MPANJI 94

Wakeña Anyana Anyanya

TALAÑA Yesu ahanu nakumbati kansi weyala. Wunatweshi kuhosha neyi mwamweni Yesu wakamenaña anyana anyanya. Awa amayala anakumutala hiyapostolu indi. Yesu nakuyilejadi? Tutalenu ntahi.

Yesu nawapostolu indi anafumi halwendu lwalulehi. Munjila apostolu adiña nakuditadikisha mukachi kawu. Dichi hanyima yalwendu Yesu hakuyihula nindi: ‘Mwadiña nakuditadikisha hachumanyi munjila?’ Chalala, Yesu neluki chuma chafwilañawu. Ilaña hakwihula lwihu kulonda amoni neyi apostolu akumuleja.

Apostolu amweneni nzo-o, muloña munjila aditadikishaña nawu hinyi mukulumpi hadi wena. Apostolu amakwawu anakukeña kwikala alema kubadika amakwawu. Indi Yesu wukuyileja ñahi nindi hichachiwahi kukeña kwikala mukulumpiku?

Hakutambika kansi weyala, hakumwimika kumbidi yawejima wawu. Dichi hakuyileja atumbanji twindi nindi: ‘Nakukeña nami mwiluki chalala, Neyi himukuhimpa nakwikala neyi mwana wanyanyaku, himukeñila muwanta waNzambiku. Muntu wabadika muwanta diyi wukwikala neyi iwu mwana.’ Wuneluki muloña wunahosheliyi Yesu chenichi?

Chalala, anyana anyanya hiyakamenaña kwikala abadika hela kwikala alema kubadika akwawuku. Dichi apostolu atela kudiza kwikala neyi anyana muniyi njila nawa bayi abobolaña nakufwila kwikala abadika hela alemaku.

Kudi cheñi mpinji yekwawu yamwekesheli Yesu nindi wakamenaña anyana anyanya. Chimwahitili tukweji twantesha hohu antu amakwawu hiyakuleta anyanawu kudi Yesu. Apostolu hiyakukeña kuyilekesha. Ilaña Yesu hakuleja apostolu indi nindi: ‘Lekenu anyana enzi kudami, bayi muyilekeshaku, muloña wanta waNzambi wawantu adi neyi wena.’ Dichi Yesu hakuyilela anyana hanyendu yindi nawa hakuyikiswila. Komana hichachiwahi kwiluka netu Yesu wakeña anyana anyanyaku?

Matewu 18:1-4; 19:13-15; Maku 9:33-37; 10:13-16.