Yesu Navwalikili Mwitaña
MPANJI 85
Yesu Navwalikili Mwitaña
WUNAMWILUKI iwu mukeki wanyanya? Eña diyi Yesu. Navwalikili tuhu mwitaña katatakichi. Itaña hiluña mwahembelañawu ayimuna. Mariya namukamiki Yesu mwadiishilañawu ayimuna, hichuma mwekalaña yakudya yadyaña ayimbulu hela ayimuna amakwawu. Hanu dinu muloñadi Yosefu naMariya chiyanekaliliwu munu mudi ayimuna? Idi hiluña datela kuvwalikilamu mwanaku, indi neyi?
Inehi, hidimuku. Ilaña iwu dimuloña waweni wanenjiliwu kunu: Nyuli wamuRoma Agusitusi Kesari watuñili nshimbi nindi muntu wejima afunti kumusumba kwavwalikililiyi kulonda akamusoneki mumukanda. Yosefu wavwalikilili munu muBetelemi. Ilaña chashikiliyi naMariya hikwadiña iluña nidimu datela kushikenamuku. Dichi hiyakwinza imu mudi ayimuna. Nawa dodenidi ifuku Mariya wavweli Yesu! Ilaña, neyi chiwunakumona, wudi hohu chiwahi.
Wunayimoni atubiña anakwinza nakumutala Yesu? Adiña mumpata nawufuku nakuhemba nyikoku yawu, dichi chejeji hichikutoñeka hadiñawu kwi-ndo. Wadiña kañelu! Atubiña atiyili woma nankashi. Ilaña kañelu hakuhosha nindi: ‘Bayi mutiya womaku! Nayileteli nsañu yayiwahi. Dalelu, muBetelemi Kristu Mwanta wavwalika. Wukapulwisha antu! Mukumuwana wakuvuñila mumahina anamukamiki mwadiishilañawu ayimuna.’ Hohenohu añelu amavulu enjili atachika nikumuhameka Nzambi. Hohenohu awa atubiña hiyakunyakashana kuya nakumukeñakeña Yesu, ichi dinu anamuwani.
Wuneluki muloña wunalemeniyi Yesu? Chalala wunamwiluki? Anukaku, mumpanji yatachi yaniwu mukanda twahosheli hadi Mwana kaNzambi wawedi. Iwu Mwana wazatili hamu naYehova hakuleña mawulu nimaseki niyuma yejima. Eña, iwu diyi Yesu!
Eña, Yehova watuntulwili wumi waMwanindi kufuma mwiwulu nakuwisha mwivumu daMariya. Hohenohu mukeki watachikili kukula mwivumu neyi chakulaña anyikeki amakwawu mumavumu awa mama jawu. Ilaña iwu mukeki wadiña Mwana kaNzambi. Nkumininaku Yesu wavwalikilili mwitaña muBetelemi. Wuneluki muloña waweni watiyililiwu añelu muzañalu wakuleja antu nawu Yesu navwaliki?
