MPANJI 97

Yesu Nenzi Neyi Mwanta

KAPINJI kantesha hanyima yakuuka amputamesu ayedi akwakulomba, Yesu hakwinza mumukala wanyanya kwakwihi naYerusalema. Hakuleja atumbanji twindi ayedi nindi: ‘Yenu mumukala mukuwana mwana kachimbulu. Mumukasununi munleteliyi.’

Chanamuleteliwu chimbulu, Yesu hakukandamahu. Hakwendelahu muYerusalema iluña dadihi. Chinashikiyi kwakwihi namusumba, izaza dawantu deneni hidikwinza nakumubulakana. Antu amavulu hiyakusubula yikovwelu yawu nakuyala munjila. Amakwawu hiyakukunkula nyitayi yamutondu wamukoma. Iyi nyitayi niyena hiyakuyala munjila, hiyakubilela nawu: ‘Nzambi kiswilaku mwanta wunakwinza mwijina daYehova!’

Hanyaka anyanta amaha amuIsarela adiña nakwendela hamwana kachimbulu hakwiñila muYerusalema nakudimwekesha kudantu. Ichi dichinakwilayi Yesu. Awantu anakumwekesha nawu anakukeña Yesu ekali mwanta wawu. Ilaña bayi neyi antu ejima anamukeñiku. Tukwiluka hanichi chuma chikumwekana chikwila Yesu ayi kutembeli.

Kutembeli Yesu hakuka antu akwakubalakata niamputamesu. Anyana anyanya chanamoniwu ichi, hiyakubilela nakumuhameka Yesu. Ilaña ichi hichikuyihilisha atupristu, hiyakumuleja Yesu nawu: ‘Wunatiyi chinakuhoshawu anyana?’

Yesu hakwakula nindi, ‘Eña, nachitiyi. Enu kanda mutañeñahu dehi muBayibolu hahosha nawu: “Nzambi wukaleta kuhameka kufuma mutunwa twawanyikeki?”’ Dichi anyana hiyakutwalekahu nakumuhameka mwanta waNzambi.

Tunakukeña kwikala neyi ana anyana, netuku? Antu amakwawu atela kweseka kutulekesha kuhosha hawanta waNzambi. Ilaña tukatwalekahu nakuleja antu hayuma yayiwahi yakayililayi Yesu antu.

Hiyadiña mpinji yaYesu yakuyula neyi mwanta hadiñayi hamasekiku. Indi iyi mpinji yakashika mwakanyi? Atumbanji twaYesu anakukeña kwiluka. Tukutaña hadi ichi hambidi.

Matewu 21:1-17; Yowanu 12:12-16.