Mpwembu yaYeriku
MPANJI 46
Mpwembu yaYeriku
CHUMANYI chinakuletesha iji mpwembu jaYeriku kuhumuka? Chinakumwekana neyi hanaholokeli mutendanzumbu weneni. Ilaña munowu mafuku antu hiyadiña nanyitendanzumbuku; hiyadiña hela namataku. Hichihayamisha chikwawu chaYehova! Twayenu tudizenu chichamwekeni.
Tiyaku chamulejeliwu Yoshuwa kudi Yehova: ‘Eyi niantu jeyi anjita mukunyeñumuka musumba. Mukunyeñumukaña musumba kamu hefuku hadi mafuku atanu nadimu. Mukusendaña chimbañu chachitiyañenu. Atupristu atanu nayedi atela kutwamina kumbidi yachimbañu iku anakwimba mpuña jawu.
‘Hefuku damuchitanu nachiyedi mwatela kuwunyeñumuka musumba mapampa katanu nakayedi. Dichi mwakembi mpuña nañovu, nawa kaleji antu ejima akabidiki kabobobu kakeni. Mpwembu yakahumuka kwala-a!’
Yoshuwa niantu hiyakwila mwanahoshiyi Yehova. Wejima wawu anakunyeñumuka wumweneni. Kwosi nimuntu wunakuhoshahu hela izu. Chuma chatiyakeneñaku yonshindu yanyendu yadiña nakunyeñumuka nimpuña. Ayilumbu jawantu jaNzambi amuYeriku atela atiyili woma. Wunawumoni wuna mwonji wunakuyekela hanjanena? Indi yina njanena yanyi? Eña, Rahaba welili chamulejeliwu kwila kudi akwakwendesha ayedi. Chisaka chindi chejima chidi mukachi nakutala hamu nayena.
Nkumininaku, hefuku damuchitanu nachiyedi, hanyima yakunyeñumuka mumusumba mapampa katanu nakayedi, mpuña hiyikuvuma, antu anjita hiyakubidika nimpwembu hiyikuhumuka. Yoshuwa hakuhosha nindi: ‘Jahenu muntu wejima wudi mumusumba muwochi nikuwocha. Ochenu yuma yejima. Hukulenuku hohu siliva niwuru, niwuneñu nichikuñu nakuyihana muchikasha chakuswekela mali kwitenti daYehova.’
Yoshuwa hakuleja akwakwendesha ayedi nindi: ‘Yenu mwitala daRahaba mumwidishi hamu nichisaka chindi.’ Rahaba nichisaka chindi apulukili neyi chochamukaniniwu kudi akwakwendesha.
