Chikaninu chaYefwata
MPANJI 53
Chikaninu chaYefwata
WAKANAHU dehi chikaninu nkumininaku wukañanya kuchishikija? Dicheliliyi iwu iyala wudi hamwevulu, nawa dimuloña waweni wunaswejeliyi kuneña. Iwu iyala hinsompeshi womika wamuIsarela, ijina dindi diyi Yefwata.
Yefwata washakamaña mumpinji yanalekiwu aIsarela kudifukula kudi Yehova. Anakwila yuma yatama cheñi. Dichi Yehova hakuyileka antu akuAmoni ayikabishi. Ichi hichikuletesha aIsarela kumudilila Yehova nawu: ‘Tunakuvulumuni. Atwipulwishi mwani!’
Antu hiyakulomba kwanakena hayuma yatama yanakoñuwu. Anamwekeshi nawu anachileki kuhitila mukudifukula cheñi kudi Yehova. Dichi Yehova hakuyikwasha cheñi.
Yefwata anamusakuli kudantu kulonda ayi nakulwa nawaAmoni atama. Yefwata hakukeñesha nindi Yehova amukwashi kulwa njita. Dichi hakumukana Yehova nindi: ‘Neyi wukuñilisha nishindi aAmoni, muntu watachi wakafuma mwitala dami nakumbulakana hinakafuma nakushinda nakakwinkayi.’
Yehova hakutiya chikaninu chaYefwata, nawa hakumukwasha kulonda ashindi. Chafuntiliyi Yefwata kwitala, wunamwiluki muntu watachi wukwinza nakumubulakana? Himwanindi wamumbanda, mwanindi wumu hohu. Yefwata hakudila nindi, ‘Yo-o, mwanami! Ochineñi chiwunakunletela. Ilaña namukanini dehi Yehova, nawa hinatweshi kubalumukamuku.’
Chelili mwana kaYefwata wamumbanda yeluki chikaninu chatata yindi, hakusambila niyena hakuneña. Muloña chinayi mukwila nawu, wukushiya tata yindi nimabwambu jindi. Ilaña wukamukalakelaña Yehova mutabanaka yindi kuShilo muchihandilu chindi chejima. Dichi hakumuleja tata yindi nindi: ‘Neyi wakwata dehi chikaninu naYehova watela kuchishikija.’
Dichi mwana kaYefwata wamumbanda hakuya kuShilo, hakuhanda chihandilu chindi chejima nakumukalakela Yehova mutabanaka. Mafuku awana hachaaka hachaaka ambanda amuIsarela ayaña nakumuhempula, nawa adi namuzañalu wejima wawu. Antu amukeña mwana kaYefwata muloña hiñamba wamuwahi waYehova.
