MPANJI 99

Mwitala daHewulu

HACHIWANA nawufuku, munahiti dehi mafuku ayedi. Yesu niapostolu indi 12 anenzi munaka kapeka keneni kahewulu nakudya Paseka. Iwu iyala yiwunakumona nakwidika diyi Yudasi Isakaroti. Nakuya nakuleja atupristu chiyanateli kumukwatawu Yesu.

Ifuku dimu hanyima, Yudasi wayili kudi wena nakuyihula nindi: ‘Mukunyikadi neyi niyikwashaku kumukwata Yesu?’ Ahosheli nawu: ‘Mali asiliva makumi asatu.’ Dichi Yudasi nakuya nakuyiwana awa amayala kulonda ayilomboli kudi Yesu. Komana ichi hichuma chatamaku?

Kudya kwaPaseka kunamani. Ilaña Yesu ichi hakutachika kudya kukwawu kwalema. Hakuyinka apostolu indi dinkendi nakuhosha nindi: ‘Dyenu, muloña iwu diwu mujimba wami wuyanahaniwu hadenu.’ Chalondelelihu hakuyinka lupasa lwavinyu nakuhosha nindi: ‘Nwenu, muloña awa dimashi ami, yakamwañilawu hadenu.’ Bayibolu yakutenaña nawu ‘kudya kwaMwanta kwamelela,’ hela ‘kudya kwaMwanta kwakukamina.’

A Isarela adyileña Paseka hakuyanukisha mpinji ‘yahitili’ kañelu kaNzambi mumatala awu muEjipitu, ilaña wajahili anyana awedi mumatala aweniEjipitu. Ilaña ichi Yesu nakukeña atumbanji twindi amwanukeña, nanochu chayinkeliyi wumi windi. Dimuloña waweni chinayilejeliyi kwanakana iku kudya kwalema hachaaka hachaaka.

Hanyima yakudya Kudya kwaMwanta kwaMelela, Yesu hakuyileja apostolu indi kwikala omika nakukola muchikuhwelelu. Nkumininaku, hiyakumwimbila Nzambi tumina nakwidika. Wufuku wunakunami dehi nankashi, hekwawu kubadika hakachi kawufuku. Tutalenu kwanayiwu.

Matewu 26:14-30; Luka 22:1-39; Yowanu kapetulu 13 nakushika ku 17; 1 Akorinda 11:20.