MPANJI 49

Itañwa Dinemani Kuka-a

TALAÑA Yoshuwa. Nakuhosha nindi: ‘Itañwa, imanaku kuka-a!’ Niitañwa hidikwimana kuka-a. Demeni hamu mukachi kewulu ifuku damukuma. Yehova welishili kulonda chizatiki! Ilaña tutalenu muloña wunakukeñelayi Yoshuwa nindi itañwa ditwalekihu kutoñeka.

Chelili anyanta atanu atama amumpata yaKenani atachiki kulwa naGibeyoni, aGibeyoni hiyakutemesha muntu nakumulomba Yoshuwa kulonda ayikwashiku. Hakuhosha nindi: ‘Nyakalenu mwinzi kudetu! Tupulwishenu! Anyanta ejima ashakama mwituña damapidi anenzi nakulwisha ambuñeyi.’

Hohenohu Yoshuwa niantu jindi anjita ejima hiyakuya. Hiyakwenda wufuku wejima. Chanashikiwu kuGibeyoni, amashidika awanyanta atanu hiyakutiya woma, dichi hiyakutachika nikutemuka. Yehova hakunokesha nvula yamalola yeneni, dichi amashidika amavulu hiyakufwa kunvula yamalola kubadika ana ajahiliwu kudi amashidika aYoshuwa.

Yoshuwa hakumona neyi itañwa keña dihumi. Kukwikala mwidima, dichi amashidika amavulu awanyanta atanu atama akutemuka. Dimuloña waweni Yoshuwa chalombeliyi kudi Yehova nindi: ‘Itañwa imanaku kuka-a!’ Itañwa chidatwalekilihu kutoñeka, aIsarela hiyakutwesha kushinda njita.

MuKenani muchidi anyanta amavulu atama ahela antu jaNzambi. Hichikumusendela Yoshuwa niamashidika indi yaaka yitanu nachimu hakwila nawu atweshi kushinda anyanta 31 munidi ituña. Chakumishiliyi, Yoshuwa hakumona neyi ituña daKenani datela kudanzañena kudi yina nyichidi yinakankili iluña.

Mwahitili yaaka yayivulu, nkumininaku Yoshuwa wafwili nayaaka 110 yakusemuka. Hampinji yadiñayi wamumi hamu nawamabwambu jindi, antu amwovwahila Yehova. Ilaña chineli antu amawahi anafwi dehi, antu hiyakutachika kukoña yuma yatama nakwiñila mukukala. Iyi mpinji diyinakukeñawu wukwashi waNzambi.

Yoshuwa 10:6-15; 12:7-24; 14:1-5; Ansompeshi 2:8-13.