MPANJI 91

Yesu Hakutañisha Hampidi

TALAÑA Yesu nashakami ahanu. Nakuyitañisha awantu ejima hampidi yaÑaliliya. Ana anashakami kwakwihi nayena diwu atumbanji twindi. Nayitondi amayala 12 kwikala apostolu. Apostolu hiyatumbanji twaYesu adimena. Wunayiluki majinawu?

Hadi Shimona Petulu nimana kwindi Anderi. Hadi cheñi Yakoba nimana kwindi Yowanu. Kapostolu mukwawu niyena amutenaña nawu Yakoba, mukwawu niyena diyi Shimona. Apostolu ayedi akweti ijina daYudasi. Wumu diyi Yudasi Isakaroti nawa Yudasi mukwawu amutenaña cheñi nawu Tadewu. Dichi kudi Fwilipu niNataneli (amutenaña cheñi nawu Batolomewu), niMatewu niTomasi.

Chelili nafumi dehi muSamariya, Yesu watachikili kushimwina katachi nindi: ‘Wanta wamwiwulu wudi kwakwihi.’ Wunawiluki iwu wanta hichumanyi? Hinfulumendi yalala yaNzambi. Yesu diyi mwanta waniwu wanta. Wukayulila mwiwulu nakuleta kuwunda hamaseki. Wanta waNzambi wukelisha iseki dejima kwikala paradisa yayiwahi.

Yesu wudi hanu nakutañisha antu hansañu yawanta. Hakulumbulula nindi, ‘Ichi dichimwatela kulomba. Tata yetu wekala mwiwulu, ijina deyi dilemi. Wanta weyi winzi. Muchima weyi awili hamaseki neyi chawilañawu mwiwulu.’ Antu amavulu atenaña iku kulomba nawu, ‘Kulomba kwaMwanta.’ Amakwawu atenaña nawu ‘Tata Yetu.’ Wunateli kutontojola kulomba kwejima?

Yesu nakutañisha cheñi antu chatelawu kudihembawu wumu namukwawu. Hakuhosha nindi, ‘Ililenu akwenu chuma chimunakukeñenu kuyilila.’ Komana hiwatiyaña kuwahaku neyi akwenu akwilila kakawahiku? Dichi Yesu nakuhosha nindi, twatela kuyilila antu acheñi kakawahi. Komana hichakawaha muparadisa hamaseki hampinji yakelaña antu ejima kakawahiku?

Matewu kapetulu 5 nakushika 7; 10:1-4.