MPANJI 35

Yehova Nahani Nshimbi Jindi

MUNAHITI dehi tukweji tuyedi hanyima yakufuma muEjipitu, aIsarela anashiki dehi kuMpidi yaSinayi, ayitenaña cheñi nawu Horebi. Aha diheluña dodimu Yehova hahosheliyi naMosi muchiputa chakwatili kesi. Henaha, antu hiyakutuña chilombu nakushakamahu mpinji yantesha.

Chadiñawu antu nakuhembelela mwishina, Mosi wakandukili hampidi. Hewulu dampidi, Yehova hakumuleja Mosi nindi Nakukeña aIsarela Amwovwahili nawa ekali antu Jindi alema. Chinakunkumukiyi Mosi, hakuyileja aIsarela mwahosheliyi Yehova. Antu hiyakuhosha nawu akumwovwahilaña Yehova, muloña anakukeña ekali antu jindi.

Aha dinu Yehova hakwila chuma chenyi. Hakwilisha insa yampidi kufwindashana wishi nikudidima. Hakuhosha cheñi kudantu nindi: ‘Yami Yehova Nzambi yenu wayidishili muEjipitu.’ Hakuyileja nindi: ‘Himwatela kudifukula kudi anzambi acheñiku, chiña ami hohu.’

Nzambi hakuyinka aIsarela nshimbi jikwawu jitanu najiwana. Antu hiyakutiya woma nankashi. Hiyakumuleja Mosi nawu: ‘Eyi hoshaña nanetu, muloña tunatiyi woma waNzambi netu, neyi Nzambi yahosha nanetu tukufwa.’

Chahiñilimu Yehova hakumuleja Mosi nindi: ‘Kandukaku kudami hampidi. Nukukwinka malola ayedi awubasa hinasoneki nshimbi yinakeñi kwinka antu kulonda alondeleña.’ Dichi Mosi hakukanduka cheñi hampidi. Hakushakama kwenakuna hadi mafuku 40 nimwaana niwufuku.

Nzambi wukweti nshimbi jajivulu jakuyinka antu jindi. Mosi hakusoneka nshimbi jeniji. Nzambi hakumwinka cheñi Mosi malola ayedi awubasa. Hanawa malola, Nzambi yomweni wasonekelihu nshimbi 10 jalejeliyi antu ejima. Ajitenaña nawu Nshimbi Ikumi.

Nshimbi Ikumi jalema. Chochimu nanshimbi jikwawu jajivulu Nzambi janahaniyi kudi aIsarela nijena jalema. Lushimbi lumu ludi lwakwila nawu: ‘Keñaku Yehova Nzambi yeyi namuchima weyi wejima, namaana eyi ejima, nawumi weyi wejima ninañovu yeyi yejima.’ Lushimbi lukwawu nawu: ‘Keñaku mukwenu neyi chiwadikeña eyi aweni.’ Yesu Kristu Mwana kaNzambi, wahosheli nindi iji diju nshimbi jiyedi jamaneni jayinkeliyi Yehova antu jindi aIsarela. Kumbidi twakadiza yuma yayivulu hadi Mwana kaNzambi nintañishilu yindi.

Kwidika 19:1-25; 20:1-21; 24:12-18; 31:18; Kuhituluka 6:4-6; Alevi 19:18; Matewu 22:36-40.