MPANJI 55

Kansi Weyala haKukalakela Nzambi

IWU komana hikansi weyala walubanjiku? Ijina dindi diyi Samweli. Iyala wunamunañiki Samweli chikasa mumutu diyi kapristu muneni wamuIsarela Eli. Iwu diyi tata yaSamweli Elekana nimama yindi Hana anakumuleta Samweli kudi Eli.

Samweli wudi hohu nayaaka yiwana hela yitanu. Ilaña wukushakamaña hatabanaka yaYehova naEli niatupristu amakwawu. Muloñadi aElekana naHana chakuhaninawu kansi wanyanya wudi neyi Samweli kulonda akalakaleña hatabanaka yaYehova? Tutalenu ntahi.

Munahiti hohu yaaka yantesha henohu ichi kanda chizatiki, Hana wadiña nachineñi nankashi. Muloña wakwila hadiña nakukwata kulusemuku, dichi wakeñeleña mwana nankashi. Ifuku dimu Hana chayiliyi kutabanaka yaYehova walombeli nindi: ‘Eyi Yehova bayi wunvulamenaku! Neyi wukunyinka mwana weyala, nakani nami nakakwinkayi kulonda akakukalakeli mukuhanda kwindi kwejima.’

Yehova wakwili kulomba kwaHana, chimwahitili tukweji hakuvwala niSamweli. Hana wamukeñili mwanindi weyala nankashi, nawa watachikili kumutañisha mazu aYehova henohu wuchidi wanyanya. Hakumulejamu nfumwindi nindi: ‘Chakulayi Samweli neyi nasumuki dehi, nakamutwala kutabanaka kulonda akamukalakeleña Yehova.’

Ichi dichitunakumona aHana niElekana chinakwilawu hamwevulu. Namuloña wakwila Samweli amudizishili chiwahi kudanvwali jindi, wudi namuzañalu wakumukalakela Yehova kwitenti Dindi. Hachaaka hachaaka Hana naElekana enzaña nakudifukula kunidi itenti dalema, ninakuhempula mwanawu weyala. Nawa hachaaka hachaaka Hana wamuleteleleña Samweli chikovwelu chakuhatula makasa chachiha.

Chimunahiti yaaka, Samweli hakutwalekahu kumukalakela Yehova kutabanaka, nawa hiyakumukeña kudi Yehova nikudantu nawa. Ilaña anyana kakapristu muneni Eli awamayala aHofwini naFwinehasi atama. Elaña yuma yayivulu yatama, nakwilisha antu amakwawu kudikaña naYehova. Eli watela kuyilekesha kuzata neyi atupristu, ilaña hanayilekeshiku.

Mukwenzi Samweli haneteji yina yuma yatama yazatikaña hatabanaka kumulekesha kumukalakela Yehovaku. Muloña wakwila antu antesha hohu diwu amukeña Yehova, munahiti mpinji yayilehi nampinji yahosheliyi Yehova namuntu wudi wejima. Chanakuliyi Samweli chantesha, ichi dichinamwekani:

Izu hidikumuhindwisha Samweli hampinji yanakamiyi mutabanaka. Hakwakula nindi: ‘Yamonu.’ Hakuhinduka nakuya kudi Eli nakumuleja nindi: ‘Wantambika, yamonu.’

Ilaña Eli hakwakula nindi: ‘Hinakutambikaku; funtaku wukakami.’ Samweli hakufunta nakukama.

Izu hidikumutambika kamuchiyedi nawu: ‘Samweli!’ Dichi Samweli hakuhinduka cheñi nakuya kudi Eli. Samweli hakumwila nindi, ‘Wantambika, yamonu.’ Ilaña Eli hakwakula nindi: ‘Hinakutambikaku mwanami, funtaku wakakami.’ Samweli hakufunta mukadidi.

Izu hidikutambika kamuchisatu nawu, ‘Samweli!’ Samweli hakuya kudi Eli. Hakuhosha nindi: ‘Yamonu, ichi dinu yeyi wunantambiki.’ Eli yeluka nikwiluka nindi chiña Yehova diyi wunakumutambika. Dichi hakumuleja Samweli nindi: ‘Yaña wakakami, neyi nakutambiki cheñi wukuhosha neyi: “Hoshaña Yehova, ami kambuñeyi nidi nakutiya.”’

Ichi dichinahoshiyi Samweli chanamutambikiwu cheñi kudi Yehova. Yehova hakumuleja nindi wakamubabesha Eli nianyanindi awamayala hamu. Chimwahitili mafuku aHofwini naFwinehasi hiyakufwa kunjita yawaFwilistinu, nawa chanachitiyiyi Eli hakuhinuka nakudikotola nshiñu yindi yofwa nikufwa. Dichi izu daYehova hidikwikala dalala.

Samweli wakulili nakwikala nsompeshi wakukumishaku muIsarela. Chanashinakajiyi antu hikumuleja nawu: ‘Tondaku mwanta wakutuyula.’ Samweli hanakeñi kwila mwenimuku, muloña Yehova diyi mwanta wawu. Ilaña Yehova hakumuleja nindi ayitiyilili antu.

1 Samweli 1:1-28; 2:11-36; 4:16-18; 8:4-9.