MPANJI 43

Yoshuwa Nekali Nlomboli

MOSI nakukeña nindi ayi nawaIsarela muKenani. Dichi hakwihula nindi: ‘Añiteji Yehova nizambuki Kaloña Yodana nimonuhu ituña dadiwahi.’ Ilaña Yehova hakuhosha nindi: ‘Kunahu! Bayi wuhoshamu cheñiku!’ Wuneluki muloña waweni wahosheleliyi Yehova ñana?

Muloña wachina chamwekeni heteliyi Mosi mwilola. Anukaku, Mosi naAroni hiyamujilikili Yehovaku. Hiyalejeli antu nawu Yehova diyi wedishili menji kufuma mwilolaku. Haniwu muloña Yehova wahosheli nindi hakayiteja kwiñila muKenaniku.

Dichi chimwahitili tukweji twantesha hanyima yakufwa kwaAroni, Yehova hakuleja Mosi nindi: ‘Sendaku Yoshuwa wumwimiki kumesu akapristu Eleyazari nikumesu awantu. Kumesu awu wejima, wuyileji neyi Yoshuwa diyi nlomboli wamuha.’ Mosi hakwila neyi chochanamulejiwu kudi Yehova, neyi chiwunakumona hamwevulu.

Dichi Yehova hakumuleja Yoshuwa nindi: ‘Dikwatishi, bayi wutiya womaku. Yeyi wamba kalombola aIsarela mwituña daKenani dinayisanyikilili, nawa ami nakekala naneyi.’

Nkumininaku, Yehova hakuleja Mosi kukandama haMpidi yaNebo mwituña daMowabi. Henahana Mosi hakutala mwishinadi daKaloña Yodana nakumona ituña dadiwahi daKenani. Yehova hakuhosha nindi: ‘Idi didu ituña dinasanyikilili kuyinka anyana kaAbarahama, niIsaka, niYakoba. Nakwiteji nami wudimoni ilaña hinukukwiteja nami wiñilimuku.’

Mosi hakufwila hewulu yaMpidi yaNebo. Wadiña nayaaka 120 yakusemuka. Wadiña wuchidi nañovu nawa nimesu indi adiña achidi kumona chiwahi. Antu hiyakuneña nankashi nakudila muloña wakufwa kwaMosi. Ilaña adi namuzañalu muloña akweti Yoshuwa neyi nlomboli yawu wamuha.

Kuchinda 27:12-23; Kuhituluka 3:23-29; 31:1-8, 14-23; 32:45-52; 34:1-12.