Yosefu Anamushi Mukaleya
MPANJI 22
Yosefu Anamushi Mukaleya
YOSEFU wadiña hohu nayaaka 17 hampinji yamutwaliliwu kuEjipitu. Kwenakuna amulandishili kudi muntu wejina daPotifwari. Potifwari wazataña kudi mwanta wamuEjipitu wejina daFwaro.
Yosefu wazataña nañovu kudi mwanta windi Potifwari. Dichi cheliliyi Yosefu nakuli dehi, Potifwari hakumwilisha kapitawu wahetala dindi. Hanu dinu, muloñadi Yosefu chanekaliliyi munu mukaleya? Muloña wañoda Potifwari.
Yosefu wakulili nakwikala iyala walubanji, dichi iñoda Potifwari hakumukeñesha nindi akami nindi. Ilaña Yosefu neluki nindi hichuma chatama, nawa hanatweshi kuchilaku. Iñoda Potifwari hakuhila nankashi. Chanafuntiyi nfumwindi kwitala, hakutwamba nindi: ‘Ona Yosefu watama, wakeñaña nindi nikami nindi!’ Potifwari hakutiyilila mwizu dañodindi, nawa hakuzuwa nankashi naYosefu. Dichi wamushili Yosefu mukaleya.
Mukwakuhemba kaleya hakumona nindi Yosefu himuntu wamuwahi. Dichi hakumwilisha mukwakuhemba ankoli ejima adi mukaleya. Chimwahitili mafuku Fwaro hiyakumuhilisha kudi mukwakutwala lupasa nimukwakutuña mankendi, hohenohu hakuyisha mukaleya. Ifuku dimu nawufuku, wejima wawu ayedi hiyakulota yilota yalema, ilaña kwiluka mwaya kulumbulula kwayilota yawu nehi. Chikwachili, Yosefu hakuhosha nindi: ‘Nlejenu yilota yenu.’ Chanamulejiwu, kuhitila muñovu yaNzambi, Yosefu hakuyileja mwalumbulukila yilota yawu.
Kudi mukwakutwala lupasa Yosefu hakumuleja nindi: ‘Mumafuku asatu akukufumisha mukaleya nawa wukatwalekahu kwikala mukwakutwala lupasa cheñi kudi Fwaro.’ Dichi Yosefu hakubombelahu nindi: ‘Chiwafuma mukaleya, wumulejimu Fwaro hadami nawa wunkwashiku kulonda nidiki mudinu iluña.’ Ilaña kudi mukwakutuña mankendi, Yosefu hakumuleja nindi: ‘Mumafuku asatu hohu Fwaro wukakuketula mutu.’
Mukuhita kwamafuku asatu dimu chamwekeneni neyi chochahosheliyi Yosefu. Fwaro hakuketula mutu wamukwakutuña mankendi. Mukwakutwala lupasa hiyakumufumisha mukaleya nawa hakutachika nikukalakala cheñi kudi mwanta. Ilaña mukwakutwala lupasa hakumuvulamena Yosefu! Hamulejelimu Fwaro hadi Yosefuku, dichi Yosefu hakushakama mukaleya.
