MPANJI 106

Anayidishi Mukaleya

TALAÑA iwu kañelu wunakwinzununa kwipitu dakaleya. Amayala anakwidishayi hiyapostolu aYesu. Tutalenu chaletesheli nawu ayishi mukaleya.

Munahiti hohu mpinji yanti kufuma hiyayichililiwu atumbanji twaYesu spiritu yajila. Ichi dichinamwekani: Ifuku dimu nampinji yamwaana, Petulu naYowanu hiyakuya kutembeli muYerusalema. Kweniku kukamwihi nachinsu, kudi iyala wadiña nakubalakata kufuma kuwansi windi. Antu amuletaña henaha mafuku ejima kulonda alombeña mali kudi ana anakwiñila mutembeli. Chinayimoniyi aPetulu naYowanu, hakuyilomba kulonda amwinkihu chuma. Indi apostolu akwiladi?

Apostolu hiyakwimana nakumutala iwu kazweñi. Petulu hakuhosha nindi, ‘Hinikweti maliku, ilaña nukukwinka chuma chinikweti. Mwijina daYesu nami imanaku, wendi!’ Petulu hakumukwata kuchikasa chachidiilu, hohenohu hakukiloka nakutachika kwenda. Antu chiyanamoniwu ichi, hiyakuhayama nakutiya muzañalu hanichi chihayamisha chabadika.

Petulu hakuhosha nindi, ‘Hikuñovu yaNzambi wamusañwili Yesu kufuma mudi afu, kutunelili ichi chihayamisha.’ Henohu yena niYowanu achidi kuhosha, anlomboli jayipompelu hiyakwinza. Anahili muloña Petulu naYowanu anakuleja antu hansañu yaYesu nawu amusañwili kufuma mudi afu. Hiyakuyikwata nakuyisha mukaleya.

Kwifuku dekwawu anlomboli jayipompelu hiyakuhumañana hamu. Hiyakuyileta aPetulu naYowanu niiyala wokiliwu. Anlomboli jayipompelu hiyakuyihula nawu, ‘Ichi chihayamisha mwachikoña nañovwinyi?’

Petulu hakuyileja nindi nañovu yaNzambi wamusañwili Yesu kufuma mudi afu. Atupristu hiyaneluki chakwilaku, muloña hiyakutwesha kukana nawu ichi chihayamisha chabadika chazatikaku. Dichi hiyakuleja apostolu nawu bayi ahosha cheñi hadi Yesuku, hohenohu hiyakuyumbaku.

Mukuhita kwamafuku apostolu hiyakutwalekahu kushimwina hadi Yesu nikuuka akata. Nsañu yaniyi yihayamisha hiyikutanda. Dichi niantu amunyikala yakwakwihi naYerusalema hiyakuleta akata kudi apostolu kulonda ayuuki. Ichi hichikuletesha anlomboli jayipompelu kutiyi ichima, dichi hiyakuyikwata apostolu nakuyisha mukaleya. Ilaña hiyanashimbulimuku.

Nampinji yawufuku kañelu kaNzambi hakwenzununa chenzelu chakaleya neyi chiwunakumona ahanu. Kañelu hakuhosha nindi: ‘Yenu mukemani mutembeli mutwalekihu kuleja antu.’ Chikwelili ntetemena, chineli anlomboli jayipompelu atemeshi amayala mukaleya nakusenda apostolu, kuwana mwosiwu. Chimunahiti kapinji amayala hiyakuyiwana anakutañisha mutembeli, dichi hiyakuyitwala muchota chanyiloña chaSanihedilini.

Anlomboli jayipompelu hiyakuhosha nawu, ‘Twayilejeli chakola netu bayi mukatañisha hadi Yesu cheñiku. Ilaña munatandishi Yerusalema nantañishilu yenu.’ Dichi apostolu hiyakwakula nawu: ‘Twatela kwovwahila Nzambi hamu neyi nyuli bayi antuku.’ Hiyakutwalekahu kutañisha “nsañu yayiwahi.” Ichi komana hichitalilu chachiwahi chitunateli kwimbujolaku?

Yililu kapetulu 3 nakushika ku 5.