MPANJI 24

Yosefu Hakuyeseka Ana Kwindi

YOSEFU nakukeña kwiluka neyi ana kwindi 10 awakulumpi achidi nawulumbu nikubula luwi. Dichi hakuhosha nindi: ‘Mudi akwakwendesha ituña. Munenzi nakutala hazeyela ituña detu.’

Hiyakuhosha nawu, ‘Inehi, hitudi akwakwendesha ituñaku. Tuyantu alala. Wejima wetu tuyanyana kamuntu wumu. Twadiña 12. Ilaña mana kwetu wumu wajimbala dehi, kabinda nashali kumukala natata yetu.’

Yosefu hakudifwikija neyi hiyanakuhosha mwalalaku. Hakuhemba mana kwindi wejina daSimeyona mukaleya, nakumbaku ana kwindi kulonda asendi yakudya nakuya kumukala. Dichi hakuyileja nindi: ‘Chimwakafunta, chiña mwakamuleti kabinda kenu.’

Chanafuntiwu kuKenani, ana kwindi hiyakumulejamu tata yawu Yakoba yuma yejima yamwekeni. Yakoba hakuneña nankashi. Hakudila nindi, ‘Yosefu kwosi Simeyona niyena kwosi. Hinukuyiteja kumusenda mwanami wakansi Benjaminiku.’ Ilaña chelili yakudya hiyikumana, Yakoba hakuyiteja kumusenda Benjamini kuEjipitu kulonda akalandi yakudya yikwawu.

Yosefu hakumona ana kwindi anakwinza. Hakutiya muzañalu hakumona mwanyikindi Benjamini. Mwalala hakachi kawu hosi niwumu wuneluki nindi iwu muntu walema diyi Yosefuku. Aha Yosefu dihu heliliyi chuma chimu chakuyeseka nachu ana kwindi 10.

Hakuyileja añamba jindi kuyinzeshela jinjeki jawu jejima nayakudya. Ilaña chakubula wena kwiluka, hakunona cheñi lupasa lwindi lwasiliva enka nimunjeki yaBenjamini. Hanyima yakwila wejima wawu anayi dehi nawa anendiku dehi chintampu chantesha munjila, Yosefu hakutemesha añamba jindi kuyilondela. Chanayiwaniwu, añamba hiyakuhosha nawu: ‘Muloñadi chimuneyili lupasa lwasiliva lwamwanta wetu?’

Ana kwindi ejima hiyakuhosha nawu, ‘Hituneyi lupasa lwindiku. Neyi mukuwana lupasa namuntu wudi wejima, owu muntu mukumujaha.’

Dichi añamba hiyakutala mujinjeki jejima, hiyakuwana lupasa munjeki yaBenjamini neyi chochiwunakumona hanu. Añamba hiyakuhosha nawu: ‘Enu wejima wenu yenuña, ilaña Benjamini wukushala nanetu.’ Chumanyi chikwilawu ana kwindi 10?

Wejima wawu hiyakufunta naBenjamini kwitala daYosefu. Yosefu hakuyileja ana kwindi nindi: ‘Enu ejima diyilenu tuhu, ilaña Benjamini wukushala kulonda ekali nduñu yami.’

Yuda hakuhosha nindi: ‘Neyi nukuya kumukala chakadi kansi, tata yami wukufwa muloña wamukeña nankashi. Dichi dinu mwani, anhembi ami kunu neyi nduñu yenu, ilaña amuleki kansi ayi kumukala.’

Yosefu hakumona neyi ana kwindi anafutumuki. Hiyadi nawulumbu nikubula luwi cheñiku. Tutalenu ntahi chuma cheliliyi Yosefu.

Kutachika 42:9-38; 43:1-34; 44:1-34.