MPANJI 87

Kansi Yesu muTembeli

TALAÑA iwu kansi weyala wunakuhosha nanawa akulumpi awamayala. Hiyantañishi mutembeli yaNzambi muYerusalema. Iwu kansi weyala diyi Yesu. Hanakuli nankashiku. Wukweti yaaka yakusemuka 12.

Antañishi anahayami nankashi hakumona Yesu neluki yuma yayivulu nankashi hadi Nzambi niyuma yasonekawu muBayibolu. Hanu dinu, muloñadi Yosefu naMariya chinabuliwu kwikalilawu munu? Adi kudihi? Tutalenu ntahi.

Hachaaka hachaaka Yosefu wenzaña nachisaka chindi kuYerusalema kuchawija chalema chatenañawu nawu Paseka. Lwendu lwakufuma kuNazareta nakuya kuYerusalema lwalulehi. Kwosi muntu wukweti motoka nawa kwosi nimasuwa. Adiña adana munana mafuku. Antu amavulu endaña hamaseki, nawa chayisendelaña kwakwihi namafuku asatu hakwila nawu ashiki kuYerusalema.

Ilaña ichi Yosefu wudi nachisaka cheneni. Wukweti anyiki jaYesu awamayala niawambanda anakuhembayi. Ichi chaaka Yosefu naMariya anakasi lwendu lwalulehi nawanyanawu lwakufunta kuNazareta. Anakutoñojoka nawu Yesu wudi nakwendela hamu nawakwawu. Ilaña chananookiwu nampinji yamelela, hiyanamumoni Yesuku. Hiyakumukeñakeña hadi antaña nimabwambu, ilaña hadi nawuku! Hohenohu hiyakufunta kuYerusalema nakumukeñakeña.

Nkumininaku hiyakumuwana Yesu munu nawantañishi. Wudi nakuyitiyilila nikuyihula malwihu. Antu ejima hiyakuhayama maana akwetiyi Yesu. Ilaña Mariya hakuhosha nindi: ‘Mwanami wunatukoñelidi ichi? Nitata yeyi ninami tunakameni nankashi nakukukeñakeña.’

Yesu hakwakula nindi, ‘Mwankeñelañadi? Himweluka nenu natela kwikala mwitala daTata yamiku?’

Eña, Yesu wakeña kwikala kwatelelayi kudiza hadi Nzambi. Ichi komana hidichi twatela kwikala ninetuku? Kumukala wawu kuNazareta, Yesu wayileña nakudifukula kukupompa hamulungu hamulungu. Muloña washileñaku kashinshi chikupu, Yesu wadizili yuma yayivulu yamuBayibolu. Twikalenu neyi Yesu nakulondela chakumwenaku chindi.

Luka 2:41-52; Matewu 13:53-56.