MPANJI 88

Yowanu Hakumupapatisha Yesu

TALAÑA katela kanakwinza nakuwila hamutu wamuntu. Iwu muntu diyi Yesu. Ichi wudi dehi nayaaka 30 yakusemuka. Niniwu iyala wudiyi nindi diyi Yowanu. Twadizahu dehi nsañu jekwawu hadi yena. Wunakwanuka hayiliyi Mariya nakumwendela ntaña yindi Elizabeta, nimwana wadiña mwivumu daElizabeta watutonkeli namuzañalu? Ona mwana wadiña kanda yavwaliki diyi Yowanu. Ichi dinu Yowanu naYesu anakwiladi?

Yowanu nafumi tuhu hakumujimika Yesu mumenji amuKaloña Yodana. Ichi dichapapatishañawu muntu. Tachi, akumujimika mumenji, nakumwidisha cheñi. Muloña ichi dichayilañayi Yowanu antu, amutenaña nawu Yowanu Mpapatishu. Muloñadi Yowanu chanamupapatishiliyi Yesu?

Yowanu wamupapatishili muloña Yesu wenjili kudi yena nindi amupapatishi. Yowanu wapapatishaña antu anakukeña kumwekesha nawu analeki yuma yatama yakoñañawu. Komana Yesu wakoñelihu chuma chatama chidi chejima chateleliliyi kuleka? Inehi, Yesu hachikoñeliku, muloña yena hiMwana kaNzambi wamwiwulu. Dichi wamwihwili Yowanu nindi amupapatishi hamuloña wacheñi. Tutalenu owu muloña chiwadiña.

Henohu Yesu kanda yenzi kunu kudi Yowanu, wadiña mukwakusoña. Mukwakusoña himuntu welaña yuma yanyitondu, yuma yidi neyi jimesa niyitwamu yashiyashana. Nfumwa Mariya Yosefu wadiña mukwakusoña, dichi wamudizishili niYesu. Ilaña Yehova hatemesheli Mwanindi heseki kulonda ekali mukwakusoñaku. Wukweti mudimu walema wakumwinka, nawa nimpinji yinashikili yakwila Yesu yatachiki kuwuzata. Dichi hakwila nawu yamwekeshi nindi nenzi dehi nakwila nkeñelu yaTata yindi, Yesu hakumwila Yowanu kulonda amupapatishi. Komana Nzambi natiyi kuwaha nanichi?

Eña, muloña hanyima yakwila Yesu nafumi dehi mumenji, izu hidikufuma mwiwulu hidikuhosha nawu: ‘Iwu diyi Mwanami, yinatiyaña kuwaha.’ Cheñi chinamwekani neyi mawulu anenzunuki nawa iwu katela hakuwila hadi Yesu. Ilaña hikatela kalalaku. Kanakumwekana tuhu neyi diku. Hispiritu yajila yayeni yaNzambi.

Ichi Yesu wukweti yuma yayivulu yakutoñojoka, dichi hakuya kwakulehi kwiluña dakankawindi hadi mafuku 40. Kwenoku Satana hakwinza kudi yena. Mapampa kasatu Satana hakukeña kumwilisha Yesu yakoñi chuma chatama kutalisha kunshimbi yaNzambi. Ilaña Yesu hakuchikoñaku.

Hanyima yanochu, Yesu hakufunta nakubulakana amayala amu anekali atumbanji twindi atachi. Majinawu amakwawu diwu Anderi, niPetulu (watenañawu cheñi nawu Shimona), Fwilipu niNataneli (watenañawu cheñi nawu Batolomewu). Yesu nanawa atumbanji amaha hiyakuya kunkambi yaÑaliliya. Hiyakwimana muÑaliliya hamukala wawaNataneli muKana. Kwenakuna Yesu hakuya kuchawija cheneni chakudisumbula, hakwila chihayamisha chindi chatachi. Wuneluki chuma cheliliyi? Wabalumwini menji kwikala vinyu.

Matewu 3:13-17; 4:1-11; 13:55; Maku 6:3; Yowanu 1:29-51; 2:1-12.