MPANJI 90

Namumbanda Heshima

YESU nemani nakunooka heshima muSamariya. Atumbanji twindi anayi nakulanda yakudya mumukala. Mumbanda wunakuhosha naYesu nenzi nakutaha menji. Yesu hakumulomba nindi: ‘Nyinkihu menji.’

Ichi hichikumuhayamisha mumbanda nankashi. Wuneluki muloña waweni? Muloña Yesu hikaYudeya, hakwila yena hikaSamariya. Nawa aYudeya amavulu hiyayikeña eniSamariyaku. Hiyahoshaña ninawuku! Ilaña Yesu wakeña nyichidi yejima yawantu. Dichi hakuhosha nindi: ‘Neyi wamwiluka wunakulombi menji, mutenowu wadi kumulomba niyena wadi kukwinka menji amomi.’

Mumbanda hakuhosha nindi, ‘Mwanta, ishima dakunama nawa eyi hiwukweti chakutahila nachuku. Indi owu menji amomi wukuyiwana kudihi?’

Yesu hakulumbulula nindi, ‘Neyi wunwa menji akufuma munidi ishima wukutiya mpwila cheñi, ilaña menji inukuhana anateli kwilisha muntu kuhanda haya nyaka.’

Mumbanda hakumwila nindi, ‘Mwanta, nyinki owu menji kulonda nikabuli kutiya cheñi mpwila! Nikabuli kwinza cheñi nakutaha menji.’

Mumbanda natoñojoki nindi Yesu nakuhosha hamenji alala. Ilaña nakuhosha hachalala kutalisha hadi Nzambi niwanta windi. Ichi chalala chidi neyi menji amomi. Ichi chalala chatela kwinka muntu wumi wahaya nyaka.

Yesu hakumwila dinu mumbanda nindi: ‘Yaku wukatambiki nfumweyi mwinzi cheñi.’

Mumbanda hakwakula nindi, ‘Hinikweti iyalaku.’

Yesu hakumwila nindi, ‘Wunahoshi mwalala. Ilaña wadiña nawamayala atanu, niiyala wudi nindi ichi hinfumweyiku.’

Mumbanda hakuhayama muloña mwejimimu mwalala. Indi Yesu welukili ñahi iyi yuma? Eña, muloña Yesu diyi Wakaniniwu watemesheliwu kudi Nzambi, nawa Nzambi diyi namuleji iyi nsañu. Haniyi mpinji atumbanji twaYesu hiyakufunta, nawa anahayami muloña nakuhosha namumbanda kaSamariya.

Hayuma yejimiyi tukudizilahu chumanyi? Chinakumwekesha nawu Yesu wakeña nyichidi yejima yawantu. Nenitu nawa twatela kuyikeña. Hitwatela kutoñojoka netu antu amakwawu atama hamuloña wakwila akundama kumuchidi wacheñiku. Yesu nakukeña antu ejima eluki chalala chalombolaña kuwumi wahaya nyaka. Anetu nawa twatela kukwasha antu adizi chalala.

Yowanu 4:5-43; 17:3.