Yosefu Anamuheli Kudi Ana Kwindi
MPANJI 21
Yosefu Anamuheli Kudi Ana Kwindi
TALAÑA iwu mukwenzi chinakumwekanayi kuzeya nikuneña. Diyi Yosefu. Ana kwindi anamulandishi kudi awa amayala anakuya kuEjipitu. Kuna kwakuyayi, Yosefu akumwilisha nduñu. Muloñadi ana kwindi chaneliliwu chuma chatama ñana? Muloña anamutiyili Yosefu ichima.
Tata yawu Yakoba wamukeñeli Yosefu nankashi. Wamwekesheli kukeña kweniku kuhitila mukumuchimina chikovwelu chachilehi nawa chachiwahi. Ana kwindi 10 awakulumpi chamweniwu nawu Yakoba waswejeli kumukeña Yosefu, atachikili kumutiyila ichima nakumuhela nawa. Ilaña kwadiña cheñi muloña wukwawu wamuheleleliwu.
Yosefu waloteli yilota yiyedi. Muyilota yaYosefu yejima yiyedi, ana kwindi adiña nakumufukamina. Yosefu chayilejeliyi ana kwindi iyi yilota, nkunyi yaswejeleliku chikupu.
Ifuku dimu chadiñawu ana kwa Yosefu awakulumpi nakubiña nyikoku yatata yawu, Yakoba wamutemesheli Yosefu kulonda ayi nakutala chanakuhandawu ana kwindi. Ana kwa Yosefu chanamumoniwu nakwinza, amakwawu hiyakuhosha nawu: ‘Tumujahenu!’ Ilaña Rubeni mana kwawu wamukulumpi, hakuhosha nindi: ‘Inehi, bayi mwilochuku!’ Ilaña hiyakumukwata Yosefu nakumuumbila muwina mwakadi menji. Kufumahu ashakama nihamu nakudikasa kulonda eluki mwakumwilila.
Haniyi mpinji amayala eniIshimeli adiña nakuhita. Dichi Yuda hakuhosha nawa ana kwindi nindi: ‘Tumulandishenu nawa Ishimeli.’ Ichi dichuma chaneliwu. Hiyakumulandisha Yosefu namali asiliva 20. Owu wulumbu nikubula luwi wuyadiñawu nawu!
Indi ana kwindi akamuleja tata yawu nawudi? Hiyakujaha mpembi anona nichikovwelu chaYosefu chachiwahi hiyakuchiputa mumashi ampembi mapampa namapampa. Hiyakutwala chikovwelu kudi tata yawu Yakoba nakumuleja nawu: ‘Twawana chumichi. Chishinshiki kulonda wumoni neyi hichikovwelu chaYosefuku.’
Yakoba hakwiluka nindi dichu. Yakoba hakudila nindi, ‘Chisumi namujahi Yosefu.’ Ichi dichinakukeñawu ana kwa Yosefu nawu tata yawu yatoñojoki mwenimu. Yakoba hakuneña nankashi. Hakudila hadi mafuku amavulu. Ilaña Yosefu hafwiliku. Twayenu tutali chamumwekeneneni kwamutwaliliwu.
