Watu Wajiyilili Hachitutu
MPANJI 112
Watu Wajiyilili Hachitutu
TALAÑA! watu wudi mukukala! Wunakubaloka muyibalu! Wunayimoni awantu anadibuli hamenji? Amakwawu atachika dehi kushika kuchikumu. Indi ona hidiyi Pawulu wudi hanaku? Tutalenu chadiña nakumumwekena.
Anukaku Pawulu amukasili mukaleya muKesareya hadi yaaka yiyedi. Kulondelahu, yena niakwakaleya amakwawu hiyakuyisha muwatu, nakuyitwala kuRoma. Chinahitiwu kwakwihi nachitutu chaKereta, mpepela yatama hiyikuyiwana. Mpepela hiyikukunka chakwila amayala hiyakukañanya nikuvuwa watu. Dichi hiyanakumona itañwa nampinji yamwaana hela tutumbwa nawufukuku. Nkumininaku, hanyima yamafuku amavulu, antu adiña muwatu hiyakutoñojoka nawu hiyakuhandaku.
Dichi Pawulu hakwimana nakuhosha nindi: ‘Kwosi niwumu hakachi kenu wukufwaku; watu hohu diwukukisika. Muloña nawufuku kañelu kaNzambi wenza kudami hakuñila nindi, “Bayi wutiya womaku, Pawulu! Chiña wukemani kumesu anlomboli waRoma Kesari. Nawa Nzambi wukupulwisha ejima yiwudi nakuya nawu muwatu.”’
Hefuku damu 14 kwakwihi nahakachi kawufuku kufuma hatachikilili mpepela yeneni, akwakwendesha watu hiyakumona nawu anashiki dehi kwakuma! Hiyakuholola yikuñu yakwimika nachu watu muloña adiña nawoma nawu keña adihumi mumalola nansañu yamwidima. Chikuneli ntetemena hiyakumona chikumu chakaluñalwiji. Hiyakweseka kutwala watu kuna kuchikumu.
Chineli ashiki kwakwihi nachikumu, watu hiwukuhuma muwusekulula hiwukukakelamu mbe. Dichi mankanda atachika nikuhumamu, watu wutachika nikubaloka muyibalu. Mukulumpi wamashidika hakuhosha nindi: ‘Wejima wenu mweluka kusala tachikenu kudumbila mumenji musali nakuya kuchikumu. Enu munashali dumbilenu mumenji mukwati kuyibalu yinafumi kuwatu mukwatishi.’ Nawa ichi dichaneliwu. Muniyi njila wejima wawu antu 276 adiña muwatu hiyakushika kuchikumu chachiwahi, neyi chochakaniniyi kañelu.
Ichi chitutu achitenaña nawu Melita. Antu ahanichi chitutu adi chiwahi nankashi, nawa hiyakuyihemba antu afumini muwatu. Chineli mpepela yiwundi, Pawulu hiyakumusha muwatu wacheñi nakumutwala kuRoma.
