MPANJI 41

Kapela kaWuneñu

INDI kana, kanakumwekana neyi kapela kakeni kanadipoteli kumutondu? Hidikuku. Hikapela kakwila nawuneñu. Yehova wamulejeli Mosi kukisha kumutondu kulonda antu akutalaku ahandi. Ilaña tupela tukwawu tudi hamaseki twalala. Tunayisumoni antu nakuyiletela yikatu. Wuneluki muloña waweni?

Muloña wudi wakwila nawu aIsarela anamutobeli Nzambi niMosi. Anatobi nawu: ‘Muloñadi chiwatufumishilili muEjipitu kulonda tufwili mwisaña? Munu mwosi yakudya nimenji. Hitunatweshi kudya manina cheñiku.’

Ilaña manina hiyakudya yayiwahi. Yehova wayinkeli kuhitila muchihayamisha. Nawa wayinkeli nimenji kuhitila muchihayamisha. Ilaña antu hiyanakusakilila chayihembeleñayi Nzambiku. Dichi Yehova hakutemesha atupela akweti wulembi watama kulonda kubabesha nachu aIsarela. Atupela hiyakuyisuma nawa antu amavulu hiyakufwa.

Nkumininaku antu hiyakwinza kudi Mosi nakumuleja nawu: ‘Tunavulumuni muloña tunatobeli Yehova nineyi. Dichi lombaku kudi Yehova kulonda afumishi itu tupela.’

Mosi hakuyilombelaku antu. Yehova hakumuleja Mosi kwila aka kapela kawuneñu. Hakuhosha nindi kishi kumutondu, dichi muntu wudi wejima wukusumawu watela kutalaku. Mosi hakwila neyi momwanahoshiyi Nzambi. Antu asuminiwu chatalawu kukapela kawuneñu, hiyakukola cheñi.

Aha hadi chuma chitukudizilahu. Wejima wetu, tudi munjila neyi ana aIsarela asuminiwu kudi atuna tupela. Wejima wetu tudi muchihandilu chakufwa. Talaña kwejima, wukumona kwila neyi antu anakushinakaja, anakukata nikufwa. Ichi chinekali ñana muloña iyala watachi nimumbanda watachi, Adama naEvu amuvulumwini Yehova, nawa wonsu wetu tuyanyanawu. Ilaña Yehova welisha njila kulonda tukahandi haya nyaka.

Yehova watemesheli Mwanindi Yesu Krisitu hamaseki. Yesu amujahililili hamutondu muloña antu amavulu atoñojokeli nawu wadiña muntu watama. Ilaña Yehova waheni Yesu kulonda kutuhandisha. Neyi tukutala kudi yena, neyi tukumulondela, dikwila nawu twakekala nawumi wahaya nyaka. Ilaña tukadiza yuma yayivulu hadi iji kumbidi.

Kuchinda 21:4-9; Yowanu 3:14, 15.