MPANJI 44

Rahaba Nasweki Akwakwendesha

AWA amayala adi mukukala. Chiña atemuki, neyi nehi akuyijaha. Hiyakwakwendesha akuIsarela, nimumbanda wunakuyikwashaku diyi Rahaba. Rahaba washakamaña henaha mwitala dekalila kumpwembu yamusumba waYeriku. Tutalenu ntahi muloña waweni awamayala chanekaliliwu mukukala.

A Isarela adiloñesha dehi kuzambuka Kaloña Yodana nakuya mwituña daKenani. Ilaña henohu kanda azambuki, Yoshuwa hakutemesha akwakwendesha ayedi. Hakuyileja nindi: ‘Yenu mutali ituña nimusumba waYeriku.’

Chanashikiwu akwakwendesha muYeriku, hiyakuya kwitala daRahaba. Ilaña muntu wumu hakumuleja mwanta waYeriku nindi: ‘A Isarela ayedi enza munu nawufuku nakwendesha ituña.’ Mwanta chanachitiyiyi, hakutemesha amayala kudi Rahaba nakumuleja nawu: ‘Idishaku amayala yiwudi nawu mwitala deyi!’ Ilaña Rahaba wayiswekeli akwakwendesha mwitala dehewulu dindi. Dichi hakuhosha nindi: ‘Amayala amuñana enza mwitala dami ilaña hineluki kuyafuminawuku. Aya henohu kanda kwiyili, henohu kanda enzali nichinsu chamusumba. Neyi mukunyakala mukuyikwata!’ Dichi amayala hiyakuya nakuyihaña.

Hanyima yakwila anayi dehi, Rahaba hakunyakela kuya hewulu detala. Hakuleja akwakwendesha nindi, ‘Neluki nami Yehova wukayinka adinu ituña. Twatiyili chomishiliyi Kaluñalwiji Kachinana himwafumineña muEjipitu nichimwajahili anyanta aSihoni naOgi. Ami nayitiyila luwi, dichi nsanyikilenu mwani nenu, mwakantiyila luwi. Mupulwishi tata yami nimama yami niana kwami niahelami.’

Akwakwendesha hiyakusanyika nawu akamupulwisha, ilaña Rahaba watela kwila chuma chimu. Akwakwendesha hiyakuhosha nawu, ‘Sendaku iwu mwonji wuchinana wuwikasili kunjanena yeyi, wupompeshi niantaña jeyi ejima mwitala deyi. Chitwakafunta nakutambula Yeriku, twakamona iwu mwonji hanjanena yeyi dichi hitukajaha muntu wudi wejima mwitala deyiku.’ Chanafuntiwu akwakwendesha kudi Yoshuwa, hiyakumulejamu jejima jamwekeni.

Yoshuwa 2:1-24; Aheberu 11:31.