MPANJI 96

Yesu Hakuuka Akata

CHADIÑAYI nakwendayi Yesu mwituña dejima, hakuuka akata. Nsañu yaniyi yihayamisha hiyakuyishimwina munyikala nimujimbaka jejima. Dichi antu hiyakumuletela akwakubalakata niamputamesu niatumama, niamakwawu akakata. Yesu hakuyuuka wejima wawu.

Munahiti dehi yaaka kubadika hayisatu kufuma hamupapatishiliwu Yesu kudi Yowanu. Dichi Yesu hakuleja apostolu indi nindi nakukeña kuya swayi kuYerusalema, kwenakuna akumujaha, nawa wukasañuka kufuma mudi afu. Muniyi mpinji, Yesu hakutwalekahu nakuuka akata.

Ifuku dimu Yesu nakutañisha hasabata. Sabata hifuku dakunooka dawaYudeya. Iwu mumbanda yiwunakumona hanu wadiña wakata chikupu. Hadi yaaka 18 wadiña nakubandañila hohu, nawa hatwesheleña kwimana wolokaku. Dichi Yesu hakumunañika makasa, hakwimana nisu-u. Anamuuki dehi!

Ichi hichikuhilisha anlomboli jayipompelu. Wumu hakachi kawu hakubidika kwizaza nindi, ‘Mafuku akuzatilamu adi atanu nadimu mumulungu. Awa diwu mafuku akuukilamu bayi haSabataku!’

Ilaña Yesu hakwakula nindi: ‘Enu antu atama. Muntu himuntu wakanzununaña chimbulu chindi nakuchiidisha nakumunwisha menji haSabata. Indi iwu mumbanda kazweñi wadiña wakata hadi yaaka 18, abuli kumuukila haSabata?’ Kwakula kwaYesu hikukuyitiyisha nsonyi awantu atama.

Chimunahiti mpinji Yesu niapostolu hiyakuya kuYerusalema. Henohu achidi hanji yamukala waYeriku, amputamesu ayedi akwakulomba hiyakutiya nawu Yesu nakuhita. Hiyakubidika nawu: ‘Yesu, tukwashi!’

Yesu hakuyitambika amputamesu, hakuyihula nindi: ‘Munakukeña niyilili chumanyi?’ Hiyakuhosha nawu: ‘Mwanta, toneshaku mesu etu.’ Yesu hakuyikwata hamesu, hohenohu hiyakumona! Wuneluki muloña waweni Yesu chakoñeleliyi yihayamisha yamaneni chochichi? Muloña wakukeña antu nawa nakukeña ekali nachikuhwelelu mudi yena. Komana ninetu tunateli kwiteja netu chakayulayi neyi Mwanta kwosi muntu hanu heseki wakakata cheñiku.

Matewu 15:30, 31; Luka 13:10-17; Matewu 20:29-34.