña waweni iñoda Yoba chinakumulejelayi nindi: ‘Muhoshi Nzambi chatama wufwi.’ Ilaña Yoba hachililiku. Cheñi nawa, amabwambu jindi akutwamba asatu enjili nakumwila nawu wahandili chihandilu chatama. Ilaña Yoba watwalekeli kwikala washinshika.

Ichi chamuzañalesheli Yehova nankashi, nawa hanyima yanichi wamukiswilili Yoba neyi chiwunakumona hamwevulu. Wamukili yikatu yindi. Yoba wavweli cheñi anyana 10 alubanji nawa waheteli añombi, ninyikoku niangameli mapampa kayedi kuvula kubadika hakusambila.

Wunatweshi kumukuhwelela Yehova mpinji yejima neyi chadiñayi Yoba? Neyi wumukuhwelela, Nzambi wakakukiswila nineyi. Wukatwesha kushakama haya nyaka hampinji yakelishayi iseki dejima kwikala dadiwahi neyi itempa daEdeni.

Yoba 1:1-22; 2:1-13; 42:10-17.