MPANJI 39

Mbwechi yaAroni Yinakenuki Nkenu

TALAÑA nkenu ninsala jaha jinakusoña kuniyi mbwechi. Iyi diyi mbwechi yaAroni. Iji nkenu ninyikabu yaha jasoñeli kumbwechi yaAroni muwufuku wumu hohu! Tutalenu chiyasoñeleleli.

A Isarela analuluti dehi mwisaña hampinji yantesha. Antu amakwawu hiyakutoñojoka nawu Mosi hatela kwikala nlomboliku, hela Aroni hanateli kwikala kapristu muneniku. Kora diyi wunakutoñojoka mwenimu, niDatani, niAbirami hamu nawa nlomboli awantu 250. Wejima wawu hiyakwinza nakuhosha naMosi nawu: ‘Muloña wankahi chiwunadinyamwini hadi etu ejima?’

Mosi hakuleja Kora nawatumbanji twindi nindi: ‘Kumadiki nantetemena mwakasendi yeña yenu yakwinkamu kesi mukenkimu niinsensi. Mwakenzi kutabanaka yaYehova. Twakamona wakatondawu kudi Yehova.’

Nantetemena Kora nawatumbanji twindi 250 hiyakwinza kutabanaka. Antu amavulu amakwawu hiyakwinza nakudibomba kudi awamayala. Yehova hakuhila nankashi. Mosi hakuhosha nindi: ‘Fumenu kumatenti anawa antu atama. Bayi mukwata yuma yawuku.’ Antu hiyakutiyilila, hiyakufuma kwitenti daKora, niDatani niAbirami.

Mosi hakuhosha nindi: ‘Hanichi dihimukwilukila wuyanatondiwu kudi Yehova. Iseki dikwinzunuka nakuminya awantu ejima atama.’

Chelili Mosi nindi amanisheña kuhosha, iseki hidikwinzunuka. Itenti daKora niyuma yindi niDatani niAbirami niantu adiñawu nawu hiyakuholokelamu, iseki hidikuyibutilamu. Chanatiyiwu antu nyitetu yanana anaholokeli mwikela, hiyakubidika nawu: ‘Temukenu! Iseki dakenza katuminya ninetu nawa!’

Kora nawatumbanji twindi 250 achidi kwakwihi natabanaka. Dichi Yehova hakutemesha kesi, nakuyocha wejima wawu. Dichi Yehova hakumuleja mwana kaAroni Eliyeza kusenda yeña yakwinkamu kesi yanana antu afwili kulonda achili nachu cheña chawubasa chakujika nachu hakameña. Ichi chifwiku chikwikala neyi chinjikijilu chakuyanukisha nachu aIsarela nawu, Aroni nianyanindi hohu diwu atela kumukalakela Yehova neyi atupristu bayi antu acheñiku.

Ilaña Yehova nakeñi nindi yachimwekishi hatooka chikupu nindi Aroni nianyanindi hohu diwu anatondiyi kwikala atupristu. Hakumuleja Mosi nindi: ‘Lejaku nyuli wakumutaña wejima wawaIsarela aleti mbwechi yindi. Kumutaña waLevi lejaku Aroni aleti mbwechi yindi. Dichi wunoni jimbwechi wujitenteki mutabanaka kumbidi yachimbañu chachitiyañenu. Mbwechi yamuntu yinatondi kwikala kapristu yikakenuka nkenu.’

Chelili Mosi nindi atali nantetemena, mbwechi yaAroni yidi nankenu ninsala jaha jinasoñiku! Ichi wuneluki dehi muloña wakojejeli Yehova nindi mbwechi yaAroni yikenuki nkenu?

Kuchinda 16:1-49; 17:1-11; 26:10.