MPANJI 111

Kansi Weyala Wakamini Mutulu

LELWAME-E! Chumanyi chinakumwekana ahanu? Indi iwu kansi wunakami hamaseki nadikatishi nankashi? Talaña! wumu hakachi kanawa amayala anakwidika mwitala diyi Pawulu! Wunamumoni Timotewu niyena? Indi iwu kansi weyala waholokeli hanjanena?

Eña, ichi dichamwekeni. Pawulu wadiña nakuhana mpanji kudi atumbanji muTirowasi. Welukili nindi hakadimona nawu cheñi katatakaku, muloña wayileña nawatu kwifuku dekwawu. Dichi watwalekelihu nakuhosha kushika tuhu nihakachi kawufuku.

Iwu kansi weyala wejina daYutikusa washakamini hanjanina, dichi wakamini mutulu. Walumukili kufuma hanjanina yahetala dahewulu damuchisatu nakuholokela mwishina! Komana dimuloña waweni yiwunakumwena antu chanadiwoñeliwu. Chelili amayala amunoni kansi weyala, kuwana wudi neyi mwomwatoñojokañawu. Wafwa dehi!

Chineli Pawulu yeluki nindi kansi weyala nafwi, hakumubulumana nakumukumbata. Hakuyila nindi: ‘Bayi mwakamenaku. Wudi hohu chiwahi!’ Eñañi wudi hohu chiwahi! Hichihayamisha! Pawulu namusañuli! Izaza dejima hidikuzañañala nankashi.

Hiyakukanduka cheñi hetala dahewulu nakudya. Pawulu hakutwalekahu nakuhosha nichikwachili. Ilaña wunateli kwiteja neyi Yutikusa hakamini cheñiku! Kulondelahu Pawulu, niTimotewu ninana ayileñawu nawu hamu hiyakukandama muwatu. Wuneluki kunakuyawu?

Pawulu hakumanisha lwendu lwindi lwakushimwina lwamuchisatu, nawa wudi halwendu lwakufunta kumukala. Munilu lwendu Pawulu washakamini yaaka yisatu mumusumba waEfwesesa hohu. Ilu lwendu dilwaswejeli kuleha kubadika lwamuchiyedi.

Hanyima yakufuma muTirowasi, watu hiwukwimana haMiletusa chantesha. Chineli musumba waEfwesesa wudi hohu hakamwihi, Pawulu hakutambika akulumpi jachipompelu kwinza kuMiletusa kulonda yahoshi nawu kakukumishaku. Kulondelahu, chiyinashikili mpinji yakuya watu, ochineñi chinatiyiwu hakumona Pawulu hakuya!

Nkumininaku watu hiwukufunta kuKesareya. Henohu Pawulu nakushakama kunu kwitala dakambanji Fwilipu, kaprofwetu Agabusi hakumusoñamisha Pawulu. Hakuhosha nindi Pawulu akumwilisha mukwakaleya neyi nafunti kuYerusalema. Eña chalala, ichi dichinamwekani. Kulondelahu, hanyima yakwikala mukaleya hadi yaaka yiyedi muKesareya, Pawulu hiyakumutemesha kuRoma nakusompa kumesu anlomboli wakuRoma Kesari. Tutalenu chamwekeni halwendu lwakuya kuRoma.

Yililu kapetulu 19 nakushika ku 26.