MPANJI 113

Pawulu muRoma

TALAÑA Pawulu wudi mumaleñi, nawa talaña iwu mushidika wakuRoma wunakumuhemba. Pawulu himukwakaleya muRoma. Nakuhembelela kushika tuhu nichakutiyayi Kesari kaRoma mwakufukulayi kumwilila. Henohu wudi mukaleya, antu anakuyiteja kumuhempula.

Mafuku asatu hanyima yakushika muRoma Pawulu hakutemesha mazu kudi anlomboli awaYudeya kulonda enzi nakumutala. Muloña wanichi, aYudeya amavulu ashakamineña muRoma hiyakwinza. Pawulu hakuyishimwina hansañu yaYesu nihawanta waNzambi. Amakwawu hiyakwitiya nakwikala eniKristu, ilaña amakwawu kwonti kwawu.

Pawulu hakushimwina cheñi nikudi amashidika ashiyañana adi namudimu wakumuhemba. Hadi yaaka yiyedi yadiyi mukaleya Pawulu hakushimwina kudi muntu wudi wejima wukumonayi. Chafuminimu, niakwetala daKesari hiyakutiya nsañu yayiwahi yaWanta, amakwawu hiyakwikala eniKristu.

Indi iwu mwenyi wudi kumesa nakusoneka hinyi? Wunatweshi kuboka? Eña, diyi Timotewu. Timotewu niyena amushili mukaleya hamuloña wakushimwina nsañu yaWanta, ilaña amumbaku dehi. Nawa nenzi kunu nakumukwashaku Pawulu. Wuneluki nsañu yinakusonekayi Timotewu? Tutalenu ntahi.

Wunakwanuka nyisumba yaFwilipi niEfwesesa muMpanji yidi mu 110? Pawulu wakwashiliku kutachika yipompelu yaweniKristu muniyi nyisumba. Dichi, hampinji yadiyi mukaleya, Pawulu hakuyisonekela nyikanda awa eniKristu. Nyikanda yeniyi yidi muBayibolu, nawa ayitenaña nawu aEfwesesa niaFwilipi. Pawulu nakumuleja Timotewu nsañu yakuyisonekelawu amabwambu jawu aweniKristu adi muFwilipi.

AkwaFwilipi amwilileña Pawulu kakawahi nankashi. Amutemesheleli chawaana munu mukaleya, dichi Pawulu nakuyisakilila. Epafwaditu diyi iyala waleteli chawaana. Dichi dinu wakatili nankashi hakukeña nikufwa. Ilaña ichi wakola dehi ngu-u nawa nakukeña kufunta kumukala. Wukusenda iwu mukanda kufuma kudi Pawulu naTimotewu hakufuntañayi kuFwilipi.

Henohu wuchidi mukaleya Pawulu hakusoneka nyikanda yikwawu yiyedi yitukweti muBayibolu. Wumu waweniKristu adi mumusumba waKolose. Wuneluki chawutenañawu? Akolose. Wukwawu himukanda windi wasonekeleliyi ibwambu dindi wadikundayi nindi wejina daFwilemoni washakamaña muKolose. Mukanda wunakuhosha hadi Onesimusa ñamba yaFwilemoni.

Onesimusa wamutemukili Fwilemoni nakuya kuRoma. Munjila yikwawu Onesimusa welukili nindi Pawulu wudi munu mukaleya. Onesimusa wenjili nakumuhempula, dichi Pawulu hakumushimwina. Hohenohu Onesimusa hakwikala mwiniKristu. Dichi Onesimusa hakuneña nanochu chatemukiliyi. Wuneluki nsañu yinasonekiyi Pawulu muniwu mukanda waFwilemoni?

Pawulu hakumwila Fwilemoni kulonda yomwanakeniku Onesimusa. Pawulu hakusoneka nindi, ‘Nakumufuntisha cheñi kudeyi. Ilaña ichi hadi nawa ñamba yeyi hohuku. Ilaña himana kwetu waweniKristu chikupu.’ Chafuntileñayi Onesimusa kuKolose hakusenda nyikanda yejima yiyedi, wumu wakuAkolose niwukwawu waFwilemoni. Tunatweshi kutoñojoka owu muzañalu watiyiliyi Fwilemoni hakutiya nawu ñamba yindi nekali dehi mwiniKristu.

Chineli Pawulu yayisonekeli Afwilipi niFwilemoni, mwamweni wukweti nsañu yayiwahi. Pawulu hakuleja aFwilipi nindi, ‘Nakuyitemeshela Timotewu. Ilaña hakushimbula chanti ninami nakayihempula.’ Kudi Fwilemoni hakusoneka nindi: ‘Nloñesheli iluña kunatela kushakama.’

Chineli Pawulu amumbiku hakuya nakuhempula ana kwindi niahelindi aweniKristu kumaluña amavulu. Nkumininaku, Pawulu hiyakumusha cheñi mukaleya muRoma. Hayinu mpinji neluki nindi anakuya nakumujaha. Dichi hakumusonekela Timotewu nakumuleja nindi anyakali kwinza. Pawulu hakusoneka nindi, ‘Nadiña wamukuhwelela Nzambi, nawa Nzambi wukanyika wufwetu.’ Yaaka yantesha hanyima yakumujaha Pawulu, Yerusalema hiyakuyijilumuna cheñi, hayinu mpinji anayijilumuni kudi aRoma.

Ilaña mudi nsañu yayivulu muBayibolu. Yehova Nzambi hakumwila kapostolu Yowanu kusoneka nyikanda yachi yakukumishaku, kushilahu nimukanda waChimwekeshu. Iwu mukanda wamuBayibolu washimunaña jakumbidi. Twayenu tudizenu jidinakutuhembela kumbidi.

Yililu 28:16-31; Afwilipi 1:13; 2:19-30; 4:18-23; Aheberu 13:23; Fwilemoni 1-25; Akolose 4:7-9; 2 Timotewu 4:7-9.