MPANJI 34

Muchidi Wawuha waYakudya

WUNAYILUKI iyi yuma yinakunonawu antu hamaseki? Yinakumwekana neyi mayimakanza. Yitooka, yapapalala nawa yayovu. Ilaña himayimakanzaku; hiyakudya.

Munahiti dehi kakweji wumu hohu nahafuminiwu aIsarela muEjipitu. Adi dehi mwisaña. Mwenimu mwamenaña yakudya yantesha hohu, dichi antu hiyakutoba nawu: ‘Tunatoñi chiña tuhu Yehova watujahililili muEjipitu. Muloña muna twadiñi nayakudya yejima yitwakeñeleña.’

Dichi Yehova hakuhosha nindi: ‘Nukuletesha yakudya yinoki kufuma mwiwulu.’ Nawa ichi dichaneliyi Yehova. Kwifuku dekwawu aIsarela chanamoniwu iyi yuma yitooka yinaholoki, hiyakudihula nawu: ‘Hichumanyi?’

Mosi hakuhosha nindi: ‘Iyi diyakudya yanayinkiyi Yehova.’ Antu hiyakuyitena nawu MANINA. Kuyitompa yidi neyi chindanda chapapalala chakutuña nawuchi.

Mosi hakuleja antu nindi, ‘Mwatela kukuñula hamuntu hamuntu yatelayi kudya.’ Ntetemena yidi yejima dichelañawu. Dichi neyi itañwa dinatendi, manina adi hamaseki hiyikunowa.

Mosi hakuhosha cheñi nindi: ‘Kwosi muntu wukushiyahu manina nakushika kwifuku dekwawuku.’ Ilaña antu amakwawu hiyanatiyililiku. Wuneluki chikumwekana? Kwifuku dekwawu manina ashelihu hiyakwikala namavunyi nawa hiyakunuka!

Hela chochu kudi ifuku dimu damumulungu odu Yehova dalejayi antu kukuñula manina amavulu. Idi hifuku damuchitanu nachimu. Yehova nindi ashiyeñahu manina akwifuku dekwawu, muloña hakaholola hefuku damuchitanu nachiyediku. Neyi ashiyahu manina nakushika kwifuku damuchitanu nachiyedi, hiyekalaña namavunyiku nawa hiyanukañaku! Ichi hichihayamisha chekwawu!

Yaaka yejima yadiwu aIsarela mwisaña Yehova wayidyishaña manina.

Kwidika 16:1-36; Kuchinda 11:7-9; Yoshuwa 5:10-12.