Setefwanu Anamwasi Malola
MPANJI 107
Setefwanu Anamwasi Malola
IWU iyala wunafukami ahanu diyi Setefwanu. Hikambanji kaYesu washinshika. Ilaña talaña chuma chinakumumwekena! Awa amayala anakumwasa malola amaneni. Muloñadi chiyamuhelelawu Setefwanu chinaleteshi akoñi chuma chatama ñana? Tutalenu ntahi.
Nzambi wamukwashaña Setefwanu kwila yihayamisha yabadika. Awa amayala hiyachikeña ichiku, dichi hiyakuditadikisha nindi hamuloña wakutañisha antu walala. Ilaña Nzambi hakumwinka Setefwanu maana nankashi, dichi Setefwanu hakulumbulula nindi awantu atañishaña yuma yakutwamba. Ichi hichikuyihilisha nankashi. Hiyakumukwata nakutambika antu kulonda amutwambili.
Kapristu muneni hakumwila Setefwanu nindi: ‘Iyi yuma yalala?’ Setefwanu hakwakula kuhitila mukuhana mpanji yayiwahi yamuBayibolu. Hakumanisha mpanji, Setefwanu hakuhosha hadi antu atama chaheleliwu atuprofwetu aYehova hanyaka. Hakuhosha nindi: ‘Ninenu mudi neyi ana antu. Mwajahili kambuña Nzambi Yesu nawa himunakovwahila nshimbi jaNzambiku.’
Anlomboli jayipompelu hiyakuhila nankashi! Hiyakusumona kumaji awu nakuhila. Ilaña Setefwanu hakwinuna mutu windi mwiwulu nakuhosha nindi: ‘Talenu! Namoni Yesu nemani kuchidiilu chaNzambi mwiwulu.’ Chanatiyiwu awa mazu, awa amayala hiyakusha nyinu yawu mumatu nakumulotokela Setefwanu. Hiyakumukwata nakumwidisha hanji yamusumba.
Kweniku hiyakusubula yikovwelu yawu nakumwinka mukwenzi weyala Sawulu kulonda ayihembeliku. Wunamumoni Sawulu? Dichi amayala amakwawu hiyakutachika kumwasa Setefwanu malola. Setefwanu hakufukama, neyi chiwunakumona, hakulomba kudi Nzambi nindi: ‘Yehova bayi wuyibabesha hamuloñiwuku.’ Neluki nindi amakwawu anayidimbi kudi anlomboli jayipompelu. Nkumininaku Setefwanu hakufwa.
Neyi muntu nakwili katama, aneyi wesekaña kumufuntishila katama, hela kulomba kudi Nzambi kulonda amubabeshi? Yesu niSetefwanu hiyelili mwenimuku. Adiña naluwi nawantu abulili kwikala naluwi kudi wena. Twesekenu kwimbujola chakutalilaku chawu.
