MPANJI 92

Yesu Nasañuli Afu

IWU kansi wamumbanda yiwunamoni ahanu wudi nayaaka yakusemuka 12. Yesu namukwati kuchikasa, hakwila atata yindi nimama yindi anemani kwakwihi. Wuneluki muloña waweni wunazañaleliwu? Tutalenu ntahi.

Iwu kansi wamumbanda tata yindi himuntu walema wejina daJayirusa. Ifuku dimu mwanindi wakatili, amukamika nimukadidi. Ilaña hakoleleñaku. Hakuswejesha kukata. Jayirusa nañodindi hiyakwakamena nankashi, muloña chinamwekani neyi mwanawu wukufwa. Diyi mwana wamumbanda wukwetiwu hohu. Dichi Jayirusa hakuya nakumukeñakeña Yesu. Watiya dehi yihayamisha yinakwilayi Yesu.

Jayirusa chinamuwaniyi Yesu, kuwana hadi izaza deneni dinamunyeñumuki. Ilaña Jayirusa hakuhanuka hezaza nakudinata kunyendu yaYesu. Hakumwila nindi, ‘Mwanami wamumbanda wakata nankashi.’ Hakumulomba nindi, ‘Mwani, inzenu mumuhandishi.’ Yesu hakuhosha nindi wukwinza.

Chadiña nakwendawu, antu hiyakudishijeka kulonda aswili kwakwihi. Hohenohu Yesu hakwimana. Hakwihula nindi, ‘Hinyi wunankunki?’ Yesu watiyili ñovu yamufumini, dichi hakwiluka nindi muntu diyi wunamukunki. Hinyi dinu yenowu? Himumbanda wadiña wakata nankashi hadi yaaka 12. Wenjili nakukunka kuyikovwelu yaYesu, nawa amuukili!

Ichi hichikuletesha Jayirusa kutiya kuwaha, muloña namoni chichamupelela Yesu kuuka muntu. Ilaña kañanda hakwinza. Hakumuleja Jayirusa nindi, ‘Bayi wumukabisha Yesuku. Mwaneyi nafwi dehi.’ Yesu chanatiyiyi awa mazu, hakumuleja Jayirusa nindi: ‘Bayi wakamenaku wukwikala chiwahi.’

Nkumininaku chanashikiwu kwitala daJayirusa, kuwana antu anakudila nankashi. Ilaña Yesu hakuhosha nindi: ‘Bayi mudilaku. Mwana hanafwiku. Wudi hohu mutulu.’ Ilaña hiyakumuseha nakumusekesha Yesu muloña aneluki nawu mwana nafwi.

Yesu hakusenda tata yamwana nimama yindi niapostolu asatu mukapeka munamukamikiwu mwana. Hakumukwata kuchikasa nakumwila nindi: ‘Hindukaku!’ Hakusañuka neyi chiwunamoni ahanu. Hakuhinduka nakwendujola! Dimuloña waweni mama yindi nitata yindi chanazañaleliwu nankashi.

Iwu hidiyi muntu watachi wasañwiliyi Yesu kufuma kudi afuku. Muntu watachi washimunawu muBayibolu himukwenzi weyala mwana kantuluwa washakamaña mumusumba waNena. Mukuhita kwamafuku Yesu hakusañula cheñi Lazaru, mana kwa Mariya naMata, kufuma kudi afu. Hampinji yakayulañayi Yesu neyi mwanta waNzambi, wakasañula antu amavulu afwa dehi kuwumi. Komana hiwatela kutiya muzañalu hanichiku?

Luka 8:40-56; 7:11-17; Yowanu 11:17-44.