MPANJI 101

Yesu Anamujahi

TALAÑA chuma chatama chinakuzatika! Yesu anakumujaha. Anamushi hamutondu. Anamupopi nyisumali kumakasa nikunyendu. Muloñadi antu ejima chinatiyiliwu kuwaha kumwila Yesu chuma chamuchidiwu?

Muloña wakwila antu amakwawu amuhela Yesu. Wunayiluki wenawa antu? Wumu hakachi kawu diyi kañelu watama Satana Diyabolu. Diyi watwesheli kwilisha Adama niEvu kudikaña naYehova. Nawa Satana diyi wayilishili ayilumbu jaYesu kukoña wubanji watama ñana.

Henohu Yesu kanda amupopeli hamutondu, ayilumbu jindi amukoñeli yuma yatama. Wunakwanuka chenjiliwu kwitempa daÑesemani nakumusenda? Ana ayilumbu adiña anyi? Eña, adiña anlomboli jayipompelu. Chachiwahi, tutalenu chamwekeni hambidi.

Chanamusendiwu Yesu kudi anlomboli jayipompelu, apostolu indi hiyakutemuka. Hiyakumushiya Yesu nkawindi nawayilumbu jindi, muloña atiyili woma. Ilaña apostolu Petulu naYowanu hiyanayi nikwakulehiku. Hiyakulondela kulonda amoni chikumumwekena Yesu.

Atupristu hiyakumutwala Yesu kudi mukulumpi Anasi wadiña kapristu muneni. Antu hiyashakamini akunu mpinji yeneniku. Kulondelahu hiyakumutwala Yesu kwitala daKayafwasi, diyi kapristu muneni chayinu mpinji. Anlomboli jayipompelu amavulu anapompeli kwitala dindi.

Iku kwitala daKayafwasi hiyakumusompesha. Antu hiyakuyileta kulonda amutwambili Yesu. Anlomboli jayipompelu wejima wawu hiyakuhosha nawu: ‘Chiña amujahi Yesu.’ Kulondelahu hiyakumufwijila mumesu, nakumweta najinkonyi jawu.

Hampinji yinakumwekana yuma yejimiyi, Petulu wudi hanji mulubanza. Kwadiña mashika nawufuku, dichi antu hiyakubutula kesi. Henohu anakwota kesi, ñamba wamumbanda hakumushinshika Petulu, hakuhosha nindi: ‘Iwu iyala niyena wadiña naYesu.’

Petulu hakwakula nindi, ‘Inehi, hinadiña nindiku!’

Antu hiyakuhosha mapampa kasatu nawu Petulu wadiña naYesu. Ilaña mpinji yejima Petulu hakukana nindi hidimuku. Kapampa kamuchisatu kakaniniyi Petulu, Yesu hakubalumuka nakumutala. Petulu hakuneña nankashi hakushimuna wunsahu wakutwamba dichi hakuya kwakulehi nakudililaku.

Chineli itañwa hidikusela haChitanu nantetemena, atupristu hiyakumutwala Yesu kwiluña dawu deneni dakubulakena, muchota chaSanihedilini. Kweniku hiyakuhosha hayuma yakumwilawu. Hiyakumutwala kudi Pontusi Pilatu nyuli wankambi yaYudeya.

Atupristu hiyakumuleja Pilatu nawu, ‘Iwu himuntu watama. Chiña tuhu amujahi.’ Hanyima yakumwihula Yesu malwihu, Pilatu hakuhosha nindi: ‘Kwosi chuma chatama chinamoni chinakoñiyiku.’ Dichi Pilatu hakumutemesha Yesu kudi Herodi Antipasi. Herodi diyi nyuli wamuÑaliliya, ilaña washakamaña muYerusalema. Herodi niyena hanamoni kutama kunakoniyi Yesuku, dichi hakumufuntisha cheñi kudi Pilatu.

Pilatu nakukeña kumumbaku Yesu. Ilaña ayilumbu jaYesu anakukeña ayumbiliku kayili mukwawu. Iwu iyala Baraba hiikombi. Itañwa dinashiki dehi mukachi kewulu hanamwidishiwu Yesu hanji kudi Pilatu. Hakuleja antu nindi: ‘Talenu! Mwanta wenu!’ Ilaña akulumpi jawatupristu hiyakubidika nawu: ‘Mufumishenu aha! Mujahenu! Mujahenu!’ Dichi Pilatu hakumbaku Baraba, nawa hiyakumutwala Yesu nakumujaha.

Nampinji yamwaana haChitanu hiyakumupopela Yesu hamutondu. Hiwukuyimona hamwevuluku, ilaña kutubadi twejima tuyedi twaYesu mbanji anakumujahila hamutondu. Henohu Yesu kanda yafwi, mbanji wumu hakuhosha nindi: ‘Wukañanukaña hiwukeñila muwanta weyi.’ Dichi Yesu hakumwakula nindi: ‘Nakukani nami wukekala nanami muParadisa.’

Iku komana hikukana kwakuwahiku? Wunayiluki paradisa yinakuhoshahu Yesu? Kudihi kwadiña paradisa yaleñeli Nzambi hakusambila? Eña, yadiña hamaseki. Nawa chakayulañayi Yesu neyi mwanta mwiwulu, wakamusañula iwu iyala kuwumi kulonda akadiluñishi muParadisa yayiha hamaseki. Komana hitunatweshi kwikala namuzañalu hanichiku?

Matewu 26:57-75; 27:1-50; Luka 22:54-71; 23:1-49; Yowanu 18:12-40; 19:1-30.