MPANJI 51

Nyawomi naLuti

MUBAYIBOLU wukuwanamu mukanda wuyatenañawu nawu Luti. Hinsañu yachisaka chadiñaku hampinji yimwadiña ansompeshi muIsarela. Luti hikankaña wamumbanda wamwituña daMowabi; hakundama kumuza waNzambi yaIsarelaku. Ilaña Luti chanadiziyi hadi Yehova Nzambi walala, hakumukeña nankashi. Nyawomi himumbanda wachikulumpi wamukwashiliku Luti kudiza hadi Yehova.

Nyawomi himumbanda mwini Isarela. Yena nifumwindi nianyanindi awamayala ayedi ayili mwituña daMowabi mpinji yikwaholokeli nzala muIsarela. Dichi ifuku dimu nfumwa Nyawomi wafwili. Chimwahitili mafuku anyana kaNyawomi awamayala asumbwili ambanda ayedi akuMowabi aLuti naOripa. Ilaña chimwahitili yaaka 10 anyana kaNyawomi awamayala mwayedi wawu afwili. Ochineñi chadiña naNyawomi niambanda ayedi! Indi ichi Nyawomi wukwiladi?

Ifuku dimu Nyawomi wafukwili kukasa lwendu lwakufunta kumukala wawu kwekala antu jindi. Luti naOripa anakukeña kushakama nindi, dichi hiyakuya nindi hamu. Ilaña cheyendeliku hohu chantesha munjila, Nyawomi wabalumikili nakuyila awa ambanda nindi: ‘Funtenu kumukala mwakashakami nawamama jenu.’

Nyawomi hakuyipwepujola nakuyishalisha ambanda. Muloña wanichi atachika nikudila muloña aswejeli kumukeña Nyawomi nankashi. Hiyakuhosha nawu: ‘Inehi! Tukuya neyi kudi antu jeyi.’ Ilaña Nyawomi hakwakula nindi: ‘Chiña mufunti hohu anyanami. Chikuwaha neyi mukushakama kwenu.’ Dichi Oripa hakufunta kumukala. Hakwila Luti kwonti kwindi.

Nyawomi hakubalumuka nakumuleja nindi: ‘Oripa nafunti. Nineyi funtaku nindi kumukala.’ Ilaña Luti hakumwakula nindi: ‘Bayi wunleja neyi nikushiyiku! Nleki niyi neyi. Kuwukuyeyi ninami dikunukuya, kuwukushakameyi ninami dikunakashakama. Antu jeyi akekala antu jami niNzambi yeyi wukwila Nzambi yami. Kuwukafwila dikunakafwila nawa dikwakanjikilawu.’ Chanahoshiyi Luti ñana, Nyawomi hamukanjikijili cheñi nindi afunti kumukalaku.

Nkumininaku mwayedi wawu ashikili muIsarela. Ashakamini kweniku. Hohenohu Luti hakutachika kuzata mumaha muloña yadiña mpinji yakwañula bali. Iyala wejina daBowazi wamwitejeli nindi anoneña bali mumahindi. Wunamwiluki wadiña mama yaBowazi? Wadiña Rahaba wakumusumba waYeriku.

Ifuku dimu Bowazi hakumuleja Luti nindi: ‘Natiyili mujimbu weyi wejima niluwi luwamwekesha hadi Nyawomi. Neluki nichiwashiya tata yeyi nimama yeyi niituña deyi nakwinza nakushakama nawantu yiwabulili kwilukahu dehi. Yehova akwili kakawahi!’

Luti hakwakula nindi: ‘Wunahoshi mwamuwahi nankashi hadi ami, mwanta. Wunatiyishi kuwaha namazu amawahi yiwunahoshi nanami.’ Bowazi hakumukeña Luti nankashi, nawa hihashimbwili hakwila nawu adisumbuliku. Owu muzañalu wadiña naNyawomi! Ilaña Nyawomi hakutiya muzañalu nankashi hampinji yavwaliliwu aLuti naBowazi mwanawu weyala wejina daObedi. Nkumininaku Obedi wekalili nkaaka yaDavida, yitukudiza yuma yayivulu hadi yena kumbidi.

Mukanda wamuBayibolu waLuti.