MPANJI 100

Yesu Mwitempa

HANYIMA yakufuma mukapeka kahewulu, Yesu niapostolu indi hiyakwidika nakuya kwitempa daÑesemani. Akunu enzaku dehi mapampa kakavulu. Yesu hakuyileja nindi atoneña nawa alombeña. Hakuswila hambidi chanti, hakufukama hamaseki nakulomba.

Chimunahiti kapinji Yesu hakufunta kwadiwu apostolu indi. Wunatoñojoki anakwiladi? Anakami mutulu! Mapampa kasatu Yesu nakuyileja nindi atela kutonaña, ilaña mpinji yejima yakufuntayi wukuyiwana adi mutulu. Yesu hakuhosha kapampa kakukumishaku kanafuntiyi nindi, ‘Mukukama ñahi mutulu hampinji yamuchidiwu. Mpinji yinashikili dehi kulonda anhani kudi ayilumbu jami.’

Hohenohu ipumba dawantu amavulu hidikutiyakana. Talenu! Antu anakwinza nampoku jatubali ninyitondu! Nawa anasendi manoñu akumunyika nachu. Chanashikiwu kwakwihi, muntu wumu hakufuma hezaza nakwinza chikupu kudi Yesu. Hakumupwepujola neyi chiwunakumona ahanu. Iwu iyala diyi Yudasi Isakaroti! Muloñadi chinamupwepujoleliyi Yesu?

Yesu hakumwihula nindi: ‘Yudasi wunanfukejelidi nakumpwepujola?’ Eña, kupwepujola hichinjikijilu. Kupwepujola kukwilukisha ana amayala adi naYudasi nawu iwu diyi Yesu, wunakukeñawu. Dichi ayilumbu jaYesu hiyakwinza nakumukwata. Ilaña Petulu hakuyileka amusendi Yesu chakadi kuzuñahuku. Hakunona mpoku yakabali yasendeliyi nakutapa iyala wudi kwakwihi nayena. Mpoku yakabali hiyikulweza mutu weyala nakuketula itu dindi dakuchidiilu. Ilaña Yesu hakukwata kwiitu deyalowu nawa hakudikuswisha.

Yesu hakumuleja Petulu nindi: ‘Funtishaku mpoku yeyi yakabali muchindalu. Hiwunatoñojoki neyi natela kumulomba Tata yami antemesheli makombakaji awañelu kulonda akiñiku?’ Eña, natweshi! Ilaña Yesu hanamulombi Nzambi kutemesha añeluku, muloña neluki nindi mpinji yinashiki yakumusenda kudi ayilumbu jindi. Dichi hakuyiteja amusendi. Hanu dinu tutalenu chinamumwekeni Yesu.

Matewu 26:36-56; Luka 22:39-53; Yowanu 18:1-12.